بۇگىن ال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتىنىڭ ۇيىمداستىرۋىمەن قازاقستان رەسپۋبليكاسىنىڭ قوعام قايراتكەرلەرى مەن ديزاينەر-سۋرەتشىلەر باس قوستى.

اتاپ ايتقاندا، قر سۋرەتشىلەر وداعىنىڭ، قر سۋرەتشىلەر اكادەمياسىنىڭ مۇشەسى، سۋرەتشى، ديزاينەر نۇران ايىمبەت، «قازاق ۋنيۆەرسيتەتى» باسپاسىنىڭ ديزاينەرى كامشات المۇراتقىزى، «ءال-فارابي پرينت» باسپاسىنىڭ ديزاينەرى مۇحتار بەكجان، قر سۋرەتشىلەر اكادەمياسىنىڭ مۇشەسى، سۋرەتشى سەرىكباي بەيسەن، ميستيك جازۋشى، ديزاينەر قويشىبەك مۇباراك، جۋرناليستيكا فاكۋلتەتىنىڭ دەكانى ساعاتبەك مەدەۋبەكۇلى، باسپاگەرلىك، رەداكتورلىق جانە ديزاينەرلىك ونەر كافەدراسىنىڭ مەڭگەرۋشىسى ج. بەكبولاتۇلى، باسپاگەرلىك، رەداكتورلىق جانە ديزاينەرلىك ونەر كافەدراسىنىڭ اعا وقىتۋشىسى سمايىل دارمەن جانە كافەدرانىڭ وقىتۋشىلار قۇرامى قاتىستى.

دوڭگەلەك ۇستەلدىڭ ماقساتى - «ديزاين» ماماندىعىن وقىتۋداعى وزەكتى ماسەلەلەردى تالقىلاپ، ونىڭ شەشۋ جولدارىن قاراستىرۋ.

جيىنعا شاقىرىلعان ارنايى قوناق قر سۋرەتشىلەر وداعىنىڭ، قر سۋرەتشىلەر اكادەمياسىنىڭ مۇشەسى، سۋرەتشى، ديزاينەر نۇران ايىمبەت: «جۋرناليستيكا فاكۋلتەتىندە «ديزاين» ماماندىعىنىڭ اشىلۋى قۋانتارلىق جايت، بىراق، جاي عانا ديزاينەر بولۋ باسقا دا، ساۋاتتى، بىلىكتى ديزاينەر بولۋ ءبىر بولەك. سوندىقتان، ماماندىقتى زامانۋاي تالاپقا ساي ەتىپ، جانداندىرا ءتۇسۋىمىز قاجەت»، - دەپ،ءوز پىكىرىن ايتتى.

قر سۋرەتشىلەر اكادەمياسىنىڭ مۇشەسى، سۋرەتشى سەرىكباي بەيسەن جۋرناليستيكا فاكۋلتەتىندە وقىتىلاتىن ماماندىق بولعاننان كەيىن، «باق ديزاينى» دەگەن اتپەن ماماندىقتىڭ شيفرىن وزگەرتىپ، وقۋ ۇدەرىسىن 5 جىلدىقتان 4 جىلدىققا اۋىستىرۋىمىز كەرەك دەگەن ۇسىنىسىن ءبىلدىردى.

شامامەن ەكى ساعاتقا سوزىلعان دوڭگەلەك ۇستەلدىڭ جۇمىسىن قورىتىندىلاۋ بارىسىندا مىناداي ويلار ايتىلدى:

  • «ديزاين» ماماندىعىن وقىتۋداعى وقۋ ۇدەرىسىن 5 جىلدىقتان 4 جىلدىققا اۋىستىرۋ;
  • «باق ديزاينى» اتتى جاڭا شيفر ەنگىزۋ;
  • ديزاينەرلەردىڭ وقۋ باعدارلاماسىن قايتا قاراپ، تاجىريبەلىك ساباقتاردى كەڭىنەن ەنگىزۋ تۋرالى قاۋلى قابىلدانىپ، فاكۋلتەتتىڭ عىلىمي كەڭەسىنە ۇسىنۋ.

اقمولدىر تىلەپبەرگەن

“The Qazaq Times”