Türkistan qalasında «Öñirlerdi damıtu» bağdarlaması boyınşa salınğan 5 qabattı 8 üy paydalanuğa berildi. Baspana kezeginde twrğan äleumettik az qamtamasız etilgen otbasılar men mügedekter jäne jalğız bastı analar sındı 480 otbası baspanalı boldı, dep habarladı Oñtüstik Qazaqstan oblısınıñ baspasöz qızmeti.

Jañadan boy kötergen «Otırar» şağın audanındağı twrğındarğa päter kiltin Oñtüstik Qazaqstan oblısınıñ äkimi Janseyit Tüymebaev tabıs etti.

Äkimdiktiñ mälimetinşe, 2016 jılı atalğan şağın audanda 120 päterdi qwraytın 2 üy jäne Qazaqstannıñ ipotekalıq kompaniyası esebinen 144 päter paydalanuğa berilgen. Al 480 päterdi qwraytın köpqabattı segiz üy «Öñirlerdi damıtu» bağdarlaması boyınşa oblıs byudjetinen bölingen 3 mlrd 109 mln teñge qarjığa salınğan. Endi osında  qonıstanğan otbasılardıñ balaları üşin qazirgi künde balabaqşa, mektep mäselesin şeşu qarastırılıp jatır eken.

Sonımen qatar, qaladağı 5 mıñğa juıq azamattardıñ twrğın üyge degen swranısın qanağattandıru maqsatında «Otırar» şağın audanınan «Qazaqstan ipotekalıq kompaniyası» arqılı tağı da 6 üydiñ qwrılısı jürgizilmek. Keler jılı josparlanğan 20 köpqabattı twrğın üy salınsa, odan bölek 150 kottedj salınbaq.

“The Qazaq Times”