الماتىدا ۇزدىك جۋرناليستەر ماراپاتتالدى

بۇگىن رۋحاني كەلىسىم كۇنى قارساڭىندا التى اي بۇرىن جاريالانعان ءدىن سالاسىنداعى وزەكتى ماسەلەلەرگە ارنالعان الماتىلىق جۋرناليستەر بايقاۋىنىڭ قورىتىندىسى بەلگىلى بولدى. الماتىداعى «قوعامدىق كەلىسىم» ۇيىندە وتكەن ماراپاتتاۋ سالتاناتىندا ۇزدىك شىققان جۋرناليستەرگە اقشالاي سىيلىقتار تابىس ەتىلدى.

الماتى قالاسى ءدىن ىستەرى جونىندەگى باسقارماسىنىڭ الەۋمەتتىك ماڭىزدى جوبالارى نەگىزىندە ۇلتتىق جۋرناليستىك زەرتتەۋ ورتالىعى جۇزەگە اسىرعان ۇزدىك شىعارمالار سايىسىنا 56 جۋرناليست پەن قالامگەر قاتىسىپ، باس-اياعى 100-دەن استام جۇمىس كەلىپ تۇسكەن. قاتاڭ تالقىدان وتكەن باسەكەلى تالداۋ 9 نوميناتسيا جانە 5 ىنتالاندىرۋ سىيلىعى بويىنشا جۇرگىزىلدى. جۇلدەنىڭ جالپى قورى – 1 000 000 تەڭگە.

بايقاۋعا 2018 جىلدىڭ 1 ساۋىرىنەن باستاپ 1 قازانعا دەيىنگى جاريالانعان ماتەريالدار قابىلدانعان. باستى قويىلعان تالاپ – قازاقستاننىڭ زايىرلى مەملەكەتتىك قۇرىلىمىن قاراپايىم ءارى ۇعىنىقتى تىلمەن ءتۇسىندىرۋ، مەملەكەتتىك ساياساتتىڭ زاڭنامالىق تالاپتارىن ۇعىندىرۋ، ءدىن اتىن جامىلعان ەكسترەميستىك اعىمداردى اشكەرەلەۋ، ءداستۇر مەن ءدىننىڭ ءوزارا بايلانىسىن جەتكىزۋ، ءدىني ەكسترەميزمنىڭ الدىن الۋ، تەرىس ءدىني توپتاردىڭ يدەولوگياسى مەن ولاردىڭ زياندىعىن اشىپ كورسەتۋ.

ۇيىمداستىرۋشىلاردىڭ ايتۋىنشا، قاندايدا ءبىر ءدىني ۇستانىمدى نەمەسە ءدىندى ناسيحاتتاۋعا باعىتتالعان ماتەريالدار قابىلدانباعان.

الماتى قالاسى ءدىن ىستەرى جونىندەگى باسقارماسىنىڭ باسشىسى ايدار ەسەنبەكوۆ «وسىمەن ەكىنشى رەت وتكەن ءىس-شارا بىلتىرعىعا قارعاندا وتە تارتىستى ءوتتى. ءبىر-بىرىنەن وتكەن شىعارمالار دا كوپ بولدى. بۇل ءبىر شەتىنەن جۋرناليستەردىڭ قىزىعۋشىلىعىن دا بىلدىرەدى. ال ءبىز ءۇشىن بايقاۋدىڭ باستى ماقساتى – ەكسترەميزم مەن جات اعىمدارمەن كۇرەستە العى شەپتە تابىلاتىن قالام يەلەرىنە قولداۋ كورسەتۋ. سونىمەن قاتار، مەملەكەتتىك ساياساتقا سەرپىلىس بەرەتىن اعارتۋشىلىق باعىتىنداعى جۇمىستاردى كۇشەيتۋ جانە ەكسترەميزمنىڭ الدىن الۋدا اقپاراتتىق كامپانيا قۇرۋ. بۇل ورەدە جۋرناليستەردىڭ ەڭبەگى وتە زور» دەيدى.

ودان كەيىن ءسوز العان ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتىنىڭ دەكانى ساعاتبەك مەدەۋبەكۇلى ۇلتتىق جانە مەملەكەتتىك مۇددە تۇرعىسىنان جۋرناليستەردىڭ ميسسياسىن تىلگە تيەك ەتە كەلە، ولاردىڭ رۋحاني-اعارتۋشىلىق باعىتىنداعى جۇمىستارىنا تابىس تىلەدى. ال الماتى قالالىق قوعامدىق كەڭەستىڭ مۇشەسى، بەلگىلى قوعام قايراتكەرى قۇسمان شالاباەۆ كۇردەلى ماسەلەلەردەن اياق الىپ جۇرگىسىز ۋاقىتتاعى جۋرناليستەردىڭ رولىنە توقتالدى.

