CIA jetekşisi: Qıtay älemge äser etetin tıñşılıq jüyeni iske qostı

AQŞ Ortalıq barlau basqarmasınıñ (bwdan bılay OBB nemese CIA) jetekşisi Mayk Pompeo (Mike Pompeo) BBC-diñ swhbatın qabıldağanda: «Reseydiñ Batıs elderine degen swğanaqtığı bastı nazarda wstalatını anıq, alayda odan tıs tağı bir eldiñ intervenciyası da eñ bastı nazarda boladı, ol – Qıtay», – degen pikirin ayttı. Bwl turalı BBC-diñ resmi saytı jazdı.

OBB basşısı Mayk Pompeo (Mike Pompeo). Foto: BBC.

Mayk Pompeo sözine däyek keltire otırıp, Qıtaydıñ AQŞ-tan kommerciyalıq qwpiyalardı wrlauğa  jii tırısıp kele jatqanın, sonday-aq, jergilikti mektep jäne auruhanalar jüyesine de enuge ärekettenetinin alğa tarttı. Onıñ aytuınşa, Qıtay tek AQŞ-qa ğana emes, Europağa, sonıñ işinde Wlıbritaniyağa da bağıttalğan osınday äreketterge barğan. Onıñ pikirinşe, Qıtaydıñ Batıs elderine bağıttağan intervenciyası Reseyden kem emes.

OBB jetekşisi Resey men Qıtaydıñ ekonomikalıq jağdayların salıstıra otırıp, Qıtaydıñ özi qalağan josparların orındau üşin Reseyden köri qabiletti ekenin jetkizgen. Ol AQŞ jäne özge Batıs elderiniñ bwl Qıtay taqırıbına basa nazar audaruı kerek ekenin eskertedi. CIA basşısı sözinde: «Qıtaydıñ bükil älemge tiimsiz äseriniñ aldın alu üşin Qwrama Ştat aldın ala şaralar qabıldauı kerek», – dedi. Mayk Pompeo Qıtaydıñ Qwrama Ştattağı tıñşılıq äreketteri turalı bir sözben jauap berip: «Men bwdan qattı alañdaymın!» degen.

Esteriñizde bolsa, osıdan bwrın CIA-diñ bwrınğı agenti Qıtayğa qwpiya aqparattardı bergen degen ayıppen twtqındalğan edi. Barlau agentteriniñ birqatarı bwrınğı OBB-nıñ qızmetkeri Li Jınçıñ Qıtayğa mañızdı aqparattardı aşıp berip, Qıtaydağı AQŞ tıñşılarınıñ tolıqtay joyıluına sebepşi bolğan dep ayıptaydı.

Ortalıq barlau basqarmasınıñ anıqtauınşa, Beyjiñ biligi AQŞ-ta jüyeli türde tıñşılıq äreketin alıp baruda. Tipti keybir qıtaylıq tıñşılar AQŞ ükimet qızmetkerleri arasınan Qıtayğa qızmet körsetetin adamdardı izdep tauıp, baylanıs ornatuğa arnayı jiberilgen. Qazir AQŞ ükimeti bwl iske basa nazar audarıp otır.

Qazirgi kezde Qwrama Ştattağı qoğamdıq pikirlerdiñ deni Reseyge auıp twr. Aytalıq, olar Resey AQŞ-qa kiberşabuıl arqılı Amerika qoğamın ıdıratuğa tırısadı dep qaraydı. Alayda, Pompeo mırza swhbatında Qıtay AQŞ-qa Reseyden de köbirek äser etip otırğanın aytqan. Äri bwl Ortalıq barlau basqarmasın da tañ qaldırğan närse.

Diploamtiyalıq qızmettiñ bastı mindetteriniñ biri tıñşılıq. Foto: Daily Express.

Qıtaydıñ AQŞ-qa qaratqan şabuılı dästürli tıñşılıqtan tıs, käsiporındardıñ payda tabuı üşin ziyatkerlik önimderdi, aytalıq jaña ğılım-tehnika tapqırlıqtarın da wrlap kele jatqanı mälim. Tipti beyresmi mälimetterge qarağanda, AQŞ-ta soñğı ğılım-tehnika jañalığımen öndirilgen önim 8 sağat mölşerinde Qıtayda jasalıp şığadı degen de söz bar. Oğan qosa Qıtay ükimeti öz eline kelgen şeteldik käsip orındarınıñ jwmıstarına astırtın baqılau jürgizu arqılı, olardıñ da qwqıqtarın bwzuı mümkin delinedi.

Pompeo Qıtay ükimeti älemge ıqpal etetin şpiondıq jüyeni iske qostı jäne olardıñ önimdiligin arttıru üşin arnayı jattığudan ötken «super aqıldı» adamdardı istetip otır dep qaraydı. AQŞ barlau ökilderi Qıtay tıñşılarınıñ internettegi tıñşılıq qabiletine nazar audaradı. Qıtay men Reseydiñ şpiondıq äreketterin salıstıru tım qiın. Eki elde de bwl operaciyalar tım joğarı deñgeyde jürgiziledi. CIA Resey men Qıtaydıñ jelidegi şpiondıq soğısqa qoldanatın tehnologiyaları älemdik deñgeyde ekenin twraqtandıradı.

“The Qazaq Times”