ارمەنيا پرەمەر-ءمينيسترى نيكول پاشينيان. فوتو: tsargrad.tv

ارمەنيا پرەمەر-ءمينيسترى ساۋىردە وتستاۆكاعا كەتەتىنىن مالىمدەدى. نيكول پاشينيان بۇل مەرزىمىنەن بۇرىن پارلامەنتتىك سايلاۋ وتكىزۋ ءۇشىن قاجەت ءفورمالدى شارا دەدى.

پاشينيان وپپوزيتسيالىق فراكتسيا وكىلدەرمەن كەزدەسكەن سوڭ، ەلدەگى كەزەكتەن تىس پارلامەنت سايلاۋىن 20 ماۋسىمعا بەكىتكەن. ال وعان دەيىن نيكول پاشينيان پرەمەر-ءمينيستردىڭ مىندەتىن اتقارا بەرەدى. جەرگىلىكتى زاڭ بويىنشا جازعا بەلگىلەنگەن ساياسي دودادان كەيىن پارلامەنت جاڭا ءمينيستردى سايلاۋى ءتيىس. ەگەر ەكى تۋر كەزىندە دە ۇمىتكەرلەردىڭ ەشبىرى قاجەتتى داۋىس سانىن جيناي الماسا، پارلامەنت ءوزىن ءوزى تاراتىپ جىبەرەدى.

قازىر ارمەنياداعى ساياسي احۋال ۋشىعىپ تۇر. باس شتابتىڭ باسشىسىن تاعايىنداۋ پرەمەر-مينيستر نيكول پاشينيان مەن پرەزيدەنت ارمەن ساركيسيان اراسىندا قايشىلىقتار تۋىنداتقان. وپپوزيتسيالىق «وتاندى قۇتقارۋ قوزعالىسى» ساركيسيانمەن كەزدەسۋگە دايىن، بىراق ولار پاشينياننىڭ وتستاۆكاسىن تالاپ ەتتى. قوزعالىستىڭ ۇيلەستىرۋشىسى يشحان ساگاتەليان وپپوزيتسيانىڭ كۇن تارتىبىنە سايكەس، پاشينيان وتستاۆكاعا كەتكەننەن كەيىن مەرزىمىنەن بۇرىن پارلامەنتتىك سايلاۋ وتكىزەتىن ۋاقىتشا ۇكىمەت قۇرىلسىن دەگەن تالاپ قويدى.

نەگىزىنەن پرەمەر-مينيستر نيكول پاشينيان بىلتىر قاراشادا تاۋلى قاراباقتا اتىستى توقتاتۋ تۋرالى ازەربايجانمەن كەلىسىمگە قول قويعاننان كەيىن ەلدە ونىڭ وتستاۆكاسىن تالاپ ەتۋشىلەر كوبەيگەن. كوپتەگەن ارميان كەلىسىم شارتتارىمەن كەلىسپەيدى. وسى كەلىسىمنىڭ ناتيجەسىندە ارمەنيا تاۋلى قاراباقتاعى ءبىراز اۋماقتى باقىلاۋ قۇقىعىنان ايىرىلعان جانە 1990 جىلدارى ارميان كۇشتەرى جاۋلاپ العان جەتى اۋداندى ازىربايجانعا قايتارعان.

وپپوزيتسيا تاۋلى قاراباق ماسەلەسىن شەشۋدە پاشينياننىڭ جەڭىلىسكە ۇشىراعانىن ايتسا، پرەمەردىڭ جاقتاستارى ساتسىزدىككە پرەمەرمەن بىرگە ەلدى سوعىسقا دايىنداماعان اسكەري جانە بۇرىنعى باسشىلارى دا جاۋاپتى دەپ سانايدى.

پاشينياننىڭ وتستاۆكاسىن ەلدىڭ بۇرىنعى پرەزيدەنتتەرى دە تالاپ ەتكەن. اقپاندا قارۋلى كۇشتەر باس شتابى پاشينياندى قىزمەتىنەن كەتۋگە شاقىرعاننان كەيىن ول ەلدە اسكەري توڭكەرىس جاساۋ تالپىنىسى بولعانىن مالىمدەگەن.

"The Qazaq Times"