Foto: Nur.kz

Endi qazaqstandıq därigerler käsibi türde qatelesken jağdayda jarna töleui mümkin. Densaulıq saqtau ministrligi  osınday zañ normaların engizudi josparlap otır. Bwl turalı Densaulıq saqtau vice-ministri Aleksey Coy "Medicina qızmetkerleriniñ käsibi jauapkerşiligine kepildik beru mäseleleri jönindegi QR keybir zañ aktilerine özgerister men tolıqtırular engizu turalı" zañ jobasın tanıstıru kezinde mälimdedi.

"Jarna boyınşa Qazaqstan aktuarileri (saqtandıru jarnasın esepteuşi maman - red.) esep jürgizdi. Ortaşa bazalıq mölşerleme därigerlerdiñ käsibi därejesine baylanıstı belgilenedi. Mısalı däriger-hirurg emdeu kezinde qate jiberse jılına 44 mıñ teñge şamasında jarna töleydi. Al medqızmetkerler bwl somanı töleuge dayın. Sebebi mwnday jağdayda olarda pacientti emdeude jauapkerşilik  jäne pacientterge eşqanday ziyan keltirmeuge kepildik boladı", - dedi Aleksey Coy.

Sonday-aq, Aleksey Coydıñ sözinşe, ministrlik ötemaqı somasın da naqtılaudı josparlap otır. YAğni eger nauqas därigerdiñ qateliginen üşinşi toptağı mügedek bolıp qalsa oğan 500 AEK tölenedi (2017 jılğı AEK - 2269 teñge). Bwl şamamen 1,134 mln teñge.

Sonday-aq, ministrliktiñ aldın ala jasalğan esebi boyınşa  däriger qateliginen pacient qaytıs bolğan jağdayda 1000 AEK köleminde ötemaqı berilui mümkin.

Al medicinalıq qatelerdi anıqtau akkredittelgen täuelsiz sarapşılardan twratın saraptama komissiyasınıñ qatısuımen jürgiziledi.

“The Qazaq Times”