Foto: Yvision.kz

Almatı oblısınıñ prokurorı Azamat Jılqıbaevtıñ mälimetinşe, qazaqstandıqtar "Qorğas" şekara mañı ıntımaqtastıq halıqaralıq ortalığınıñ Qıtay jağına ötude qiındıqtarğa tap bolğan. Bwl turalı Sputnik Qazaqstan saytı habarladı.

"Atalğan ortalıqtıñ qıtay jaq böligine wltına, azamattığına qaramastan mwsılman dästürimen kiingen jäne saqalı bar twlğalar jiberilmey jatır. Bwl äreketter birinşiden, qazaqstandıq azamattardıñ jäne bizdiñ territoriya arqılı ötkisi keletin basqa el azamattarınıñ ortalıqqa ötuin qiındatıp otır. Ekinşiden, eki el arasındağı tauar aynalımı azayıp jatır", - deydi prokuror.

Jılqıbaevtıñ sözinşe, ortalıqtağı äskeri baqılau beketteriniñ jwmısı «Qorğas» ŞIHO-nıñ qızmetin retteu turalı talaptar men kelisimderge säykes boluı kerek. Al kelisim boyınşa baqılau beketterin paydalanu tek tabiği apattar, epidemiyalar, tötenşe jağdaylar bolğanda ğana qoldanıluı tiis.

Bwl aqparattı QR Bas Prokurorınıñ orınbasarı Andrey Lukin de rastadı. Onıñ aytuınşa, qıtay tarapı sırt pişininen dini belgiler bayqalatın azamattardı öz territoriyalarına ötkizip otırğan joq. Al qıtaylıqtar bolsa mwnı: "bizde vedomstvoaralıq  nwsqau bar, biraq bwl mäseleni şeşemiz, osı jağdayda qalay äreket etu turalı kelisim boladı", - dep qısqa qayırğan.

Ayta keteyik, soñğı uaqıttarda azamattardıñ dini közqarastarına baylanıstı jağdaylar qiınday tüsken. Tipti Qazaqstannıñ özi bwl jağdayğa alañdauşılıq bildirude.

“The Qazaq Times”