قىرعىزستان قۇمتور كەنىشىندەگى جەمقورلىق ءىسى بويىنشا ەلدىڭ ەكس-پرەزيدەنتتەرى اسقار اقاەۆ پەن قۇرمانبەك باكيەۆكە ىزدەۋ جاريالادى. اتالعان ءىس بويىنشا بۇرىنعى پرەمەر، دەپۋتاتتار پرەزيدەنت جاپاروۆتىڭ بۇيرىعىمەن تەرگەلىپ جاتىر.

قازىر ەلدە باس پروكۋراتۋرا جانە ىشكى ىستەر مينيسترلىگى تەرگەۋشىلەرىنەن قۇرالعان ۆەدومستۆوارالىق تەرگەۋ توبى «قۇمتور» كەن ورنىن يگەرۋدىڭ ءتۇرلى كەزەڭدەرىندەگى جەمقورلىق فاكتىلەرى بويىنشا ءىستى قاراپ جاتىر.

31 مامىردا قىرعىزستان پارلامەنتى – جوگوركۋ كەڭەش دەپۋتاتتارى اسىلبەك جەەنبەكوۆ پەن توروباي زۋلپۋكاروۆ ەكى ايعا قامالدى. سول كۇنى ەلدىڭ بۇرىنعى پرەمەر-ءمينيسترى ومىربەك بابانوۆ، بۇرىنعى دەپۋتاتتار ىسقاق پيرماتوۆ پەن تالانتبەك ۇزاقباەۆ 48 ساعاتقا ۇستالدى. بۇعان قوسا، ەلدىڭ بۇرىنعى پرەمەر-مينيسترلەرى يگور چۋدينوۆ پەن تەمىر ساريەۆتەن دە جاۋاپ الىنعان.

جوعارى لاۋازىمدى تۇلعالاردىڭ كەيبىرىنە «جەمقورلىق» بابى بويىنشا ايىپ تاعىلسا، كەيبىرى ءالى كۋاگەر رەتىندە قاراستىرىلىپ وتىر.

مالىمەتتەر بويىنشا اسقار اقاەۆ پرەزيدەنت بولىپ تۇرعان تۇستا كانادالىق كومپانيامەن كەلىسىم-شارت جاساسقاندا زاڭ بۇزىلعان. رەسمي بىشكەك اقاەۆقا جەمقورلىق كۇدىگىمەن ىزدەۋ جاريالادى. ءدال وسىنداي كۇدىككە ىلىنگەن ەكس-پرەزيدەنت قۇرمانبەك باكيەۆ پەن ونىڭ ۇلى ماكسيم باكيەۆكە دە ىزدەۋ جاريالاندى.

قىرعىزستاننىڭ قازىرگى بيلىگى قۇمتور بويىنشا 1992, 2003, 2009 جانە 2017 جىلدارى جاسالعان كەلىسىمدەر ەلدىڭ ۇلتتىق مۇددەسىنە سايكەس كەلمەگەن دەپ سانايدى. 17 مامىردا ەل پارلامەنتى «قۇمتور» كومپانياسىنىڭ جۇمىسىن تەكسەرگەن مەملەكەتتىك كوميسسيانىڭ ەسەبىن تىڭدادى. كوميسسيا ءتۇرلى تالاپتى بۇزعانى ءۇشىن كومپانيادان 460 ملرد سوم (5,5 ملرد دوللار) ءوندىرۋدى تالاپ ەتتى. جوگوركۋ كەڭەش «قۇمتوردە» سىرتقى باسقارۋشى ەنگىزۋدى ۇسىنىپ، مۇنى پرەزيدەنت جاپاروۆ قولدادى.

"The Qazaq Times"