Foto: Kursiv.kz

Qazaqstan polietilendi paketterge tıyım saludı josparlap otırğan joq. Kerisinşe osı mäseleni şeşudiñ balama jolı qarastırıluda. QR Energetika ministri Qanat Bozımbaev Ükimet brifinginde osılay mälimdedi.

"Tıyım salu täsilin qoldanayın dep otırğan joqpız. Birinşiden, mwnıñ balaması qanday ekenin naqtılauımız kerek. Bwl üşin halıqaralıq täjiribelerdi qarastırıp jatırmız. Eger qwnı boyınşa säykes keletin qağaz sındı nemese basqa da balamaları bolsa, onda polietilendi paketti almastıramız", - dedi Bozımbaev.

Sonday-aq, ministrdiñ sözinşe, aldağı uaqıtta Qazaqstanda atalğan paketterdi tegin taratuğa tıyım salınuı mümkin.

"Bwl paketterdi tegin taratpaudıñ joldarı qarastırılıp jatır. Men birneşe öñirde ömir sürdim, eldiñ oñtüstiginde tegin taratsa, soltüstikte satıladı. Al Astanadan şığa bergende bwlardıñ qanşalıqtı köp ekenin körgen bolarsızdar", - dedi ministr.

Bwdan bölek, ministr bwl mäsele qoğamdıq wyımdarmen birge talqılanıp, sodan keyin ğana qajetti şeşim qabıldanatının atap ötti.

“The Qazaq Times”