Ruzahunov qırğızstandıq aqparat qwraldarına jauap berip twr. Foto; BBC qırğız qızmetinen.

Eline jetken qırğızstandıq muzkant Vikram Ruzahunov jurnalisterdiñ swraqtarına jauap berip, video mälimdemede aytqandarınıñ bäri jalğan ekenin jetkizdi. Bwl turalı Qırğızstandağı aqparat qwraldarı men qırğız äleumettik jeli qoldanuşıları jarısa jazıp jatır. Ol sözinde eline aman-esen qaytu üşin osınday iske barğanın mälimdegen.

Ruzahunovtıñ aytuınşa, ol 2 qañtarda dosınıñ şaqıruımen Almatığa iskerlik maqsatta kelgen, Almatıda miting bastalğan 4 qañtarda oğan dosı habarlasıp üyden şıqpay otıruın eskertken, ol jalğa alğan päterde otırıp Almtıdağı mitingke kuä bolğan. BBC qırğız qızmeti habarında Ruzahun: «4-, 5-, 6 qañtar künderi üyden şıqpay otırdım. Biraq, jağday qiınday tüsti, dükender istemey qaldı, sondıqtan men üyge qaytuğa şeşim qabıldadım», – deydi I.Ruzahunov sözinde.

Muzkanttıñ aytısına qarağanda 7 qañtarda Sayran avtovokzalınan taksige otırıp Qırğızstanğa bet alğan. Samsı auılında onı äskeriler wstap, uaqıtşa qamau ornına otırğızğan. Onda oğan dwrıs mämile jasalğan, ıstıq şay, tamaq berilgen. Jağday twraqtanğanğa deyin ol sol arada 4 kün bolğanın aytadı.

Ol uaqıtşa qamau ornında özimen birge qamalğandardan mınaday sözderdi estidi: «Sağan aqşa wsınğan...,  Almatığa miting üşin keldim deseñ birden Qırğızstanğa jiberedi...» degen sekildi.

«Bwl bir jol edi. Biraq, men onday istemegen bolsam da, solay dep aytayın dep şeştim. Bwl üyge erterek jetudiñ oñay joldarınıñ biri dep oyladım, sondıqtan, sonı qoldanıp köreyin dep şeştim», – deydi Qırğızstandıq muzkant.

Bwdan keyin Ruzahunov: «Videoda aytqandarım jalğan. [Bet-auızımnıñ kögergeni] 7 qañtar Almatıdan Bişkekke qaytıp kele jatqanda şekara qızmetiniñ küş qoldanuımen wstauında boldım. Bizdiñ kamerada 4 qırğızstandıq boldı... Barlığın wstap jattı, olardıñ arasında täjikstandıqtar da, özbekstandıqtar da, tipti qazaqstandıqtardıñ özderi de boldı», – deydi jurnalisterge bergen jauabında.

«Qanday qağazdarğa qol qoyğan bolsam, öz auzımmen qazir sizderge aytıp jatırmın», – degen qırğızstandıq azamat: «Eşqanday qwpiya, kommerciyalıq qwpiya degen joq, mağan onday wsınğan joq», – deydi.

«Şının aytsam, men mälimdeme jasap jatqanda, ondağı arnayı sözder şındıq bolmasa da, men onday is jasağan joqpın. Biraq sonı aytıp jatıp, bäri jaqsı boladı dep oyladım. Üytkeni meni tanığandardıñ bäri meniñ nemen aynalısatınımdı, kim ekenimdi biledi, mälimdemeniñ jalğan ekenin de biledi», – deydi Ruzahunov.

Bwğan deyin Qazaqstandağı resmi telearnalar taratqan videolardıñ birinde Vikram Ruzahunovtıñ «Almatığa miting üşin keldim» degen mağınadağı mälimdeme jasağan edi. Bwl «Qazaqstandağı dürbeleñge qatısqan şeteldik küşter bar degen» resmi bilik mälimdemesi kezinde tarağan bolatın. Qırğızstan taraptıñ jedel qaytarğan narazılığınan keyin Qazaqstannıñ qwzırlı organdarı vieoda söylep twrğan «Vikram Ruzahunov emes Zakir Uburov» dep mälimegen.

Ruzahunov isi Qazaqstan men Qırğızstan ortasında köp talqığa mwrındıq bolğanı ras. Onıñ Qırğızstanğa barğannan keyin jasağan mälimdemesi elimizdegi keybir oqiğalarğa qatıstı küdikti küşeytti.

Degenmen, Ruzahunov Bişkektegi «mäñigilik alau» aldında söylep twrıp: «Bwl qazaq pen qırğızdıñ dostığınıñ simvolı bolıp qalsın», – degen pikirin ayttı. Bwğan qarağanda ol öziniñ qanday şıntıqtı jayıp salğanın da bilmeytinge wqsaydı.

The Qazaq Times