قىرعىزستان پرەزيدەنتى سادىر جاپاروۆ. فوتو: f.azh.kz

قىرعىزستان جوگوركۋ كەنەشى كونستيتۋتسيانىڭ جاڭا جوباسىن قاراۋعا كىرىستى. بۇعان دەيىن ءبىر توپ دەپۋتات نەگىزگى زاڭنىڭ جاڭا جوباسىن جاساۋدى ۇسىنعان.

«كابار» اگەنتتىگىنىڭ مالىمەتىنشە، قوعامدىق تالقىلاۋ ءۇشىن زاڭگەرلەر، عالىمدار، وزگە دە سالالار مەن قوعام وكىلدەرىنەن تۇراتىن كونستيتۋتسيالىق كەڭەس قۇرىلعان. كونستيتۋتسيالىق كەڭەس مۇشەلەرى جاڭا جوبانى ەكى ايدان اسا قاراپ، جوگوركۋ كەنەشكە قايتا جولدادى. كونستيتۋتسيانىڭ جاڭا جوباسىنىڭ بۇرىنعىدان نەگىزگى وزگەشەلىگى - ەلدى پرەزيدەنتتىك باسقارۋ ۇلگىسىنە كوشىرۋ تۋرالى ۇسىنىس. سونداي-اق دەپۋتاتتار سانىن 120-دان 90-عا قىسقارتۋ ۇسىنىلعان.

جاڭا كونستيتۋتسيادا ەلدەگى ءسوز ەركىندىگى مەن دەموكراتياعا قاۋىپ توندىرەتىن بىرقاتار تارماقتار بار. ايتالىق، زاڭدىق نورمادا انىق بەكىتىلمەگەن «ەلدىڭ يماندىلىعىنا، قىرعىزدىڭ ۇلتتىق سالت-ساناسىنا قايشى ءىس-شارالارعا شەكتەۋ قويىلادى» دەگەن تارماقتار كەزدەسەدى. بۇنى كەيبىر قىرعىز ساياساتكەرلەرى  بيلىك باسىنداعىلاردىڭ دەموكراتيا مەن ءسوز بوستاندىعىن شەكتەۋگە ماقساتىندا قوسقان كۇماندى ەرەجەلەر دەپ سانايدى.

قىرعىزستانداعى ساياسي جاعدايلاردى باعامداعان تاۋەلسىز ساراپشىلار بۇل وزگەرىستەردىڭ ەلدى ودان بەتەر تىعىرىققا تىرەيتىنىن ايتادى. سونداي-اق، 30 جىل بىرتىندەپ بولسا دا العا ىلەرىلەپ كەلە جاتقان قىرعىز دەموكراتياسى داعدارىستان كەيىن كەرى كەتسە بۇل ايماقتاعى دەموكراتيالىق پروتسەستەرگە كەرى اسەرىن تيگىزەدى دەپ سانايدى. سەبەبى، ماڭىنداعى اۆتوريتارلىق رەجيمدەر ەندىگى جەردە قىرعىزدى مىسال ەتىپ، ەلدەگى ازاماتتىق قوعامنىڭ پروگرەسىن كەرى شەگىندىرۋى مۇمكىن دەگەن بولجامدار بار.

بۇعان دەيىن قىرعىزستان قالالارىندا كونستيۋتسيانى وزگەرتۋگە قارسى نارازىلىق اكتسيالارى وتكەن بولاتىن.

"The Qazaq Times"