فوتو: Kloop.kg

قاراشا ايىنىڭ 24-ءى كۇنى قىرعىزستاندا سوورونباي جەەنبەكوۆتىڭ يناۋگۋراتسياسى وتەدى. ءدال وسى كۇننەن باستاپ المازبەك اتامباەۆتىڭ وكىلەتتىك مەرزىمى اياقتالادى. وسىعان بايلانىستى اتامباەۆ قىرعىزستان كونستيتۋتسياسى بويىنشا، ەكس-پرەزيدەنت مارتەبەسىنە يە بولادى. بۇل وعان الداعى ۋاقىتتا قاراپايىم قىرعىزستان ازاماتى رەتىندە قانداي مۇمكىندىكتەر بەرەدى؟

قىرعىزستان اتا زاڭىنا سايكەس ەكس-پرەزيدەنت مارتەبەسىنە يە بولعان المازبەك اتامباەۆ ءوزىنىڭ وكىلەتتىك مەرزىمىن اياقتاعاننان كەيىن، كونستيتۋتسيا بويىنشا قورعالاتىن بولادى. اتاپ ايتقاندا: 1. اتامباەۆتى جانە ونىڭ وتباسىن پرەزيدەنتتىك قىزمەتى كەزىندە ىستەگەن ىستەرى ءۇشىن قىلمىستىق جانە اكىمشىلىكتىك جاۋاپكەرشىلىككە تارتۋعا بولمايدى. 2. اتامباەۆتىڭ يەلىگىندەگى تۇرعىن ءۇي جانە قىزمەتتىك عيماراتتارعا، اۆتوكولىك پەن بايلانىس قۇرالدارىنا، جەكە مۇراعاتى مەن قۇجاتتارىنا قانداي دا ءبىر ازاماتتىڭ نەمەسە ۇيىمنىڭ قول سۇعۋىنا تىيىم سالىنادى. 3. ەكس-پرەزيدەنتتىڭ وسى ۋاقىتقا دەيىن ىستەگەن ىستەرى ءۇشىن ونى تەرگەۋگە جانە ۇيىندە ءتىنتۋ جۇمىستارىن جۇرگىزۋگە زاڭ جۇزىندە تىيىم سالىنادى.

بۇدان بولەك اتامباەۆتىڭ ءوزى جانە وتباسى ءومىرىنىڭ سوڭىنا دەيىن اۋەجايلار مەن ۆوكزالداردا رەسمي تۇلعالارعا ارنالعان زالداردى تەگىن پايدالانۋعا، تەگىن مەديتسينالىق قىزمەت الۋعا، پوچتا، تەلەگراف، بايلانىس قىزمەتىن تەگىن پايدالانۋعا قۇقىلى. جانە دە اتامباەۆ قىزمەتىنەن كەتكەننەن كەيىن، وعان ەل ۇكىمەتى شەتەلدەرگە جاساعان ساپارلارى مەن وتباسىمەن شيپاجايلاردا دەمالۋىنا جانە كوممۋنالدىق قىزمەتىنە جىل سايىن بيۋدجەتتەن قارجى ءبولىپ تۇراتىن بولادى. بۇنداي جاعداي ءبىزدىڭ ەلگە دە تاڭسىق ەمەس. سەبەبى وسىعان ۇقساس مارتەبەگە سوڭعى كەزدەرى اتامباەۆ ءجيى سىنايتىن قازاقستان پرەزيدەنتى نۇرسۇلتان نازارباەۆ پەن ونىڭ وتباسى دا يە.

“The Qazaq Times”