Aytısker aqın Däuletkerey Käpwlı. Foto: The Qazaq Times.

Qayıñ sauğan qazaq edim, Altay – atamekenim,

Tağdır mağan wsınbağan balı menen şekerin.

Iranda da ilanbadım, basqa tüsken tağdırğa,

Jüregimdi bauramadı böten äuen, böten ün.

Parij benen Germaniya, Ombıda da qazaqpın,

Şartaraptan tapqan edim jwmır bastıñ jetegin.

Ayağımdı añdıp bastım qiya-qwzda, mwzdaqta,

Tik basatın saqtığınday şıñdağı tautekeniñ.

 

Nükistegi Tölegenniñ sağınışı em sarğayğan,

Qayda jürsem qazaqtığım – jürektegi qan maydan.

Kökmoynaqpen Türikpenniñ tügel şarlap dalasın,

Besqala men Qoja elindey qol bwlğadım şalğaydan.

Qırğız benen Qırım astım, ädiletsiz uaqıtta,

Sarıarqanıñ bal qımızı tamsandırıp tañdaydan.

Ölekşindey ömir keşu – namısıma qiyanat,

Al, tağdırım sipamağan tayqı tuğan mañdaydan!

 

Aqıt qajı, Ospan edim, Altaydağı aq boran,

Qarsı kelgen ajalğa da qas-kirpigin qaqpağan.

Gimalayda kiiz tösep tüyetaylı asuğa,

Taklamakan şölinde de janğa daua tappağan.

Käşmirge de jetken köşpin Elishannıñ jolımen,

Dünieniñ bwrışında däm bar ma men tatpağan?!

Atajwrttan kindik üzip, wrpağımnıñ qamı üşin,

Tağdır keştim, kişigirim – şwbırındı aqtaban!

 

Qazaq üşin qayda jürsem qaytalaumen dwğamdı,

Halifa Altay bop oraldım qazaqşalap Qwrandı.

Öztüriktiñ Mwstafası em, jatqa namıs bermegen,

Künderde de adaspadım nayzağaylı, twmandı.

Än bop estim Mayra salğan jürekterdi tebirentip,

Atam keşken ğwmırdı oylap, janım jasqa şılandı.

Beybarıstay jusan añsap, jıraqta ösken qozıñmın,

Añsağanım – Qıpşaq dalam, qwt twğırım – Twran-dı!

 

Men bayırğı qazaq edim Bay-Ölkede baptalğan,

Ümitimdi üzbegenmin araylanğan aq tañnan.

«Jalamanıñ jalasınan» äupirimdep jan qalıp,

Tiri soyğan twlıbım da Kunskamerada saqtalğan.

Bostandıqtıñ ruhına besigimde talpınıp,

Qasqırdayın sirağımdı şaynap üzip qaqpannan.

Elge äkelgen Qarjaubaymın Külteginniñ köktasın,

Tañdayımda balday erip, Wltqa degen tätti arman!

 

Qwdaymenen aramızğa aq tilekti elşi etip,

Eşkimge de bas imegen ör qazaqpın, eñse tik,

Kökserkesi sekildenip tu-talaqay kökpardıñ,

Jalğandağı ğwmırımdı qaysarlıqpen ölşetip.

Qazaqstan – jüregime boytwmarday jazılğan,

Tarıdayın şaşıludı ömirime enşi etip.

Atameken, sağan jetip köz jasımdı qwrğattım,

Kök Täñiri közimizge kök bayraqtı körsetip!

 

Altınordam künnen künge qwlpınayday qwlpıra,

Tarlanbozım taqımımda, tizginimdi qımqıra.

Bar qazaqqa qwttı bolsın, sauın aytqan qwrıltay,

Kök bayraqtıñ qıran wşqan biigine wmtıla.

Täñirime täuba aytumen dwğa qıldım, bas iip,

Atajwrtqa jetpey qalğan bozdaqtardıñ ruhına.

«Elim-aydıñ» zarın endi qwlağıma estirtpe,

Elbasımen bolaşaqqa qadam basqan jwrtıma!

 

Uay, Nwrağa, qazaq üşin adamzattıñ asılı,

Astanası – Altınorda, Iranbaqtıñ jasılı.

Künge qwlaş sermep tuğan Külteginniñ qılışı,

Sarı altınnan sauıt kigen Saq pen Ğwnnıñ has wlı.

Älemdegi bar qandastıñ ıqılasın qabıl al,

Atajwrtta basın qosqan aq jürektiñ şaşuı.

Qayta örlegen qazağıma kök Täñiri quat ber,

Jasay bersin, jaynay bersin Qazaqstan ğasırı!

“The Qazaq Times”