Foto: anatili.kazgazeta.kz

Parlament mäjilisi QR Jer qatınastarın retteu boyınşa keybir zañ aktilerine tüzetuler men tolıqtırular engizu turalı zañ jobasın alğaşqı oqılımda maqwldadı – dep habarlaydı Azattıq Radiosı.

Auıl şaruaşılığı ministri Asqar Mırzahmetovtıñ sözinşe, jaña zañ jobasında auıl şaruaşılığı jerlerin tiimdi paydalanudı qadağalau şaraları, şekara sızığında ornalasqan jerlerdi beruge jäne şeteldikterge, azamattığı joq adamdarğa, şetel azamatımen nemese azamattığı joq adammen nekege twrğan Qazaqstan azamatına, şeteldik zañdı twlğalarğa jäne qwramında şetel azamatı bar qazaqstandıq zañdı twlğalarğa jer beruge tıyım salu qarastırılğan.

Ministrdiñ aytuına qarağanda, şekara sızığı boyınşa ornalasqan auıl şaruaşılığı jerleri paydalanuğa da, jeke menşikke de berilmeydi. Jäne osıdan bılay äkimdikter auıl şaruaşılığına arnalğan jerlerdi jalğa beru konkursına qoğamdıq keñes pen ükimettik emes wyımdardıñ kelisimi boyınşa ğana qatısa aladı.

Esteriñizge salayıq, 2015 jılı Nwrswltan Nazarbaevtıñ jarlığımen jer turalı zañğa özgertuler engizilgen. Bwl qoğamda qızu talqılanıp, 2016 jılı Qazaqstan boyınşa mitingige wlasqan bolatın. Osıdan keyin Atırauda jer mitingisin wyımdastırğan Talğat Ayan men Maks Boqaev «jalğan aqparat tarattı», «miting ötkizu tärtibin bwzdı» jäne «arazdıq tudırdı» degen ayıptar boyınşa kinäli dep tanılıp, bes jılğa sottalğan.

“The Qazaq Times”