Bügin äl-Farabi atındağı Qazaq wlttıq universiteti, jurnalistika fakul'tetiniñ wyımdastıruımen Qazaqstan Respublikasınıñ qoğam qayratkerleri men dizayner-suretşiler bas qostı.

Atap aytqanda, QR suretşiler odağınıñ, QR suretşiler akademiyasınıñ müşesi, suretşi, dizayner Nwran Ayımbet, «Qazaq universiteti» baspasınıñ dizayneri Kämşat Älmwratqızı, «Äl-Farabi print» baspasınıñ dizayneri Mwhtar Bekjan, QR suretşiler akademiyasınıñ müşesi, suretşi Serikbay Beysen, mistik jazuşı, dizayner Qoyşıbek Mübarak, jurnalistika fakul'tetiniñ dekanı Sağatbek Medeubekwlı, baspagerlik, redaktorlıq jäne dizaynerlik öner kafedrasınıñ meñgeruşisi J. Bekbolatwlı, baspagerlik, redaktorlıq jäne dizaynerlik öner kafedrasınıñ ağa oqıtuşısı Smayıl Därmen jäne kafedranıñ oqıtuşılar qwramı qatıstı.

Döñgelek üsteldiñ maqsatı - «Dizayn» mamandığın oqıtudağı özekti mäselelerdi talqılap, onıñ şeşu joldarın qarastıru.

Jiınğa şaqırılğan arnayı qonaq QR suretşiler odağınıñ, QR suretşiler akademiyasınıñ müşesi, suretşi, dizayner Nwran Ayımbet: «Jurnalistika fakul'tetinde «Dizayn» mamandığınıñ aşıluı quantarlıq jayt, biraq, jay ğana dizayner bolu basqa da, sauattı, bilikti dizayner bolu bir bölek. Sondıqtan, mamandıqtı zamanuai talapqa say etip, jandandıra tüsuimiz qajet», - dep,öz pikirin ayttı.

QR suretşiler akademiyasınıñ müşesi, suretşi Serikbay Beysen Jurnalistika fakul'tetinde oqıtılatın mamandıq bolğannan keyin, «BAQ dizaynı» degen atpen mamandıqtıñ şifrın özgertip, oqu üderisin 5 jıldıqtan 4 jıldıqqa auıstıruımız kerek degen wsınısın bildirdi.

Şamamen eki sağatqa sozılğan döñgelek üsteldiñ jwmısın qorıtındılau barısında mınaday oylar aytıldı:

  • «Dizayn» mamandığın oqıtudağı oqu üderisin 5 jıldıqtan 4 jıldıqqa auıstıru;
  • «BAQ dizaynı» attı jaña şifr engizu;
  • Dizaynerlerdiñ oqu bağdarlamasın qayta qarap, täjiribelik sabaqtardı keñinen engizu turalı qaulı qabıldanıp, fakul'tettiñ ğılımi keñesine wsınu.

Aqmöldir Tilepbergen

“The Qazaq Times”