Foto: forbes.kz

Bwrınğı Wlttıq ekonomika ministri Quandıq Bişimbaevtıñ qamau merzimi tağı bir ayğa sozıldı. Endi ol 2017 jıldıñ 10 şildesine deyin qamauda boladı. Bwl turalı "Qazaqparat" Astana sotınıñ baspasöz hatşısı Botagöz Bayanovağa silteme jasap habarladı.

"Astana qalası Almatı audanınıñ №2 audandıq sotı küdikti Quandıq Uälihanwlı Bişimbevtıñ qamau merzimin 2017 jıldıñ 10 şildesine deyin sozu turalı şeşim qabıldadı", - dep keltiredi aqparat agenttigi Bayanovanıñ sözin.

Ayta keteyik, bwrınğı Wlttıq ekonomika ministri Quandıq Bişimbaev osı jıldıñ 10 qañtarında qamauğa alınğan. Sıbaylas jemqorlıqqa qarsı is-qimıl wlttıq byurosınıñ ökilderiniñ aqparatına süyensek,ol  top bolıp, aldın ala kelisim jasau arqılı asa iri kölemde birneşe ret para alğan. Zañsız alğan qarajattı Bişimbaev öz qajetine jaratqan. Keyinirek Qızılordadağı äynek zauıtın salu kezinde 1 mlrd teñge jımqırğan degen küdikke ilingeni habarlandı.

“The Qazaq Times”