Agro-sarapşı, azamattıq belsendi Almasbek Sadırbay men tağı altı azamatqa qatıstı jürip jatqan sot procesinde ayıptau tarapınıñ dälelderi negizsiz bolıp şığuda. Qonaev qalalıq sotında ötken kezekti otırısta Atırau oblısı auıl şaruaşılığı basqarması ökiliniñ bergen jauaptarı bwl istiñ qılmıstıq emes, taza azamattıq-qwqıqtıq qatınas ekenin jäne ayıptau aktisiniñ tım asığıs, sauatsız qwrastırılğan degen kümän tudıradı.

Basqarma qızmetkerleri jauapqa tartılmağan: Subsidiya zañdı berilgen be?

Sot barısında ayıptaluşı Almasbek Sadırbaydıñ qorğauşısı, advokat Anar Qwsayınova Atırau oblısı AŞB subsidiyalau böliminiñ basşısı Jaswlan Swltanğalievten jauap aldı. Qorğauşınıñ «Kooperativterge subsidiyanı zañsız tölegeni üşin basqarmanıñ birde-bir qızmetkeri tärtiptik nemese qılmıstıq jauapkerşilikke tartıldı ma?» degen swrağına ökil «Tartılğan joq» dep qısqa qayırdı.

Bwl – istegi eñ mañızdı qwqıqtıq faktilerdiñ biri. Eger memlekettik organnıñ eşbir qızmetkeri jauapqa tartılmasa jäne halattıq tanıtpasa, demek, «INDER A» jäne «QYZYLQOG’A JERUIYQ» AŞÖK-ne subsidiyalar öz uaqıtında, barlıq erejeler saqtala otırıp, zañdı türde berilgen.

«Qılmıs qwramı müldem joq»: Azamattıq qatınas pa, älde alayaqtıq pa?

Sotta belgili bolğanday, 2024 jılı Qızılqoğa audandıq prokuraturası tek bir ğana ötinim boyınşa (1,5 million teñgeden astam soma) mal basınıñ tolıq saqtalmauın anıqtağan. Osığan baylanıstı basqarma kooperativke habarlama jiberip, nätijesinde «QYZYLQOG’A JERUIYQ» AŞÖK 500 mıñ teñgeni öz erkimen byudjetke keri qaytarğan.

Advokat Anar Qwsayınova bwl jağdaydıñ QR Qılmıstıq kodeksiniñ 190-babında (Alayaqtıq) közdelgen qılmıs qwramın tolıqtay joqqa şığaratının alğa tarttı:

«Subsidiyanı alu sätinde bäri zañdı bolğan. Keyinnen mal basınıñ azayuına baylanıstı mindetteme orındalmay, qarajat eşqanday qılmıstıq issiz-aq, habarlama arqılı işinara qaytarılğan. Mwnda eşqanday qılmıstıq oqiğa da, memleketke kelgen zalal da joq. Bwl – taza azamattıq-qwqıqtıq qatınas», – dedi qorğauşı.

Osığan baylanıstı qorğau tarapı Atırau oblısınıñ Auıl şaruaşılığı basqarmasın «jäbirlenuşiler» tiziminen müldem alıp tastaudı jäne oğan qatıstı ötinimderdi ayıptau köleminen şığarudı swrap ötinişhat tüsirdi. Sot bwl qwjattardı aldıru turalı ötinişhattı qanağattandırdı.

Ayıptau aktisindegi soraqı qate: Atıraudıñ isi Almatığa qalay auıstı?

Sot otırısında ayıptau aktisiniñ sauatsız toltırılğanın körsetetin tağı bir soraqı qatelik äşkere boldı. Jaña ayıptau aktisiniñ orısşa nwsqasınıñ 52-betinde Atırau oblısı boyınşa qaralğan «QYZYLQOG’A JERUIYQ» AŞÖK-niñ ötinimi memlekettik mekeme retinde «Almatı oblısınıñ auıl şaruaşılığı basqarması» dep jazılıp ketken.

Advokattıñ «Atıraudıñ ötinimi nelikten Almatı oblısına jazılğan?» degen swrağına jäbirlenuşi ökili de jauap bere almadı: «Bwğan men jauap bere almaymın. Onı ayıptau aktisin dayındağan lauazımdı twlğalar biledi», – dedi Swltanğaliev.

Al memlekettik ayıptauşı (prokuror) bwl swraqqa naqtı uäj ayta almay, tek: «İs materialdarın aldağı uaqıtta tereñirek zerdeleu barısında anıqtalatın boladı. Swraqtı aşıq qaldırudı swraymın» dep qwtıldı.

Almasbek Sadırbay: «Meniñ bwl jerdegi siırlar men qoylarğa qanday qatısım bar?»

Sotta söz alğan ayıptaluşı Almasbek Sadırbay öziniñ 21 aydan beri (2024 jıldıñ 5 qaraşasınan bastap) zañsız qamauda otırğanın aytıp, emociyasın jasıra almadı:

«Mine, bügin Atıraudan kelgen ökil de aşıq ayttı: «Almasbek Sadırbayğa qatıstı eşqanday şağımımız joq, ol bizdi aldağan emes» dedi. Ereje bwzılmağan. Sonda bizdiñ memlekettik ayıptauşı nemen aynalısıp otır? Pavlodar men Atırau oblıstarınıñ bwl iske qanday qatısı bar? Meniñ bwl öñirlerdegi siırlar men qoylarğa qanday baylanısım bar? Meniñ öz barandarım özime jetedi. Ayıptau aktisinde 34 million teñgeden astam zalal turalı fantaziya jazılğan. Eşqanday qılmıs joq jerde meni 21 ay boyı ne üşin wstap otır?», – dedi A. Sadırbay.

Sonımen qatar, Atırau oblısı AŞB ökili Swltanğaliev te sotta: «Siz Sadırbaydıñ qılmıstıq qwqıq bwzuşılıq istegenine kuäsiz be?» degen swraqqa naqtı «Joq» dep jauap berdi. Äri subsidiyalau kriteriylerine qatıstı swraqtarğa ötinimderdi qabıldau käsipkerlerdiñ qwjattarınıñ tolıqtığı men bazadağı mälimetterdiñ säykestigin avtomattı jäne qolmen tekseru erejelerine say jürgiziletinin ayttı.

Sot zalında jauapbergen jäbirlenuşi tarap ökiliniñ jauaptarı Almasbek Sadırbayğa tağılğan ayıptarğa kümin keltiruge jol aşadı. Ayıptau aktisindegi geografiyalıq qatelikter, tomdardıñ jetispeuşiligi jäne «jäbirlendik» degen organdardıñ sotta Sadırbayğa eşqanday şağımı joq ekenin mälimdeui – bwl istiñ artında basqa astar jatqanınan habar beredi.

Biz bwl sot procesin aldağı uaqıtta de jiti baqılaytın bolamız.

The Qazaq Times