قالامگەر مەرەيتويى: ديداحمەت ءاشىمحانۇلىنا ەسكەرتكىش ورناتىلدى

قازاقستاننىڭ شىعىس وڭىرىندەگى قاتونقاراعاي اۋدانىندا قارىمدى قالامگەر مارقۇم ديداحمەت ءاشىمحانۇلىنا ەسكەرتكىش قويىلدى.

بيىل جازۋشىنىڭ تۋعانىنا 70 جىل تولۋىنا وراي تۋعان جەرىندە ارنايى سالتاناتتى جيىن ءوتتى.  بەلگىلى قالامگەردىڭ ۇلى، قوعام بەلسەندىسى داۋلەت ءاشىمحاننىڭ باستاماسىمەن وتكەن شارادا ۇلت پرەزەنتى ديداعاڭنىڭ رۋحىنا ارناپ ەسكە الۋ ءارى مەرەكەلىك شارا ۇيىمداستىرىلدى.

بەس جىل بۇرىن 64 جاسىندا دۇنيەدەن وزعان جازۋشى 1950 جىلى 10 ماۋسىمدا شىعىس قازاقستان وبلىسى، قاتونقاراعاي اۋدانى، جاڭاۇلگى اۋىلىندا دۇنيەگە كەلگەن.

قازىرگى قازۇۋ، سول كەزدەگى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن تامامداعان د.ءاشىمحانۇلى ەڭبەك جولىن شىعىس قازاقستان وبلىسى «كوممۋنيزم تۋى» (1975–1976), «لەنينشىل جاس» (1978) گازەتتەرىندە ءتىلشى بولىپ باستاعان. كەيىن «قازاقستان پيونەرى» (قازىرگى «ۇلان») (1978–1980), «قازاق ادەبيەتى» (1980–1992) گازەتتەرىندە ءبولىم مەڭگەرۋشىسى، «زامان-قازاقستان» (1992–1994) گازەتىندە باس رەداكتوردىڭ ورىنباسارى، 1994 جىلى حالىقارالىق «تۇركىستان» گازەتىندە باس رەداكتوردىڭ ورىنباسارى قىزمەتتەرىن اتقارعان.

«ەل-شەجىرە» قوعامدىق  قورىنىڭ پرەزيدەنتى جانە  «الاش» باسپاسىنىڭ ديرەكتورى قىزمەتىن اتقاردى.

«اققابانىڭ تولقىنى» (1981), «ون ءبىرىنشى كۇز» (1987), «كامەننايا پاد» (1990), «جەر اڭساعاي سارى اتان» (1998), «سامىرسىن سازى» (2000), «اڭگىمە ەمەس اڭگىمەلەر» اتتى اڭگىمەلەر مەن پوۆەستەر جيناقتارىنىڭ اۆتورى.

شىعارمالارى وزبەك، قىرعىز، قىتاي، موڭعول، ورىس، ۋكراين، ماري تىلدەرىنە اۋدارىلعان. سونداي-اق، ا. كۋرچاتكين، ت. مينۋلمەن، ا. اشيروۆ، ح. ابدۋللين، پ. پۋرزۆەرۋ  شىعارمالارىن قازاق تىلىنە اۋدارعان.

قازاقستان رەسپۋبليكاسىنىڭ جازۋشىلار جانە جۋرناليستەر وداعىنىڭ مۇشەسى، رەسپۋبليكالىق «جالىن» جابىق بايگەسىنىڭ ەكى مارتە جۇلدەگەرى. 2005 جىلى حالىقارالىق «الاش» سىيلىعىنىڭ يەگەرى اتانعان.

"The Qazaq Times"