– ەرمۇرات مىرزا، ءسىزدىڭ كومەگىڭىزبەن جىلعا قورىتىندى جاساپ، 2021 جىلدا ەلدە بولعان جاعدايلار توڭىرەگىندە سۇحباتتاسايىق دەپ ەدىك...
– اۋىز تولتىرىپ، قورىتىندى جاسايتىنداي قانداي وزگەرىستى ايتا الامىز؟! جىل – كادىمگى بۇرىنعى جىلدار سياقتى سامارقاۋ كۇيدە سۇيرەتىلىپ ءوتتى. سەرپىلىس جوق، ەل ەزىلگەن، قوعام سالعىرت. اۋىق-اۋىق بىرەۋلەردىڭ تەرەزەدەن سەكىرىپ ولگەنى بولماسا، قوجىراعان قوعامدى سەلت ەتكىزەردەي وقيعا بولماعان سياقتى.
– نەگە؟ ارىستا تاعى دا جارىلىس بولدى. اۋىل اكىمدەرىن سايلادىق. «سبەر» مەن اەس قوعامدى ءبىراز شۋلاتتى دەگەندەي...
– ءا-ءا، ونداي وتپەلى-كەپتەلى بىرەڭ-ساراڭ جاعدايلاردىڭ بولعانى راس. كرەملدىڭ جاندايشاپتارى «ورىس ماسەلەسىن» قوزدىرىپ، اقوردانىڭ اباەۆ دەگەن بالاسى قازاقتاردى ۇڭگىرگە اپارىپ تىقتى. پاناما مەن پاندورا جاشىكتەرى ودان ارى ايقارا اشىلىپ، داريعا نازارباەۆانىڭ وفشورعا تىققان ميلليوندارى بەلگىلى بولدى.
ال سودان نە وزگەردى؟ داريعا مەن تيمۋر سول باياعىداي بىلق ەتپەي وتىر. قوعام دا قىڭق ەتپەيدى، الەۋمەتتىك جەلىدە ءبىراز شۋلاپ-شۋلاپ قويدى. باتىس ەلدەرىندە، «سكاندال» دەيمىز بە، شاتاق شىعاراتىن بۇل وقيعالاردىڭ بارلىعى بىزدەگى قوعامدىق احۋالدى وزگەرتۋگە تۇرتكى بولاتىنداي، قارسىلىق قوزعالىسقا ترەند بولا المادى. مەنىڭ بىلۋىمشە، ونىڭ ءۇش سەبەبى بار...
– مىنە، ءبىز دە سونى سۇرايىق دەپ ەدىك. ءسىزدىڭ ويىڭىزشا، قوعامداعى وسى سالعىرتتىقتىڭ كىلتيپانى نەدە؟
– ساياساتتانۋشى اعايىندار بۇل سامارقاۋلىقتىڭ بۇتىن – بۇت، قولىن – قول قىلىپ، جىلىكتەپ بەرە الاتىن شىعار. ال مەن ءوزىم پايىمداعان ءۇش جاعدايدى ايتايىن. بىرىنشىدەن، ازاماتتىق قوعامنىڭ ايتا-ايتا اۋىز تالعان جىك-جاپار جاعدايى. قاراپ وتىرساڭىز، قوعامدىق قوزعالىستى ءبىر ارناعا توعىستىراتىن ورتاق يدەيا بار: ول – مەملەكەتتى تۇتاستاي جايلاپ العان نازارباەۆتىق ساياسي رەجيمدى قۇلاتۋ، ەلدە حالىقتىق بيلىكتى قالىپتاستىرۋ. بۇگىنگى جاعدايدا بۇدان اسقان قانداي ورتاق يدەيا كەرەك؟ مەن وسىعان تۇسىنبەيمىن.
جوق، قوعامداعى ىرىڭ-جىرىڭ ساياسي توپتاردى كۇش دەپ ايتۋعا اۋىز بارمايدى، وسىنى بىلە تۇرسا دا، وسى يدەيانىڭ جولىندا باسى بىرىكپەدى. ەندىگى بىرىگۋى دە ەكىتالاي ما دەپ ويلايمىن...
