Foto: Sputnik Kırgızstan

Talas oblısınıñ halqı Qırğızstan prezidenti Almazbek Atambaevqa elden keşirim swrauğa 3 qaraşağa deyin uaqıt berdi.  

Qazan ayınıñ 29-ı küni Talas qalasınıñ ortalığında 1000-ğa juıq adam "Almazbek Atambaev prezident saylauı kezinde aytqan sözderi üşin oblıs halqınan keşirim swrasın" dep beybit şeru ötkizgen. Olardıñ sözinşe, Atambaev saylau kezinde jasağan mälimdemeleri arqılı Talas oblısınıñ halqına til tigizip qana qoymay, osı äreketi arqılı qazaq-qırğız şekarasınıñ jabıluına sebepşi bolğan. Osığan baylanıstı oblıs halqı Atambaevqa 3 qaraşağa deyin uaqıt bergen. Eger el prezidenti belgilengen uaqıtqa deyin keşirim swramasa, qazaq-qırğız şekarasındağı jağdaydı şeşpese, Qıtaydan keletin tauarlardıñ ne üşin resmi statistikadan üş esege köp ekendigin tüsindirmese, onda oblıs halqı beybit şeruge şığatının aytqan. Biraq resmi Bişkek Talas oblısında bolıp jatqan bwl jağdaylarğa mülde köñil audarmağan. Tipti qırğız prezidentiniñ äkimşiligi atalmış şeru ötken künniñ erteñinde Almazbek Atambaevtıñ kezekti eñbek demalısına ketkendigi jayında aqparat taratqan.

Esteriñizge salayıq, bwğan deyin Talas oblısınıñ aqsaqaldarı Bişkek qalasında bitimgerşilik delegaciyasın bastap barğan bolatın. Onda olar Almazbek Atambaevtan el halqınan keşirim swrauın talap etken. Biraq ol kezde de Atambaev Talas halqınıñ bwl sözine qwlaq aspağan edi.

Jalpı Talas oblısı Qırğızstan tarihında ülken rölge ie. Sebebi 2010 jılı säuir revolyuciyası men Qwrmanbek Bakiev klanına qarsı bas köteruler däl osı oblısta bastalğan bolatın.

“The Qazaq Times”