Özbekstan halqın mazalaytın eñ mañızdı mäseleler tizimi jariyalandı.

«Ijtimoiy fikr» äleumettik zertteuler ortalığı jürgizgen saualnama boyınşa, qazirgi tañda Özbekstan halqın jwmıssızdıq mäselesi qattı alañdatadı. Äleumettik saualnamağa qatısqan azamattardıñ 65,7 payızı halıqtı jwmıspen qamtudı memlekettiñ eñ bastı mindetteriniñ biri dep esepteydi. Al 40,2 payızı azıq-tülik tauarlarınıñ qımbattauın mañızdı mäsele dep sanaydı. 19,8 payızı kommunaldı qızmet türleriniñ bağasına alañdauşılıq bildiretinin jetkizgen.

Bwdan bölek saualnamağa qatısqan özbekstandıqtar «el ükimeti birinşi kezekte qanday jwmıstar atqaruı tiis?» degen swraqqa jauap bergen. Onda äleumettik zertteuge qatısqandardıñ 31,1% «ükimet birinşi kezekte jaña jwmıs orındarın aşuı kerek» degen. Al 29 payızı «bilik eñ aldımen halıqtıñ äleumettik qorğaluın qamtamasız etui tiis» degen.

Esteriñizge salayıq, Özbekstan prezidenti Şavkat Mirzieev 2017 jıldıñ mamır ayında halıqtı jwmıspen qamtu jäne qamsızdandıru zañına qol qoyğan bolatın. Atalmış zañnıñ bastı maqsatı - Özbekstan halqın jwmıspen qamtamasız etu jäne eñbek qwqığın qorğau bolıp tabıladı.

“The Qazaq Times”