– سوندا، ءسىزدىڭ ويىڭىزشا، 2021 جىلدىڭ ناتيجەسىمەن قارايتىن بولساق، پروتەستىك قوزعالىستىڭ بولاشاق پەرسپەكتيۆاسى جوق بولعانى ما؟
– «بالاپان – باسىندا، تۇرىمتاي – تۇسىندا» دەگەندەي، توز-توز بولىپ جۇرگەن بۇگىنگى پروتەستىك قوزعالىس ءدال قازىرگى كۇيىندە ەشقانداي پەرسپەكتيۆانىڭ دامۋىنا سەبەپكەر بولا المايدى. پرەزيدەنتتىك سايلاۋدان كەيىن ءۇمىت ارتقان تاۋەلسىز باقىلاۋشىلار قوزعالىسى بىرنەشە توپقا ءبولىنىپ، قوجىراپ تىندى. بۇگىندە ءبىر-بىرىمەن اتىسىپ ءجۇر.
اشىق كۇندە ويناعان نايزاعاي سياقتى قوعامعا جارىپ كىرگەن «ويان، قازاقستان!» دا ەكىگە جارىلىپ كەتتى: ءبىرى – قۇرامىندا اسەم جاپىشەۆا بار توپتىڭ ازدى-كوپتى تەگەۋرىنى بولماسا، ەكىنشىسى – ساياسي پارتيا قۇرامىز دەپ، اقىر اياعى ۇشتى-كۇيلى كورىنبەي كەتتى. بولىمسىز ميتينگىمەن تيتىقتاعان «دۆك» مەن مۇحتار ءابىليازوۆ ءۇشىن بارلىعى «كنب»-نىڭ اگەنتى. جانبولات مامايدىڭ پارتياسى دا 200 ادامنان اسپايتىن ميتينگ الاڭىن شيىرلاۋمەن شارشاعان سياقتى. «ەل تىرەگىنە» ەل سەنىمسىز.
كوپشىلىككە بەلگىلى ءجايت – باس بىرىكپەيدى. باس بىرىكپەگەن سوڭ، قول قايدان كوبەيەدى؟! قازاقتا قولدىڭ ءبىر بالاماسى – اسكەر، سارباز. ساردارى ىرىڭ-جىرىڭ بولعاندا، ساربازى قايدان ۇيىسقان اسكەر، قولى قالاي جۇمىلعان جۇدىرىق بولسىن؟
ونىڭ ۇستىنە بيلىكتىڭ ىشكى ساياسات تەحنولوگياسى قارسىلىق قوزعالىس مۇشەلەرىنىڭ «بوسبەلبەۋىن» وزىنە تارتىپ، قالعانىنىڭ اراسىنا لاڭ سالىپ، قوعامدىق توپتاردى توز-توز ەتتى. سالىپ جۇرگەن ۇرانى مەن ءسوز ريتوريكاسى دۇپ-دۇرىس جانبولات مامايدى قوعامنىڭ ءبىر بولىگىنە جاۋ قىلعان وسى تەحنولوگيانىڭ لاڭى. اقىر اياعى وپپوزيتسيانىڭ قايسىسى حالىققا دوس، قايسىسى جاۋ ەكەنىن اجىراتا الماي، ەل-جۇرت ماڭگىرىپ قالدى. سودان بارىپ، پروتەستىك قوزعالىستىڭ جالعىز عانا پەرسپەكتيۆاسى قالدى: ول – نازارباەۆتىڭ ومىردەن كەتۋىن عانا كۇتۋ. ونىڭ كوزى تىرىسىندە ەشتەڭە وزگەرمەيتىنىنە سەنىمدى حالىق دارمەنسىز وتىر.
– ەرمۇرات اعا، سىرتتان سىناۋعا بارشا قازاق شەبەر عوي...
