Twrğın üy qwrılıs jinaq banki Petropavl qwrılısşılarımen ıntımaqtastıq ornatpaq

Petropavl qalasında «Bäyterek» holdinginiñ enşiles wyımdarı «Qazaqstannıñ Twrğın üy qwrılıs jinaq banki» AQ men «Twrğın üy qwrılısına kepildik beru qorı» AQ Soltüstik Qazaqstan oblısındağı qwrılıs jürgizuşilermen jäne jergilikti atqaruşı organ ökilderimen kezdesti. Taraptar birlesip ıntımaqtastıq ornatu mäselelerin talqıladı.

Qazir Twrğın üy qwrılıs jinaq bankinde aymaqtıñ 30 000 twrğını üy alu üşin aqşa jinap jatır. Olarğa tiesili jalpı depozit qorjını 12,4 mlrd teñgeni qwraydı. Salımşılardıñ barlığı bağası asa qımbat emes, biraq sapalı üy aludı josparlap otır, al bank bwl jolda olarğa kömektesudi maqsat etedi. Sondıqtan biz bar küş-jigerimizdi bir jerge şoğırlandırudı wsınamız. Qwrılıs jügizuşilermen, jergilikti äkimdikpen, Twrğın üy qwrılısına kepildik beru qorımen birlesip jwmıs jürgize otırıp, halıqtı qoljetimdi twrğın üymen qamtamasız etemiz, jalpı aymaqtağı twrğın üy qwrılısı narığınıñ damuına kömektesemiz», - dedi TÜQJB Soltüstik Qazaqstan oblısı filialınıñ direktorı Rayhan Äbdirahmanova.

Soltüstik Qazaqstan oblısındağı qwrılıs kompaniyalarınıñ ökilderine «Twrğın üy qwrılısına kepildik beru qorı» AQ kepildik beru departamentiniñ jetekşisi Jañıl Sayaqova kepildik beru mehanizmi, qwrılıstıñ ayaqtalu kezeñinde kepildik alu sheması, qwjattar tapsıru tärtibi turalı aytıp berdi. Sonımen qatar şara qatısuşıları ülestik qwrılıs narığı üşin mañızı joğarı jañalıqtı birinşi bolıp bildi.

«Twrğın üy qwrılısına kepildik beru qorı» AQ osı aptada «Kepildikti jarna mölşerlemesin anıqtau ädistemesine» engizilgen özgeristerdiñ memlekettik tirkeuden ötu räsimi ayaqtaladı dep kütip otır. Ol özgerister bağalaudıñ skoringtik modeli boyınşa 60 jäne odan joğarı wpay jinağan jağdayda barlıq qwrılıs jürgizuşileri üşin kepildikti jarna mölşerlemesin 2% deñgeyinde bekitudi qarastıradı. Bwl qarjılıq jäne üş sapalıq körsetkiş boyınşa 60 jäne odan joğarı wpay jinağan qwrılıs jürgizuşi kepildikti jarnanı osığan deyin qoldanısta bolğan 2-6% aralığında emes, joba qwnınıñ 2%-na teñ kölemde töleytinin bildiredi», - dedi Jañıl Sayaqova.

Twrğın üy qwrılıs jinaq banki, qwrılıs jürgizuşiler jäne Twrğın üy qwrılısına kepildik beru qorınıñ birlesken jobaları qazirdiñ özinde basqa qalalarda jüzege asırıluda. Mäselen, Qarağandıda ıntımaqtastıq turalı üşjaqtı kelisimge qol qoyıldı, al Astanada ülestik qwrılıs jobası boyınşa ötinişter qabıldau bastalıp ketti. TÜQJB salımşılarına «Millenium Park-2» twrğın üy keşeninen 100 päter wsınılıp otır. Ötinişterdi qabıldaudıñ alğaşqı 23 küninde ülestik qwrılıs qatısuşısı atanıp, tömendetilgen bağamen päter satıp aluğa 486 adam niet bildirgen.

“The Qazaq Times”