Foto: Daily Mail

Las-Vegastağı qonaq üydiñ 32 qabatınan koncertke jinalğan halıqtıñ üstinen oq jaudırğan Stiven Paddok qılmısınıñ jaña qırları belgili boldı. Terezesi 22 mıñ halıqtı jinağan muzıkalıq festival' ötip jatqan jaqqa qarağan bölmeni tañdap alu, tosınnan keletin adamdar men küzetşilerdi qadağalap otıratın beynekameralar ornatu qılmıstıñ aldın ala mwqiyat josparlanğanın körsetedi. Bwl turalı CNN aqparattıq agenttigi jazdı. 

Stiven Paddoktıñ zeynet jasına kelgende bir künde 58 adamdı öltirgen qılmıskerge nelikten aynalıp şığa kelgenin eşkim de bilmeydi. Bir anığı, onıñ halıqaralıq terroristik wyımdarmen baylanısınıñ joqtığı. Biraq onıñ ülken qılmıstıq toptarmen sıbaylaspay, qandı oqiğanı jeke dara jüzege asıruı policiya qızmetin odan äri qiındatıp otır. Öytkeni qılmısker oqiğa ornında qaza tapqan, al onıñ jaqındarı zertteu isine kömektese alar derekter bere alğan joq.

Stiven Paddoktıñ Fillipinge 100 mıñ AQŞ dolları köleminde aqşa audarğanı belgili boldı. Qwqıq qorğau qızmetkerleri aqşa audarımı kimniñ atına jasalğanın äli anıqtağan joq. Bwl iske Fillipin memleketiniñ kömegi  boladı degen ümit bar.

Stiven Paddokpen birge twrğan Marilou Danley esimdi qız keşe tünde Maniladan Fillipinge keldi. Äuejayda birden policiya qızmetkerleriniñ soñınan eruge mäjbür bolğan qılmıskerdiñ azamattıq nekedegi äyelinen aldağı uaqıtta jauap alınatın boladı.

Donal'd Tramp öziniñ tvitter paraqşasında: "Las Vegas policiyasınıñ qılmıskerdi jıldam tauıp, onı mwnan da köp twrğınnıñ ölimine sebepker boludan toqtatıp ülgergenderi tañ qaldıradı", - dep jazdı.

Foto: Daily Mail

Wlıbritaniyanıñ Daily Mail basılımı qılmıskerdiñ qonaq üydegi bölmesinen tüsirilgen suretterdi jariyaladı. Onda policiya qolınan mert bolğan Stiven Paddoktıñ denesi men aynalasında şaşılıp jatqan qaru-jaraq körinedi. Jalpı, policiya qızmetkerleri Stiven Paddoktıñ qonaq üydegi bölmesi men Nevadadağı üyinen, jeke köliginen köptegen jarılğış zattarğa qajetti qospa, tapanşalar men suıq qaru tapqan. Bir adamnıñ basında osınşa qaru bolğandığı AQŞ azamattardıñ qaru satıp aluın qadağalaudı qolğa alu kerek ekenin tağı bir däleldedi.

“The Qazaq Times”