– مەن بۇنى سىناپ ەمەس، قوعامعا جانىم اشىعاننان، كۇيىنگەننەن ايتامىن. كۇيىنگەندە ناقتى ءبىر جەكە بىرەۋلەرگە ەمەس، دارمەنسىزدىك قامىتىنا ءوزىنىڭ باسىن ءوزى تىعىپ بەرگەن قوعامعا اشىنعاننان ايتامىن.
ءوزىڭ وي جۇگىرتشى، ساياسي رەجيمدى قۇلاتۋ يدەياسى كەشەگى پاندورا جاشىگى اشىلعان كەزدە ەمەس، اكەجان قاجىگەلديننىڭ سوناۋ 1998 جىلعى «رنپك» پارتياسى كەزىنەن ايتىلىپ كەلەدى. كەيىن «دۆك»-نىڭ العاشقى نۇسقاسى دا قوعامدىق كۇشتەردى رەجيمگە قارسى تۋدىڭ استىنا بىرىكتىرە المادى. «ناعىز اق جول» جانە «ازات» پارتيالارى ءۇشىن دە بىرىكتىرۋ ماسەلەسى ارمان بولىپ كەتتى. «العا، دۆك!» دا بۇنى جۇزەگە اسىرا المادى.
– نەگە؟ جوعارىدا ءسىز ايتقان ءۇش سەبەپتىڭ ءبىرى بەلگىلى بولدى. قالعان ەكەۋى نە؟
– ەكىنشىسى – بيىل ايقىن بەلگىلى بولعانداي، بيلىك قالتاسىنا قول سالماسا، قازىرگى قوعام قوزعالا قوياتىنداي ەمەس. رەسەي، ارمەنيا جانە قىرعىزستاننان كىرگىزىلگەن اۆتونىڭ سالىعىنا قاتىستى بۇرق ەتە تۇسكەن قوزعالىستى ەسكە الايىق. قانشا ەدى، 80 مىڭ با، اۆتوكولىك يەلەرى ورە تۇرعاندا، بيلىك شەگىنۋگە ءماجبۇر بولدى. ءوزىڭ ويلاپ كور – سول 80 مىڭنىڭ جارتىسى الاڭعا شىقسا، نە بولار ەدى؟ بيلىك بۇدان تىشاداي قورىقتى.
ودان كەيىنگى «قول سالۋ» زەينەتاقىنىڭ بيلىك پەن قوعام اراسىندا داۋعا اينالعان «پوروگىنا» بايلانىستى بولدى. قوعام ءدۇر ەتكەندە، بيلىك تاعى دا اقتالىپ الەككە ءتۇستى. تاعى دا شەگىنىس جاسادى. ياعني، قوعامداعى پروتەستىلىك ديناميكاسى بيلىكتىڭ وراشولاق ارەكەتىنە جانە حالىقتىڭ تيىسىنشە سوعان قارسى ارەكەتىنە بايلانىستى بولدى. بۇدان شىعاتىن قورىتىندى – داريعانىڭ پاندورا وفشورىنا تىققان ميلليوندارى حالىققا قىزىق ەمەس، وعان ءوزىنىڭ قالتاسىنداعى از-ماز اقشانىڭ تاعدىرى ماڭىزدى. داريعالار قازىنانى توناي بەرسىن، تەك مەنىڭ اقشام امان بولسىن! مىنە، بۇگىنگى پروتەستىك تۇيسىكتىڭ ءبىر لوگيكاسى وسى.
