قىزىلوردا وبلىسىندا وبا دەرتىنىڭ تارالۋ قاۋپى جوق

قر دەنساۋلىق ساقتاۋ مينيسترلىگىندە جاعدايدىڭ تولىق باقىلاۋعا الىنىپ، قاۋىپتى ايماقتى زالالسىزداندىرۋ جۇمىستارى جۇرگىزىلىپ جاتقانىن جەتكىزدى. 

ەستەرىڭىزگە سالا كەتەيىك، 29 ماۋسىم كۇنى بايقوڭىردان 12 كم قاشىقتىقتاعى اۋماقتا جاندىكتەر مەن كەمىرگىشتەردە وبا دەرتى انىقتالعان بولاتىن. وسى وقيعادان كەيىن  الەۋمەتتىك جەلىلەردە باس دارىگەردىڭ ەكپە جۇمىستارىن ۇيىمداستىرۋعا  قاتىستى تاپسىرماسى جازىلعان حات كەڭىنەن تارالىپ، ەل ىشىندە الاڭداۋشىلىق تۋدىرعان ەدى. تابيعي ايماققا جاقىن ماڭدا بايقوڭىر قالاسىن اۋىز سۋمەن قامتاماسىز ەتىپ وتىرعان "لەۆوبەرەجنىي" سۋ قويماسى بولعاندىقتان، مەكەمە باسشىلىعىنا 34 قىزمەتكەرگە ەكپە جۇرگىزۋگە تاپسىرما بەرىلدى.

قىزىلوردا وبلىستىق وباعا قارسى كۇرەس ستانتسياسىنىڭ  باسشىسى الما ماتجانوۆا اتالعان حاتتىڭ الەۋمەتتىك جەلىگە قالاي تاپ بولعانىن بىلمەيدى جانە كىنالىنى تابۋدى قۇقىق قورعاۋ ورگاندارى قىزمەتكەرلەرىنە تاپسىرۋعا بەل بايلاپ وتىر.

قازىرگى ۋاقىتتا قىزىلوردا وبلىستىق وباعا قارسى كۇرەس ستانتسياسىنىڭ جوسالى اۋداندىق بولىمشەسىنىڭ  قىزمەتكەرلەرى ءتورت شاقىرىم اۋماقتى دەزينفەكتسيالاۋدان وتكىزىپ، حالىق اراسىندا سانيتارلىق-اعارتۋ، ءتۇسىندىرۋ جۇمىستارىن جۇرگىزىپ جاتىر.

قر دەنساۋلىق ساقتاۋ مينيسترلىگىنىڭ قوعامدىق دەنساۋلىقتى ساقتاۋ كوميتەتى لابوراتوريالىق زەرتتەۋ ناتيجەسىندە  14 كەمىرگىش پەن ۇلكەن قۇمتىشقاننان وبا اۋرۋىنىڭ بەلگىلەرى تابىلعانىن مالىمدەدى. دەرەككە سايكەس، ءۇي جانۋارلارى مەن وبلىس تۇرعىندارىنىڭ اراسىندا وبا دەرتى تىركەلمەگەن.

اتاپ ءوتۋ كەرەك، وباعا قارسى پروفيلاكتيكالىق جۇمىستار -  جىل سايىن جۇرگىزىلەتىن قالىپتى قۇبىلىس. قازاقستاندا وبانىڭ تابيعي وشاقتارى 8 وبلىستا بار: اقتوبە، اتىراۋ، الماتى، جامبىل، بقو، قىزىلوردا، ماڭعىستاۋ، وقو، قاراعاندى، شقو. بۇل وبلىستاردا وباعا قارسى كۇرەس ستانتسيالارى جۇمىس ىستەيدى جانە جىل سايىن وبا دەرتىنىڭ قوزدىرعىشىنا مونيتورينگ جۇرگىزىلەدى. ەلىمىزدە وبا دەرتى سوڭعى رەت 2003 جىلى تىركەلگەن.

“The Qazaq Times”