سالتاناتتى ماراپاتتاۋ بارىسىندا الدىمەن ىنتالاندىرۋ سىيلىعى بەرىلىپ، سىيلىق يەگەرلەرىنە ۇلتتىق جۋرناليستىك زەرتتەۋ ورتالىعىنىڭ جەتەكشىسى دارمەن سمايىل 20 مىڭ تەڭگەلىك سەرتيفيكاتپەن، ارنايى ديپلومداردى تابىس ەتتى. ىنتالاندىرۋ سىيلىعىنا «تۇركىستان» گازەتىنىڭ ءتىلشىسى دينارا مىڭجاسارقىزى، «الماتى» ارناسى «اقشام الاڭى» باعدارلاماسىنىڭ اۆتورى ءارى جۇرگىزۋشىسى ۇمبەتالى مەيمەش، «Abai.kz» اقپاراتتىق پورتالىنىڭ رەداكتورى نۇرگەلدى ابدىعانيۇلى، «newtimes.kz» سايتىنىڭ ارناۋلى ءتىلشىسى جانە «احىسكا» حالىقارالىق گازەتىنىڭ ءتىلشىسى كالبينۋر حوشنازاروۆا، «اسىل ارنا» تەلەارناسى «ارنايى رەپورتاج» باعدارلاماسىنىڭ ءتىلشىسى التىنبەك راحىمبەردى يە بولدى.

ودان كەيىن ساحناعا «جۇزدەن جۇيرىك شىققان» ۇزدىكتەر كوتەرىلىپ، ارنايى نوميناتسيا ديپلومىمەن جانە 100 مىڭ تەڭگەلىك سەرتيفيكاتپەن ماراپاتتالدى. قازىلار القاسىنىڭ شەشىمىمەن «ۇزدىك تەلەۆيزيالىق باعدارلاما» نوميناتسياسىنا «31-ارنا» تەلەارناسى «ءسوزدىڭ شىنى كەرەك» باعدارلاماسىنىڭ اۆتورى يرينا سوۆەتجانقىزى، «مەرزىمدى باسىلىمدارداعى قازاق تىلىندەگى ەڭ ۇزدىك ماقالا» نوميناتسياسىنا «زاڭ» گازەتىنىڭ ءتىلشىسى تۇيمەگۇل يباشەۆا، «ەڭ بەلسەندى بلوگەر» نوميناتسياسىنا بەلگىلى جۋرناليست تورەعالي تاشەنوۆ، «ۇزدىك الەۋمەتتىك بەينەروليك» نوميناتسياسىنا «31-ارنا» ءتىلشىسى ارداق كامال، «مەرزىمدى باسىلىمدارداعى ورىس تىلىندەگى ەڭ ۇزدىك ماقالا» نوميناتسياسىنا «Central Asia Monitor» رەسپۋبليكالىق قوعامدىق-ساياسي گازەتىنىڭ ءتىلشىسى  ساۋلە يساباەۆا، «ۇزدىك راديوباعدارلاما» نوميناتسياسىنا «قازاق راديولارى» جشس «الماتى» ستۋدياسىنىڭ رەداكتور-جۇرگىزۋشىسى باقىتجان جارمۇحامبەت، «الەۋمەتتىك جەلىلەردەگى ەڭ ۇزدىك بەلسەندى قوعامدىق توپ» نوميناتسياسىنا «ينستاگرام»، «فەيسبۋك»، «ۆكونتاكتە» الەۋمەتتىك جەلىلەرىندەگى «ءبىز ەكسترەميزمگە قارسىمىز» پاراقشاسى، «ينتەرنەت جەلىسىندەگى ورىس تىلىندەگى ەڭ ۇزدىك ماقالا» نوميناتسياسىنا «Zakon.kz» جەلىلىك باسىلىمى ارنايى رەپورتاجدار ءبولىمىنىڭ رەداكتورى تورعىن نۇرسەيتوۆا، «ينتەرنەت جەلىسىندەگى قازاق تىلىندەگى ەڭ ۇزدىك ماقالا» نوميناتسياسىنا «بولاشاق» باعدارلاماسىنىڭ ستيپەنديانتى، الەۋمەتتانۋ عىلىمدارىنىڭ ماگيسترى ايسۇلۋ مولدابەكوۆا لايىق دەپ تانىلدى.

“The Qazaq times”