– ال ەندەشە قارسىلىق قوزعالىستىڭ دارمەنسىزدىگىنە اسەر ەتكەن ءۇشىنشى سەبەپ نە؟
– ءۇشىنشىسى – ەلدەگى قارسىلىق قوزعالىس كەدەي. بيىلعى 2021 جىلدا وپپوزيتسيانىڭ قايىرشى جاعدايىنا تاعى دا انىق كوز جەتتى. ازاماتتىق قوعامنىڭ قارىمىنا دەم بەرەتىن، قاراپايىم تىلمەن ايتساق، «قولتىعىنا سۋ بۇركەتىن» قارجىلىق توپتار جوقتىڭ قاسى. تاعى دا ەسكە الايىق، بالكىم، بۇگىندە كوپشىلىكتىڭ ەسىندە جوق تا شىعار: 2010 جىلعا دەيىن، قوعامدا «ازات» جانە «العا، دۆك!» پارتيالارى بولعاندا، ميتينگىنى بىلاي قويعاندا، اپتا سايىن دوڭگەلەك ۇستەلدەر مەن ءتۇرلى تاقىرىپتار بويىنشا كونفەرەنتسيالار وتەتىن. سول كەزدەگى قارسىلىق كۇشتەر جۇيەلى، «سيستەمالىق» وپپوزيتسياعا بىرىگە الدى. قازىر سول وپپوزيتسيالىق ءىس-ارەكەتتىڭ بىردە-ءبىرى جوق.
نەگە؟ سەبەبى – جوعارىدا اتالعان پارتيالارمەن بىرگە قوعامدىق قارسىلىق قوزعالىسىنا بيزنەس وكىلدەرى قوسىلدى، ولارمەن بىرگە قارجى كەلدى. وپپوزيتسيالىق ارەكەتتىڭ ماسشتابى كەڭەيدى، مانيوۆر جاساۋدىڭ مۇمكىندىگى ارتتى. ال بۇگىنگى وپپوزيتسيادا بۋتيالار (بولات ءابىلوۆ – QT) جوق. مەن قۇرامىندا بولعان «ازات» پارتياسى ءىرى قالالاردا كەمىندە ايىنا ءبىر رەت 100 مىڭداپ ليستوۆكا تاراتاتىن. سول ءجۇز مىڭداردى باستىرىپ شىعارۋعا تىكەلەي مەن ارالاستىم. سول 100 مىڭداردى جۇزدەگەن ەرىكتى اۆتوبۋستار مەن بازارلاردا ءجۇرىپ تاراتتى. كەشە مەن بۇگىننىڭ ايىرماشىلىعىن بايقايسىڭ با؟
– قازىر ليستوۆكانىڭ قاجەتى قانشا، الەۋمەتتىك جەلىلەر بار عوي؟
– مەن مۇنى اقشانىڭ ارقاسىندا جۇزەگە اسقان ءىس-شارا رەتىندە مىسال ءۇشىن ايتىپ وتىرمىن. ءيا، ارينە، سول كەزدە «سيستەمالىق وپپوزيتسيا» بولا تۇرسا دا، نازارباەۆتىق رەجيمدى بيلىكتەن تايدىرا المادى. بىراق بۇل – باسقا اڭگىمەنىڭ تاقىرىبى.
ال بۇگىندە سول الەۋمەتتىك جەلىلەر بولا تۇرا، قانداي قۋاتتى وپپوزيتسيالىق ينتەرنەت-رەسۋرستى ايتا الاسىڭ؟ اسىرەسە – قازاق تىلىندە. سەنىڭ ءوزىڭ «Qazaq Times» پورتالىندا ءۇش-ءتورت جورنالشىنى ارەڭ ۇستاپ وتىرسىڭ. سولاي ما؟
– ول جاعى بار...
– قارسىلىق كۇشتەردىڭ قايىرشىلىعى بولماسا، قارجىلىق تىرەگى كۇشتى بۇگىنگى «Tengrinews.kz» نەمەسە «Nur.kz» سەكىلدى وپپوزيتسيالىق قۋاتتى رەسۋرستار جاساقتايتىن ەدى عوي؟ ول جوق! ال سول 2005–2015 جىلدارى «سۆوبودا سلوۆا»، «رەسپۋبليكا»، «ەپوحا»، «ءسوز» سياقتى وپپوزيتسيالىق گازەتتەردىڭ شوعىرى شىعىپ تۇردى. بەرتىنگى گۇلجان ەرعاليەۆانىڭ «ادام» جانە «ادام بول» جوبالارى دا وپپوزيتسياداعى قارجىنىڭ كۇشىمەن شىقتى. بۇگىنگى پروتەستىك قوزعالىس ۇيىمدارىنىڭ ءبىر گازەتى بار ما؟ تاعى دا جوق! نەگە؟ سەبەبى – بۇگىنگى وپپوزيتسيا قايىرشى!
