Foto: Kloop.kg

Qaraşa ayınıñ 24-i küni Qırğızstanda Sooronbay Jeenbekovtıñ inauguraciyası ötedi. Däl osı künnen bastap Almazbek Atambaevtıñ ökilettik merzimi ayaqtaladı. Osığan baylanıstı Atambaev Qırğızstan Konstituciyası boyınşa, eks-prezident märtebesine ie boladı. Bwl oğan aldağı uaqıtta qarapayım Qırğızstan azamatı retinde qanday mümkindikter beredi?

Qırğızstan Ata Zañına säykes eks-prezident märtebesine ie bolğan Almazbek Atambaev öziniñ ökilettik merzimin ayaqtağannan keyin, Konstituciya boyınşa qorğalatın boladı. Atap aytqanda: 1. Atambaevtı jäne onıñ otbasın prezidenttik qızmeti kezinde istegen isteri üşin qılmıstıq jäne äkimşiliktik jauapkerşilikke tartuğa bolmaydı. 2. Atambaevtıñ ieligindegi twrğın üy jäne qızmettik ğimarattarğa, avtokölik pen baylanıs qwraldarına, jeke mwrağatı men qwjattarına qanday da bir azamattıñ nemese wyımnıñ qol swğuına tıyım salınadı. 3. Eks-prezidenttiñ osı uaqıtqa deyin istegen isteri üşin onı tergeuge jäne üyinde tintu jwmıstarın jürgizuge zañ jüzinde tıyım salınadı.

Bwdan bölek Atambaevtıñ özi jäne otbası ömiriniñ soñına deyin äuejaylar men vokzaldarda resmi twlğalarğa arnalğan zaldardı tegin paydalanuğa, tegin medicinalıq qızmet aluğa, poçta, telegraf, baylanıs qızmetin tegin paydalanuğa qwqılı. Jäne de Atambaev qızmetinen ketkennen keyin, oğan el ükimeti şetelderge jasağan saparları men otbasımen şipajaylarda demaluına jäne kommunaldıq qızmetine jıl sayın byudjetten qarjı bölip twratın boladı. Bwnday jağday bizdiñ elge de tañsıq emes. Sebebi osığan wqsas märtebege soñğı kezderi Atambaev jii sınaytın Qazaqstan prezidenti Nwrswltan Nazarbaev pen onıñ otbası da ie.

“The Qazaq Times”