Foto: SQO baspasöz qızmeti

Soltüstik Qazaqstan oblısınıñ äkimi Qwmar Aqsaqalov käsipkerlik jäne turizm basqarması kollegiyasınıñ keñeytilgen otırısında öñirde biznestiñ damuına kedergi keltirip otırğan memlekettik organdardı ataudı swradı, dep habarlaydı oblıs äkimdiginiñ baspasöz qızmeti. 

«Biz memlekettik organdardıñ jwmısına jıl qorıtındısı boyınşa käsipkerler bağa bersin degen bolatınbız. Bügin biznestiñ damuına kim kedergi boldı, kim kömektespedi jäne kerisinşe kim kömek jasadı, sonı bilgimiz keledi», - dedi Qwmar Aqsaqalov.

SQO käsipkerler palatasınıñ direktorı Twrar Isqaqov qazir oblıstıq jer qatınastarı basqarması jäne qalalıq jer qatınastarı bölimine swraqtar bar ekenin mälimdedi. Osı künge deyin Petropavlda jer komissiyası qwrılmağan. Qazir konsul'tativtik-keñes beru organınıñ jartısın käsipkerlermen, qalğan jartısın memlekettik organdarmen toltıru wsınısı bar.

Öñir basşısı atalmış organdarda biznesmenderdiñ ülesi artıq bolu kerek dedi.

«Keñes beru organdarında biznes jäne ükimettik emes wyımdarı ökilderiniñ ülesi äldeqayda artıq bolu kerek. Şeneunikterge azğana kvota qaldırıñızdar. Tekseris bwl organdarda 90 payızı şeneunikter ekenin körsetti. Olar biznestiñ közqarasın esepke alğan joq», - dep atap ötti öñir basşısı.

“The Qazaq Times”