– نەگە؟ الەۋمەتتىك جەلىلەردە «دۆك» مەن جانبولات مامايدىڭ 400–500 مىڭ ادام تىركەلگەن كانالدارى بار عوي...
– قايدا سول ءابىليازوۆ پەن مامايدىڭ الاڭعا شىققان 400–500 مىڭى؟ قالىڭ قازاق ۆيرتۋال الەمدە اعىلىپ جاتقان سىلدىر ءسوزدى مويىندامايدى نەمەسە جەلگە ۇشىپ جاتقان ول ءسوزدى حالىق قۇلاعىنا ىلمەيدى. حالىق اۋادا قالىقتاعان ينتەرنەتتەگى ساپىرىلىسقان ءسوزدى ەمەس، كوزبەن كورەتىندەي، قولمەن ۇستايتىنداي ناقتى ىسكە سۋساپ وتىر. ال بىزدەگىلەر بىرجاقتى «الەمجەلى اۋرۋىنا» ۇشىراعان.
ونىڭ ۇستىنە الەۋمەتتىك جەلىدە ايتىلعان ءسوزدى، سول جەلىلەردە قۇرىلعان كانال-ارنالاردى Google سەگمەنتى قابىلدامايدى. وسىدان ون كۇن نەمەسە ءبىر اي بۇرىن ماماي مەن ءابىليازوۆتىڭ «فەيسبۋك» پەن «يۋتۋبتا» ايتقانىن جەلىنى اقتارىپ ىزدەمەسەڭ، جۋىق ۋاقىتتا تاپپايسىڭ!
قارسىلىق قوزعالىستىڭ قايىرشىلىعى تاعى دا ەلدە ەتەك العان جالپى ەكونوميكالىق داعدارىسپەن دە بايلانىستى سياقتى. جۇمىسسىزدىق جايلاعان ەلدە قارا تابان قارسىلىق تانىتۋشى جان باعۋعا جانۇشىرا ما، جوق الدە الاڭداعى ميتينگىگە بارۋعا قۇشتار بولا ما؟ بۇل دا باسى اشىق سۇراق.
– دەگەنمەن، ءوتىپ بارا جاتقان 2021 جىلدا بيلىكتىڭ «اقوردا» جانە «كىتاپحانا» سياقتى ەكى باسى پرەزيدەنت توقاەۆتىڭ قۇزىرىنا وتە باستادى دەپ ايتا الاسىز با؟ ماسەلەن، ەكس-پرەزيدەنت نازارباەۆ «نۇر وتان» پارتياسىن توقاەۆتىڭ «يەلىگىنە» بەردى عوي. ال «نۇر وتان» پارلامەنتتەگى باسىم فراكتسيا ەكەنىن بىلەسىز...
– بىرىنشىدەن، «يەلىككە بەرۋ» ماسەلەسى تولىق اياقتالماق تۇگىلى، ءالى باستالعان دا جوق، ونىڭ اۋى مەن باۋىن بيلىك پارتياسىنىڭ سەزى پىشەدى. نازارباەۆتىڭ «بەردىم» دەگەن سوزىنەن كەيىن، ەدەل-جەدەل پارتيا قۇرىلتايىن وتكىزۋگە نە كەدەرگى بولدى؟ ياعني، نازارباەۆتىكى – ادەتتەگىدەي بوس ءسوز، قۇرعاق الدارقاتۋ.
ەكىنشىدەن، تاۋەلسىزدىكتىڭ 30 جىلدىعىنا بايلانىستى پرەزيدەنت توقاەۆ قول قويعان ماراپاتتاۋ جارلىعىنا كوز جۇگىرتىپ شىق: نازارباەۆتىڭ قۇدالارى مەن ەتجاقىندارى تەگىس «بارىس» وردەنىمەن ماراپاتتالدى. نەگە؟ سەبەبى الداعى 2022 جىل – بارىس جىلى. نازارباەۆ ءوزىنىڭ قۇدالارىن «بارىس» قىلدى، بىراق جارلىققا توقاەۆ قول قويدى. وسى ما – بيلىكتىڭ ءبىر قۇزىرعا وتكەنى؟ «دە-فاكتو» – شەشتى، «دە-يۋرە» – ورىندادى. بار بولعانى – وسى!
