تۇرعىن ءۇي قۇرىلىس جيناق بانكى پەتروپاۆل قۇرىلىسشىلارىمەن ىنتىماقتاستىق ورناتپاق

پەتروپاۆل قالاسىندا «بايتەرەك» حولدينگىنىڭ ەنشىلەس ۇيىمدارى «قازاقستاننىڭ تۇرعىن ءۇي قۇرىلىس جيناق بانكى» اق مەن «تۇرعىن ءۇي قۇرىلىسىنا كەپىلدىك بەرۋ قورى» اق سولتۇستىك قازاقستان وبلىسىنداعى قۇرىلىس جۇرگىزۋشىلەرمەن جانە جەرگىلىكتى اتقارۋشى ورگان وكىلدەرىمەن كەزدەستى. تاراپتار بىرلەسىپ ىنتىماقتاستىق ورناتۋ ماسەلەلەرىن تالقىلادى.

قازىر تۇرعىن ءۇي قۇرىلىس جيناق بانكىندە ايماقتىڭ 30 000 تۇرعىنى ءۇي الۋ ءۇشىن اقشا جيناپ جاتىر. ولارعا تيەسىلى جالپى دەپوزيت قورجىنى 12,4 ملرد تەڭگەنى قۇرايدى. سالىمشىلاردىڭ بارلىعى باعاسى اسا قىمبات ەمەس، بىراق ساپالى ءۇي الۋدى جوسپارلاپ وتىر، ال بانك بۇل جولدا ولارعا كومەكتەسۋدى ماقسات ەتەدى. سوندىقتان ءبىز بار كۇش-جىگەرىمىزدى ءبىر جەرگە شوعىرلاندىرۋدى ۇسىنامىز. قۇرىلىس جۇگىزۋشىلەرمەن، جەرگىلىكتى اكىمدىكپەن، تۇرعىن ءۇي قۇرىلىسىنا كەپىلدىك بەرۋ قورىمەن بىرلەسىپ جۇمىس جۇرگىزە وتىرىپ، حالىقتى قولجەتىمدى تۇرعىن ۇيمەن قامتاماسىز ەتەمىز، جالپى ايماقتاعى تۇرعىن ءۇي قۇرىلىسى نارىعىنىڭ دامۋىنا كومەكتەسەمىز»، - دەدى تۇقجب سولتۇستىك قازاقستان وبلىسى فيليالىنىڭ ديرەكتورى رايحان ءابدىراحمانوۆا.

سولتۇستىك قازاقستان وبلىسىنداعى قۇرىلىس كومپانيالارىنىڭ وكىلدەرىنە «تۇرعىن ءۇي قۇرىلىسىنا كەپىلدىك بەرۋ قورى» اق كەپىلدىك بەرۋ دەپارتامەنتىنىڭ جەتەكشىسى جاڭىل ساياقوۆا كەپىلدىك بەرۋ مەحانيزمى، قۇرىلىستىڭ اياقتالۋ كەزەڭىندە كەپىلدىك الۋ سحەماسى، قۇجاتتار تاپسىرۋ ءتارتىبى تۋرالى ايتىپ بەردى. سونىمەن قاتار شارا قاتىسۋشىلارى ۇلەستىك قۇرىلىس نارىعى ءۇشىن ماڭىزى جوعارى جاڭالىقتى ءبىرىنشى بولىپ ءبىلدى.

«تۇرعىن ءۇي قۇرىلىسىنا كەپىلدىك بەرۋ قورى» اق وسى اپتادا «كەپىلدىكتى جارنا مولشەرلەمەسىن انىقتاۋ ادىستەمەسىنە» ەنگىزىلگەن وزگەرىستەردىڭ مەملەكەتتىك تىركەۋدەن ءوتۋ ءراسىمى اياقتالادى دەپ كۇتىپ وتىر. ول وزگەرىستەر باعالاۋدىڭ سكورينگتىك مودەلى بويىنشا 60 جانە ودان جوعارى ۇپاي جيناعان جاعدايدا بارلىق قۇرىلىس جۇرگىزۋشىلەرى ءۇشىن كەپىلدىكتى جارنا مولشەرلەمەسىن 2% دەڭگەيىندە بەكىتۋدى قاراستىرادى. بۇل قارجىلىق جانە ءۇش ساپالىق كورسەتكىش بويىنشا 60 جانە ودان جوعارى ۇپاي جيناعان قۇرىلىس جۇرگىزۋشى كەپىلدىكتى جارنانى وسىعان دەيىن قولدانىستا بولعان 2-6% ارالىعىندا ەمەس، جوبا قۇنىنىڭ 2%-نا تەڭ كولەمدە تولەيتىنىن بىلدىرەدى»، - دەدى جاڭىل ساياقوۆا.

تۇرعىن ءۇي قۇرىلىس جيناق بانكى، قۇرىلىس جۇرگىزۋشىلەر جانە تۇرعىن ءۇي قۇرىلىسىنا كەپىلدىك بەرۋ قورىنىڭ بىرلەسكەن جوبالارى قازىردىڭ وزىندە باسقا قالالاردا جۇزەگە اسىرىلۋدا. ماسەلەن، قاراعاندىدا ىنتىماقتاستىق تۋرالى ۇشجاقتى كەلىسىمگە قول قويىلدى، ال استانادا ۇلەستىك قۇرىلىس جوباسى بويىنشا وتىنىشتەر قابىلداۋ باستالىپ كەتتى. تۇقجب سالىمشىلارىنا «Millenium Park-2» تۇرعىن ءۇي كەشەنىنەن 100 پاتەر ۇسىنىلىپ وتىر. وتىنىشتەردى قابىلداۋدىڭ العاشقى 23 كۇنىندە ۇلەستىك قۇرىلىس قاتىسۋشىسى اتانىپ، تومەندەتىلگەن باعامەن پاتەر ساتىپ الۋعا 486 ادام نيەت بىلدىرگەن.

“The Qazaq Times”