Taldıqorğan qalasında twrğın üy kezeginde twrğandar men «Twrğın üy qwrılıs jinaq banki» AQ-nıñ salımşılarına jaña köpqabattı üylerdiñ 168 päteri berildi. Memlekettik «Nwrlı jol» bağdarlamasımen salınğan nesielik twrğın üylerdiñ kiltin oblıs äkimi Amandıq Batalov pen «Qazaqstannıñ Twrğın üy jinaq banki» AQ Basqarma törayımı Läzzat Ibragimova tabıstadı, dep habarlaydı Almatı oblısı äkiminiñ baspasöz qızmeti.

Qonıs ielerin qwttıqtağan oblıs äkimi A. Batalov Taldıqorğan qalasın damıtudıñ josparına, sonıñ işinde 7-şağın audanda salınatın qwrılıs nısandarına qısqaşa toqtalıp, jaña baspanalarına qwttı bolsın ayttı. «Qazaqstannıñ Twrğın üy qwrılıs jinaq banki» AQ Basqarma törayımı Läzzat Ibragimova jeke twrğın üy qwrılısın damıtu turalı özara ıntımaqtastıq memorandumına qol qoydı.

L. Ibragimovanıñ aytuınşa, «Nwrlı jer» bağdarlaması şeñberinde qos tarap kelisimi boyınşa jıl soñına deyin Taldıqorğanda banktiñ qatısuımen kottedjdi qalaşıqta 48 jer üy salınıp, paydalanuğa beriledi dep josparlanıp otır. Al mwnan keyingi eki jıl işinde osınday jeke twrğın üyler sanın 600-ge jetkizu mejelengen.

Oblıs äkimdiginiñ mälimetinşe, «Twrğın üy qwrılıs jinaq banki» AQ Öñirlerdi damıtudıñ 2020 jılğa deyingi bağdarlaması şeñberinde oblısta 74,1 mıñ şarşı metr twrğın üy salğan. Sonıñ işinde «Twrğındardıñ barlıq sanatına arnalğan twrğın üy» bağıtı boyınşa 41,1 mıñ şarşı metrlik 12 üy nemese 609 päter salınsa, «Jas otbasılarğa arnalğan twrğın üy» bağıtı boyınşa 33 mıñ şarşı metrlik 7 üy nemese 593 päter paydalanuğa berilgen. Jalpı 2017 jılı 6 üy salu josparlansa, sonıñ 4-eui Taldıqorğanda bolmaq.

“The Qazaq Times”