Almatı oblısı Qonaev qalalıq sotında agro sarapşı, qoğam belsendisi Almasbek Sadırbay men basqa da ayıptaluşılarğa qatıstı ötip jatqan atışulı sot procesinen tağı da «şu» şıqtı. 19 mausım küngi sot otırısında qorğau tarabı sud'ya Nwrswltan Qoyşıbaevqa resmi türde kezekti qarsılıqtı (otvod) jariyaladı. Sot zalında qorğau tarabı qılmıstıq is tomdarınıñ qoldan jasaluı (fal'sifikaciya), qwjattardıñ jasırıluı jäne ayıptaluşını zañsız qamauda wstau turalı auır ayıptaular aytıldı.

187 tomnıñ jwmbağı: Naqtı dälelder sottan jasırıldı ma?

Sot zalında alğaşqı bolıp söz alğan sottaluşı Almasbek Sadırbay Qonaev qalalıq sotınıñ törağası Sadvakasovanıñ atına tikeley mälimdeme jasadı. Ol qolındağı resmi qwjattı — Almatı oblısı prokurorı orınbasarınıñ isti sotqa joldağan ilespe hatın körsetti.

«Bwl resmi qwjatta istiñ naqtı neşe tom ekeni müldem körsetilmegen. Qazir sot üstelinde 187 tom jatır, al bizge (qorğau tarapına) tergeuden tek 182 tom ğana berilgen. Aradağı 5 tom qaydan şıqtı?

Eñ soraqısı — bwl jerde meniñ jäne özge de sottaluşılardıñ kinäsizdigin däleldeytin 160 tomdıq zañdıq (yuridikalıq) ister men 300 tomnan astam buhgalterlik qwjattar sotqa müldem ötkizilmegen. Olar sot qarauında joq. Sotqa istiñ tek ayıptau nwsqasına tiimdi böligi ğana jiberilgen. Bwl — taza jauapkersizdik  nemese sanalı türde jasalğan fal'sifikaciya!» — dep mälimdedi qamaudağı Almasbek Sadırbay mırza.

Bwl uäjdi advokat Anara Qwsayınova da qoldap, is boyınşa zattay däleldemeler men qwjattar salınğan 9 jarım qoraptıñ tergeu sotı kezeñinen beri jasırılıp kelgenin, bwl boyınşa oblıs prokurorınıñ jeke qabıldauında da bolğanın jetkizdi.

Sensaciyalıq mälimdeme: Almasbek Sadırbay sot sankciyasınsız qamauda otır ma?

Advokat Qwsayınova sot törağasınıñ nazarın audarğan eñ mañızdı qwqıqtıq zañ bwzuşılıq — sottaluşını qamauda wstau merziminiñ zañsızdığı boldı. Advokattıñ qolında Bas prokuraturanıñ Qwqıqtıq statistika jäne arnayı esepke alu jönindegi komitetinen alınğan resmi jauap bar.

«Komitettiñ resmi jauabına say, jaña ayıptau aktisi bekitilgen bwl qılmıstıq is sotqa tek 2026 jıldıñ 20 naurızında sağat 16:32-de elektrondı jüye arqılı tüsken. Olay bolsa, sud'ya Qoyşıbaev bwl isti 18 naurızda qalay öz öndirisine alıp, 19 naurızda Sadırbaydı qamauda wstau şarasın qalay wzartqan? İs sotqa resmi tüspey twrıp şeşim şığaru — qızmettik jalğandıq. Bwl degenimiz, Almasbek Sadırbay qazirgi uaqıtta sottıñ zañdı sankciyasınsız, zañsız qamauda otır degen söz!» — dedi advokat.

Advokat Anart Qwsaynova bwl derekterdi Joğarğı Sotqa, Joğarı Sot Keñesine jäne Prezident äkimşiligine deyin jetkizetinin eskertti.