– ساياساتتى قويا تۇرالىق، ەرەكە، ال ەكونوميكادا نە بولىپ جاتىر؟
– مەن ەكونوميكانىڭ مامانى ەمەسپىن عوي، سوندىقتان 2021 جىلدىڭ ەكونوميكالىق-قارجىلىق بالاما قورىتىندىسىن جاساۋ ءۇشىن، بەلگىلى تاۋەلسىز قارجىگەر ايمان تۇرسىنقانعا قولقا سالدىق. ۇلگىرسە – وسى اپتاداعى گازەتكە، ۇلگەرمەسە – جاڭا جىلدىڭ باسىنداعى نومەردە جاريا ەتەمىز.
دەگەنمەن، كوپە-كورنەۋ جاعدايلاردى سەزىنۋ ءۇشىن ەكونوميست بولۋ قاجەت ەمەس شىعار؟ مەنىڭ بايقاعانىم – ەلدە جەكەشەلەنەتىن مەملەكەتتىك اكتيۆتەر ساتىلىپ بىتۋگە تاقاۋ. الداعى جىلى ۇكىمەت «قازپوشتا» مەن «قازاقستان تەمىر جولى» ۇلتتىق كومپانيالارىن ساتامىز دەپ وتىر. مەملەكەتتىڭ ستراتەگيالىق ماڭىزى جوعارى نىساندارى ساتىلعان سوڭ، ۇكىمەت اينالىسۋى ءتيىس قاي ەكونوميكانى سۇرايسىڭ؟
ايتپاقشى، 2021-دە ەلدىڭ ەنەرگەتيكا سالاسىن ساتۋ باستالدى. مەن تۇسىنبەيمىن: «گەس» دەپ اتالاتىن قۋات كوزىنىڭ ترۋبينا دوڭعالاعى اعىپ جاتقان سۋدىڭ اسەرىنەن اينالىپ تۇر، توق وزدىگىنەن ءوندىرىلىپ جاتىر، ەندەشە ەلدىڭ ەلەكتر جەلىسىن جەكە مەنشىك ينۆەستورعا ساتۋ قانداي قاجەتتىلىكتەن تۋدى؟
«دات»-تىڭ وتكەن ءبىر سانىندا قازاقستاننىڭ ەلەكتر جەلىسى سەكتورىن اراب ەلدەرىنىڭ بىرىككەن حولدينگى جەكەشەلەندىرىپ العالى جاتىر دەپ جازعان ەكەنسىزدەر...
