Qızılorda oblısında oba dertiniñ taralu qaupi joq

QR Densaulıq saqtau ministrliginde jağdaydıñ tolıq baqılauğa alınıp, qauipti aymaqtı zalalsızdandıru jwmıstarı jürgizilip jatqanın jetkizdi. 

Esteriñizge sala keteyik, 29 mausım küni Bayqoñırdan 12 km qaşıqtıqtağı aumaqta jändikter men kemirgişterde oba derti anıqtalğan bolatın. Osı oqiğadan keyin  äleumettik jelilerde bas därigerdiñ ekpe jwmıstarın wyımdastıruğa  qatıstı tapsırması jazılğan hat keñinen taralıp, el işinde alañdauşılıq tudırğan edi. Tabiği aymaqqa jaqın mañda Bayqoñır qalasın auız sumen qamtamasız etip otırğan "Levoberejnıy" su qoyması bolğandıqtan, mekeme basşılığına 34 qızmetkerge ekpe jürgizuge tapsırma berildi.

Qızılorda oblıstıq obağa qarsı küres stanciyasınıñ  basşısı Alma Matjanova atalğan hattıñ äleumettik jelige qalay tap bolğanın bilmeydi jäne kinälini tabudı qwqıq qorğau organdarı qızmetkerlerine tapsıruğa bel baylap otır.

Qazirgi uaqıtta Qızılorda oblıstıq obağa qarsı küres stanciyasınıñ Josalı audandıq bölimşesiniñ  qızmetkerleri tört şaqırım aumaqtı dezinfekciyalaudan ötkizip, halıq arasında sanitarlıq-ağartu, tüsindiru jwmıstarın jürgizip jatır.

QR Densaulıq saqtau ministrliginiñ qoğamdıq densaulıqtı saqtau komiteti laboratoriyalıq zertteu nätijesinde  14 kemirgiş pen ülken qwmtışqannan oba auruınıñ belgileri tabılğanın mälimdedi. Derekke säykes, üy januarları men oblıs twrğındarınıñ arasında oba derti tirkelmegen.

Atap ötu kerek, obağa qarsı profilaktikalıq jwmıstar -  jıl sayın jürgiziletin qalıptı qwbılıs. Qazaqstanda obanıñ tabiği oşaqtarı 8 oblısta bar: Aqtöbe, Atırau, Almatı, Jambıl, BQO, Qızılorda, Mañğıstau, OQO, Qarağandı, ŞQO. Bwl oblıstarda obağa qarsı küres stanciyaları jwmıs isteydi jäne jıl sayın oba dertiniñ qozdırğışına monitoring jürgiziledi. Elimizde oba derti soñğı ret 2003 jılı tirkelgen.

“The Qazaq Times”