ساقالدى قازاقستاندىقتاردىڭ قورعاستىڭ قىتاي جاعىنا ءوتۋى قيىنداعان

"اتالعان ورتالىقتىڭ قىتاي جاق بولىگىنە ۇلتىنا، ازاماتتىعىنا قاراماستان مۇسىلمان داستۇرىمەن كيىنگەن جانە ساقالى بار تۇلعالار جىبەرىلمەي جاتىر. بۇل ارەكەتتەر بىرىنشىدەن، قازاقستاندىق ازاماتتاردىڭ جانە ءبىزدىڭ تەرريتوريا ارقىلى وتكىسى كەلەتىن باسقا ەل ازاماتتارىنىڭ ورتالىققا ءوتۋىن قيىنداتىپ وتىر. ەكىنشىدەن، ەكى ەل اراسىنداعى تاۋار اينالىمى ازايىپ جاتىر", - دەيدى پروكۋرور.

جىلقىباەۆتىڭ سوزىنشە، ورتالىقتاعى اسكەري باقىلاۋ بەكەتتەرىنىڭ جۇمىسى «قورعاس» شىحو-نىڭ قىزمەتىن رەتتەۋ تۋرالى تالاپتار مەن كەلىسىمدەرگە سايكەس بولۋى كەرەك. ال كەلىسىم بويىنشا باقىلاۋ بەكەتتەرىن پايدالانۋ تەك تابيعي اپاتتار، ەپيدەميالار، توتەنشە جاعدايلار بولعاندا عانا قولدانىلۋى ءتيىس.

بۇل اقپاراتتى قر باس پروكۋرورىنىڭ ورىنباسارى اندرەي لۋكين دە راستادى. ونىڭ ايتۋىنشا، قىتاي تاراپى سىرت پىشىنىنەن ءدىني بەلگىلەر بايقالاتىن ازاماتتاردى ءوز تەرريتوريالارىنا وتكىزىپ وتىرعان جوق. ال قىتايلىقتار بولسا مۇنى: "بىزدە ۆەدومستۆوارالىق  نۇسقاۋ بار، بىراق بۇل ماسەلەنى شەشەمىز، وسى جاعدايدا قالاي ارەكەت ەتۋ تۋرالى كەلىسىم بولادى", - دەپ قىسقا قايىرعان.

ايتا كەتەيىك، سوڭعى ۋاقىتتاردا ازاماتتاردىڭ ءدىني كوزقاراستارىنا بايلانىستى جاعدايلار قيىنداي تۇسكەن. ءتىپتى قازاقستاننىڭ ءوزى بۇل جاعدايعا الاڭداۋشىلىق بىلدىرۋدە.

“The Qazaq Times”