ءماجىلىس جەر تۋرالى زاڭ جوباسىن ماقۇلدادى

پارلامەنت ءماجىلىسى قر جەر قاتىناستارىن رەتتەۋ بويىنشا كەيبىر زاڭ اكتىلەرىنە تۇزەتۋلەر مەن تولىقتىرۋلار ەنگىزۋ تۋرالى زاڭ جوباسىن العاشقى وقىلىمدا ماقۇلدادى – دەپ حابارلايدى ازاتتىق راديوسى.

اۋىل شارۋاشىلىعى ءمينيسترى اسقار مىرزاحمەتوۆتىڭ سوزىنشە، جاڭا زاڭ جوباسىندا اۋىل شارۋاشىلىعى جەرلەرىن ءتيىمدى پايدالانۋدى قاداعالاۋ شارالارى، شەكارا سىزىعىندا ورنالاسقان جەرلەردى بەرۋگە جانە شەتەلدىكتەرگە، ازاماتتىعى جوق ادامدارعا، شەتەل ازاماتىمەن نەمەسە ازاماتتىعى جوق اداممەن نەكەگە تۇرعان قازاقستان ازاماتىنا، شەتەلدىك زاڭدى تۇلعالارعا جانە قۇرامىندا شەتەل ازاماتى بار قازاقستاندىق زاڭدى تۇلعالارعا جەر بەرۋگە تىيىم سالۋ قاراستىرىلعان.

ءمينيستردىڭ ايتۋىنا قاراعاندا، شەكارا سىزىعى بويىنشا ورنالاسقان اۋىل شارۋاشىلىعى جەرلەرى پايدالانۋعا دا، جەكە مەنشىككە دە بەرىلمەيدى. جانە وسىدان بىلاي اكىمدىكتەر اۋىل شارۋاشىلىعىنا ارنالعان جەرلەردى جالعا بەرۋ كونكۋرسىنا قوعامدىق كەڭەس پەن ۇكىمەتتىك ەمەس ۇيىمداردىڭ كەلىسىمى بويىنشا عانا قاتىسا الادى.

ەستەرىڭىزگە سالايىق، 2015 جىلى نۇرسۇلتان نازارباەۆتىڭ جارلىعىمەن جەر تۋرالى زاڭعا وزگەرتۋلەر ەنگىزىلگەن. بۇل قوعامدا قىزۋ تالقىلانىپ، 2016 جىلى قازاقستان بويىنشا ميتينگىگە ۇلاسقان بولاتىن. وسىدان كەيىن اتىراۋدا جەر ميتينگىسىن ۇيىمداستىرعان تالعات ايان مەن ماكس بوقاەۆ «جالعان اقپارات تاراتتى»، «ميتينگ وتكىزۋ ءتارتىبىن بۇزدى» جانە «ارازدىق تۋدىردى» دەگەن ايىپتار بويىنشا كىنالى دەپ تانىلىپ، بەس جىلعا سوتتالعان.

“The Qazaq Times”