«Üyde otırğan joqsızdar!»: Şeneunikter men Prokurordıñ BAQ-tan jasırınu äreketi

Sottağı tağı bir qızu aytıs jäbirlenuşi tarap ökilderi (Pavlodar jäne Almatı oblısı Auıl şaruaşılığı basqarmasınıñ ökilderi) men prokurordıñ «BAQ bet-älpetimizdi videoğa tüsirmesin, jelide bizge qarsı jağımsız pikirler jazılıp jatır» degen uäjinen tuındadı.

Bwl talaptıñ zañğa müldem qayşı ekenin şegelep ayttı:

«Qwrmetti jäbirlenuşi ökilderi, prokuror jäne sot! Sizder üyde otırğan joqsızdar. Özderiñizdiñ memlekettik qızmettik mindetteriñizdi atqarıp jatırsızdar. Bwl — aşıq sot. Eger memlekettik qızmetşi bola twra, jüzderiñizdiñ halıqqa köringeninen qorıqsañızdar, onda qızmetten ketiñizder! Sizder halıqqa qızmet etuge tiissizder.

QR QPK-niñ 97-babı boyınşa jeke qauipsizdik şaraları tek ömirge, densaulıqqa naqtı qauip töngende ğana qoldanıladı. Mwnda eşqanday qauip joq. Al jurnalisterdiñ tüsirilimine tıyım salu — zañdı jurnalistik qızmetke kedergi keltiru».

Advokat Qwsayınova jelidegi sın men «jağımsız pikirlerdiñ» şeneunikterge emes, swraqqa jauap bere almay müdirgen prokurordıñ özine bağıttalğanın, «Qazaq Times» aqparat agenttiginiñ jurnalisi sot zalında tek zañ ayasında äreket etkenin erekşe atap ötti. Advokattardıñ pikirinşe, prokuror Sanabaev jäbirlenuşilerdi qalqan etip, özin qoğamdıq sınnan qorğaştap qalğısı keledi.

Prokuror men Ayıptau tarapınıñ uäji

Memlekettik ayıptauşı, prokuror Ädiljan Sanabaev qorğau tarapınıñ barlıq ayıptauları men ötinişterine qarsı şıqtı.

«İstegi artıq 5 tomnıñ 3 tomı — sottaluşılardıñ qamau uaqıtın sozuğa qatıstı jeke qwjattar men hattamalar. Al qalğan 2 tomı — jaña ayıptau aktisiniñ qazaqşa jäne orısşa nwsqaları. Sot bwl qwjattarmen tanısu üşin uaqıt berdi, qazir tanısıp jatır. Sondıqtan qorğau tarapınıñ ötinişin qanağattandırudan bas tartudı swraymın», — dedi prokuror.

Almatı oblısı auıl şaruaşılığı basqarmasınıñ ökili de advokattardıñ ötinişine qarsılıq bildirse, Pavlodar, Atırau, Jetisu oblıstarınıñ ökilderi bwl mäseleni sottıñ qarauına qaldırdı.

Sud'yağa resmi otvod

Advokattar Dosanova men Qwsayınova sud'ya M. Qoyşıbaevtıñ isti qarauda taraptardıñ teñdigi men jarıspalılıq principin müldem qamtamasız etpey otırğanın, QR QPK-niñ 369, 370-baptarın bwzıp, jäbirlenuşilerdi bir zalda otırğızıp, birlesip jauap aluına jol bergenin alğa tarttı.

«Sud'ya zañsızdıqtardı köre twra eskertu de jasamadı, bwl äreketimen ol jalğan ayğaqtardı legalizaciyalap otır. Sottıñ ob'ektivtiligine kümän keltire otırıp, QR QPK-niñ 70, 87-baptarı negizinde sud'yağa otvod (qarsılıq) jariyalaymız», — dep ayaqtadı qorğauşılar.

Sottağı bwl ülken zañdıq teketirestiñ qalay şeşileri endi Qonaev qalalıq sotınıñ törağasına baylanıstı. Törağa Madiev mırza qarsıqtı qarap taraptardıñ pikirin tıñdap keñesu bölmesine ketti. Tüsten keyingi sot otırsında şeşimin aytadı.