فوتو: Daily Mail

لاس-ۆەگاستاعى قوناق ءۇيدىڭ 32 قاباتىنان كونتسەرتكە جينالعان حالىقتىڭ ۇستىنەن وق جاۋدىرعان ستيۆەن پاددوك قىلمىسىنىڭ جاڭا قىرلارى بەلگىلى بولدى. تەرەزەسى 22 مىڭ حالىقتى جيناعان مۋزىكالىق فەستيۆال ءوتىپ جاتقان جاققا قاراعان بولمەنى تاڭداپ الۋ، توسىننان كەلەتىن ادامدار مەن كۇزەتشىلەردى قاداعالاپ وتىراتىن بەينەكامەرالار ورناتۋ قىلمىستىڭ الدىن الا مۇقيات جوسپارلانعانىن كورسەتەدى. بۇل تۋرالى CNN اقپاراتتىق اگەنتتىگى جازدى. 

ستيۆەن پاددوكتىڭ زەينەت جاسىنا كەلگەندە ءبىر كۇندە 58 ادامدى ولتىرگەن قىلمىسكەرگە نەلىكتەن اينالىپ شىعا كەلگەنىن ەشكىم دە بىلمەيدى. ءبىر انىعى، ونىڭ حالىقارالىق تەرروريستىك ۇيىمدارمەن بايلانىسىنىڭ جوقتىعى. بىراق ونىڭ ۇلكەن قىلمىستىق توپتارمەن سىبايلاسپاي، قاندى وقيعانى جەكە دارا جۇزەگە اسىرۋى پوليتسيا قىزمەتىن ودان ءارى قيىنداتىپ وتىر. ويتكەنى قىلمىسكەر وقيعا ورنىندا قازا تاپقان، ال ونىڭ جاقىندارى زەرتتەۋ ىسىنە كومەكتەسە الار دەرەكتەر بەرە العان جوق.

ستيۆەن پاددوكتىڭ فيلليپينگە 100 مىڭ اقش دوللارى كولەمىندە اقشا اۋدارعانى بەلگىلى بولدى. قۇقىق قورعاۋ قىزمەتكەرلەرى اقشا اۋدارىمى كىمنىڭ اتىنا جاسالعانىن ءالى انىقتاعان جوق. بۇل ىسكە فيلليپين مەملەكەتىنىڭ كومەگى  بولادى دەگەن ءۇمىت بار.

ستيۆەن پاددوكپەن بىرگە تۇرعان Marilou Danley ەسىمدى قىز كەشە تۇندە مانيلادان فيلليپينگە كەلدى. اۋەجايدا بىردەن پوليتسيا قىزمەتكەرلەرىنىڭ سوڭىنان ەرۋگە ءماجبۇر بولعان قىلمىسكەردىڭ ازاماتتىق نەكەدەگى ايەلىنەن الداعى ۋاقىتتا جاۋاپ الىناتىن بولادى.

دونالد ترامپ ءوزىنىڭ تۆيتتەر پاراقشاسىندا: "لاس ۆەگاس پوليتسياسىنىڭ قىلمىسكەردى جىلدام تاۋىپ، ونى مۇنان دا كوپ تۇرعىننىڭ ولىمىنە سەبەپكەر بولۋدان توقتاتىپ ۇلگەرگەندەرى تاڭ قالدىرادى", - دەپ جازدى.

فوتو: Daily Mail

ۇلىبريتانيانىڭ Daily Mail باسىلىمى قىلمىسكەردىڭ قوناق ۇيدەگى بولمەسىنەن تۇسىرىلگەن سۋرەتتەردى جاريالادى. وندا پوليتسيا قولىنان مەرت بولعان ستيۆەن پاددوكتىڭ دەنەسى مەن اينالاسىندا شاشىلىپ جاتقان قارۋ-جاراق كورىنەدى. جالپى، پوليتسيا قىزمەتكەرلەرى ستيۆەن پاددوكتىڭ قوناق ۇيدەگى بولمەسى مەن نەۆاداداعى ۇيىنەن، جەكە كولىگىنەن كوپتەگەن جارىلعىش زاتتارعا قاجەتتى قوسپا، تاپانشالار مەن سۋىق قارۋ تاپقان. ءبىر ادامنىڭ باسىندا وسىنشا قارۋ بولعاندىعى اقش ازاماتتاردىڭ قارۋ ساتىپ الۋىن قاداعالاۋدى قولعا الۋ كەرەك ەكەنىن تاعى ءبىر دالەلدەدى.

“The Qazaq Times”