Qazaqstannıñ Şığıs öñirindegi Qatonqarağay audanında qarımdı qalamger marqwm Didahmet Äşimhanwlına eskertkiş qoyıldı.

Biıl jazuşınıñ tuğanına 70 jıl toluına oray tuğan jerinde arnayı saltanattı jiın ötti.  Belgili qalamgerdiñ wlı, qoğam belsendisi Däulet Äşimhannıñ bastamasımen ötken şarada wlt prezenti Didağañnıñ ruhına arnap eske alu äri merekelik şara wyımdastırıldı.

Bes jıl bwrın 64 jasında dünieden ozğan jazuşı 1950 jılı 10 mausımda Şığıs Qazaqstan oblısı, Qatonqarağay audanı, Jañaülgi auılında düniege kelgen.

Qazirgi QazWU, sol kezdegi Qazaq Memlekettik universitetiniñ jurnalistika fakul'tetin tämamdağan D.Äşimhanwlı eñbek jolın Şığıs Qazaqstan oblısı «Kommunizm tuı» (1975–1976), «Leninşil jas» (1978) gazetterinde tilşi bolıp bastağan. Keyin «Qazaqstan pioneri» (qazirgi «Wlan») (1978–1980), «Qazaq ädebieti» (1980–1992) gazetterinde bölim meñgeruşisi, «Zaman-Qazaqstan» (1992–1994) gazetinde bas redaktordıñ orınbasarı, 1994 jılı halıqaralıq «Türkistan» gazetinde bas redaktordıñ orınbasarı qızmetterin atqarğan.

«El-şejire» qoğamdıq  qorınıñ prezidenti jäne  «Alaş» baspasınıñ direktorı qızmetin atqardı.

«Aqqabanıñ tolqını» (1981), «On birinşi küz» (1987), «Kamennaya pad'» (1990), «Jer añsağay sarı atan» (1998), «Samırsın sazı» (2000), «Äñgime emes äñgimeler» attı äñgimeler men povester jinaqtarınıñ avtorı.

Şığarmaları özbek, qırğız, qıtay, moñğol, orıs, ukrain, mari tilderine audarılğan. Sonday-aq, A. Kurçatkin, T. Minulmen, A. Aşirov, H. Abdullin, P. Purzveru  şığarmaların qazaq tiline audarğan.

Qazaqstan Respublikasınıñ Jazuşılar jäne Jurnalister odağınıñ müşesi, Respublikalıq «Jalın» jabıq bäygesiniñ eki märte jüldegeri. 2005 jılı halıqaralıq «Alaş» sıylığınıñ iegeri atanğan.

"The Qazaq Times"