– ءيا، كۇدىك بولعان سوڭ جازدىق. ايتپەسە بۇل ساۋدا-ساتتىقتىڭ «قولىنان ۇستاپ العان» جوقپىز. كۇدىك بولاتىن سەبەبى – تەلەتەحنولوگيا تۇگىلى، بالتانىڭ باسىن شىعارمايتىن اراب امىرلىگى قازاقستاننىڭ ەنەرگەتيكا سالاسىنا نەگە قىزىعا قالدى؟ اراب ەلدەرى ەنەرگەتيكانىڭ تەحنولوگياسى مەن ەكونوميكاسىن الەمدىك مەنەدجمەنت دەڭگەيىندە شىر اينالدىرىپ جۇرگەنىن ەستىدىڭ بە؟
– مۇنايدان تۇسەتىن ميللياردتارى مول بولعان سوڭ، ول قارجىنى وڭتايلى ورنالاستىراتىن جەر ىزدەيتىن شىعار، كىم ءبىلسىن؟
– ايگىلى ازىلكەش-ارتيست اسقار نايمانتاەۆ ايتپاقشى، «ۋوت تاك»! ماسەلە قازاقستاننىڭ ەنەرگەتيكاسىن دامىتۋدا ەمەس، سەن ايتقانداي، مول اقشانى ورنالاستىرۋدا. اقشا بولعاندا، قازاقستاننىڭ ەنەرگەتيكا سالاسىنا كەلەدى دەگەن 6 ميلليارد دوللار تازا ارابتىڭ اقشاسى ەمەس سياقتى. بۇل ميللاردتار امىرلىك ەلىنە تىعىلعان قازاقستان بيلىگىنىڭ باسىندا وتىرعان ادامنىڭ اقشاسى. ەندى سول وراسان زور كاپيتالدى لەگاليزاتسيا جاساۋ ءۇشىن، «ينۆەستور ويىنى» ويلانىپ تابىلدى. شەتكە تىعىلعان كاپيتال ينۆەستيتسيالىق جەلەۋمەن ەلدىڭ ەنەرگەتيكاسى سالاسىنا سالىنادى. قازاقستان ۇكىمەتىمەن جاساسقان وتە وڭتايلى كەلىسىمشارت بويىنشا، بەلگىلى ءبىر مەزگىلدەن كەيىن، جۋىلىپ-شايىلعان اقشا ۇستەمە پايىزىمەن كەرى قاراي – امىرلىكتەگى ەسەپشوتقا تازا كۇيىندە قايتادى. مىنە، تاۋەلسىز ساراپشىلار اڭداعان گاپ وسىندا.
– قوش دەلىك، ال ءسىز ايتقانداي، «قۇدالار بارىس بولعان» الداعى 2022 جىلدان قانداي ءۇمىتىڭىز بار؟
– ءنول! ەلدەگى ساياسي جاعداي ءدال بيىلعىداي بىلق ەتپەي تۇراتىن بولسا، ەشقانداي ءۇمىت جوق. سول باياعى مىرتىڭ-تىرتىڭ بولادى. بالكىم، بيلىكتىڭ وزىندىك ىشكى قيتۇرقى باستاماسىمەن مەرزىمىنەن بۇرىن وتەتىن پرەزيدەنتتىك سايلاۋعا دايىندىق باستالۋى مۇمكىن.
– «گاپ» دەمەكشى، ول سايلاۋ زاڭ بويىنشا 2024 جىلى ءوتۋى ءتيىس بولسا، ەكى جىل بۇرىن دايىندالۋدىڭ گابى نەدە دەپ ويلايسىز؟
– يت ءبىلىپ پە؟! كەزىندە رەسەيلىك وليگارح بوريس بەرەزوۆسكي: «لوگيكۋ يديوتوۆ پروگنوزيروۆات نەۆوزموجنو» دەگەن ەكەن. بىراق تۇركىستان قالاسىن جەدەلدەتىپ جاڭعىرتىپ جاتقانىنا قاراعاندا، احمەت ءياسساۋيدىڭ قاسىنا بارىپ جاتپاقشى ادام اسىعىس سياقتى. بيلىكتىڭ ءترانزيتىن تولىق اياقتاۋى كەرەك قوي. توقاەۆ – وتپەلى كەزەڭنىڭ فيگۋراسى. ونىڭ ۇستىنە ول مادەنيەت پەن تازالىقتىڭ ادامى. وتكەن 20 جىلدىق جاڭا تاريحقا رەۆيزيا جاساۋى ابدەن مۇمكىن... ال نازارباەۆقا تاريحتاعى اتىن ساقتاپ قالاتىن مۇراگەر كەرەك. گاپ وسىندا ما دەپ ويلايمىن.
– اشىق كەتتىڭىز عوي، ەر-اعا، سۇحباتىڭىزعا راقمەت! امان بولىڭىز!
– جابىق جۇرەتىن كەز الدەقاشان بىتكەن، جاسىراتىن نە قالدى؟! «Qazaq Times-تاعى» جىگىتتەرگە سالەم – جاڭا جىل قۇتتى بولسىن!

The Qazaq Times