Foto: bbc.com

Twtqın küyinde ölim qwşqan Qıtaylıq jazuşı, Nobel' sıylığınıñ iegeri L'yu Şiyaubonıñ jerleu räsiminen keyin iz-tüssiz joğalıp ketken äyeli Lyu Sya Youtube jelisine 1 minuttıq beynejazba jariyaladı. Bwl turalı APF aqparattıq agenttigi jazdı. 

Beynejazbada Lyu Sya jağdayı jaqsı ekenin, auır qazadan keyin küyzeliske tüskendikten, jalğız qalğısı keletinin jetkizgen. Özin izdep jatqan dostarı men jaqındarına qazir em qabıldap jatqanın, qalıptı ömirge qayta oralğan soñ, üyine qaytatının aytqan. Beynejazbanıñ geolokaciyası men avtorı körsetilmegen.

15 şilde küni küyeuiniñ jerleu räsiminen keyin Lyu Sya joğalıp ketip edi. Onıñ qorğauşısı Djared Senser BWW-ğa joldağan hatında, onıñ joğalıp ketuine Qıtay Ükimetin ayıptap, bilikten Lyu Syanıñ tiri ne öli ekendigi turalı aşıq aqparat taratuın jäne qoldı bolğan azamatşanı densaulığına zardap keltirilmegen küyde, janwyası men qorğauşısına qaytaruın talap etken edi.

Lyu Syanıñ ömirlik jarı L'yu Şiyaubo Qıtayda köppartiyalıq jüye ornağanın qoldaytın erkin oyları üşin 2009 jılı 11 jılğa türmege jabılğan belgili publicist, qwqıq qorğau qızmetkeri. 2011 jılı Nobel' sıylığınıñ  komiteti onı "Qıtaydağı adam qwqıqtarı üşin jalğız küresker"  dep tauıp, oğan beybitşilik ornatu jolındağı eñbegi üşin beriletin jüldeni sırttay tabıstadı. Öytkeni bwl äreketi üşin Nobel' sıylığınıñ komitetin qatañ sınğa alğan Qıtay Ükimeti joldanğan resmi hattar men ötinişterge qaramastan, onı marapattau räsimine jibergen joq.  Sol uaqıttan beri onıñ äyeli Lyu Sya da, eşqanday ayıp tağılmastan, üy qamağına alınğan bolatın.

Lyu Syanıñ otbasılıq dosı H'yu Czya bwl beynejazbanı jariyalauğa memleket mäjbürlegen dep esepteydi. Ol sonşa jıl jazıqsız, eşqanday kinä tağılmastan jäne jazası sotta kesilmesten üy qamağında otırğan, memlekettiñ qatañ baqılauındağı azamatşanıñ Qıtayda tıyım salınğan Youtube jelisine beynejazba jariyalağanınan bilik habarsız degenge senbeytinin jetkizdi.

Belgili jazuşınıñ qaterlik isikke şaldığıp, şetelge emdeluge baru turalı ötiniş qanağattandırmağan Qıtay Ükimeti älemdik qauımdastıq tarapınan ülken narazılıqqa tap bolıp edi. Sol dertinen osı jıldıñ 13 şildesinde köz jwmğan L'yu Şiyaubo men onıñ äyeline qatıstı barlıq derekter älem jwrtşılığınıñ jiti nazarında bolıp keldi.

Qoğam qayratkerleri joğalıp ketken Lyu Syanıñ özin izdemeudi ötinip joldağan beynejazbasın Ükimettiñ özine älem tarapınan körsetilgen qısımğa qarsı jasağan äreketi jäne ayıptı özderinen alıp tastauğa degen talpınısı dep bağaladı.

“The Qazaq Times”