Bügin Ruhani kelisim küni qarsañında altı ay bwrın jariyalanğan din salasındağı özekti mäselelerge arnalğan almatılıq jurnalister bayqauınıñ qorıtındısı belgili boldı. Almatıdağı «Qoğamdıq kelisim» üyinde ötken marapattau saltanatında üzdik şıqqan jurnalisterge aqşalay sıylıqtar tabıs etildi.

Almatı qalası Din isteri jönindegi basqarmasınıñ äleumettik mañızdı jobaları negizinde Wlttıq jurnalistik zertteu ortalığı jüzege asırğan üzdik şığarmalar sayısına 56 jurnalist pen qalamger qatısıp, bas-ayağı 100-den astam jwmıs kelip tüsken. Qatañ talqıdan ötken bäsekeli taldau 9 nominaciya jäne 5 ıntalandıru sıylığı boyınşa jürgizildi. Jüldeniñ jalpı qorı – 1 000 000 teñge.

Bayqauğa 2018 jıldıñ 1 säuirinen bastap 1 qazanğa deyingi jariyalanğan materialdar qabıldanğan. Bastı qoyılğan talap – Qazaqstannıñ zayırlı memlekettik qwrılımın qarapayım äri wğınıqtı tilmen tüsindiru, memlekettik sayasattıñ zañnamalıq talaptarın wğındıru, din atın jamılğan ekstremistik ağımdardı äşkereleu, dästür men dinniñ özara baylanısın jetkizu, dini ekstremizmniñ aldın alu, teris dini toptardıñ ideologiyası men olardıñ ziyandığın aşıp körsetu.

Wyımdastıruşılardıñ aytuınşa, qandayda bir dini wstanımdı nemese dindi nasihattauğa bağıttalğan materialdar qabıldanbağan.

Almatı qalası Din isteri jönindegi basqarmasınıñ basşısı Aydar Esenbekov «Osımen ekinşi ret ötken is-şara bıltırğığa qarğanda öte tartıstı ötti. Bir-birinen ötken şığarmalar da köp boldı. Bwl bir şetinen jurnalisterdiñ qızığuşılığın da bildiredi. Al biz üşin bayqaudıñ bastı maqsatı – ekstremizm men jat ağımdarmen küreste alğı şepte tabılatın qalam ielerine qoldau körsetu. Sonımen qatar, memlekettik sayasatqa serpilis beretin ağartuşılıq bağıtındağı jwmıstardı küşeytu jäne ekstremizmniñ aldın aluda aqparattıq kampaniya qwru. Bwl örede jurnalisterdiñ eñbegi öte zor» deydi.

Odan keyin söz alğan äl-Farabi atındağı Qazaq wlttıq universiteti, jurnalistika fakul'tetiniñ dekanı Sağatbek Medeubekwlı wlttıq jäne memlekettik müdde twrğısınan jurnalisterdiñ missiyasın tilge tiek ete kele, olardıñ ruhani-ağartuşılıq bağıtındağı jwmıstarına tabıs tiledi. Al Almatı qalalıq qoğamdıq keñestiñ müşesi, belgili qoğam qayratkeri Qwsman Şalabaev kürdeli mäselelerden ayaq alıp jürgisiz uaqıttağı jurnalisterdiñ röline toqtaldı.

Saltanattı marapattau barısında aldımen ıntalandıru sıylığı berilip, sıylıq iegerlerine Wlttıq jurnalistik zertteu ortalığınıñ jetekşisi Därmen Smayıl 20 mıñ teñgelik sertifikatpen, arnayı diplomdardı tabıs etti. Intalandıru sıylığına «Türkistan» gazetiniñ tilşisi Dinara Mıñjasarqızı, «Almatı» arnası «Aqşam alañı» bağdarlamasınıñ avtorı äri jürgizuşisi Ümbetäli Meymeş, «Abai.kz» aqparattıq portalınıñ redaktorı Nwrgeldi Äbdiğaniwlı, «newtimes.kz» saytınıñ arnaulı tilşisi jäne «Ahıska» halıqaralıq gazetiniñ tilşisi Kal'binur Hoşnazarova, «Asıl arna» telearnası «Arnayı reportaj» bağdarlamasınıñ tilşisi Altınbek Rahımberdi ie boldı.

Odan keyin sahnağa «jüzden jüyrik şıqqan» üzdikter köterilip, arnayı nominaciya diplomımen jäne 100 mıñ teñgelik sertifikatpen marapattaldı. Qazılar alqasınıñ şeşimimen «Üzdik televiziyalıq bağdarlama» nominaciyasına «31-arna» telearnası «Sözdiñ şını kerek» bağdarlamasınıñ avtorı Irina Sovetjanqızı, «Merzimdi basılımdardağı qazaq tilindegi eñ üzdik maqala» nominaciyasına «Zañ» gazetiniñ tilşisi Tüymegül Ibaşeva, «Eñ belsendi bloger» nominaciyasına belgili jurnalist Töreğali Täşenov, «Üzdik äleumettik beynerolik» nominaciyasına «31-arna» tilşisi Ardaq Kamal, «Merzimdi basılımdardağı orıs tilindegi eñ üzdik maqala» nominaciyasına «Central Asia Monitor» respublikalıq qoğamdıq-sayasi gazetiniñ tilşisi  Saule Isabaeva, «Üzdik radiobağdarlama» nominaciyasına «Qazaq radioları» JŞS «Almatı» studiyasınıñ redaktor-jürgizuşisi Baqıtjan Jarmwhambet, «Äleumettik jelilerdegi eñ üzdik belsendi qoğamdıq top» nominaciyasına «Instagram», «Feysbuk», «VKontakte» äleumettik jelilerindegi «Biz ekstremizmge qarsımız» paraqşası, «Internet jelisindegi orıs tilindegi eñ üzdik maqala» nominaciyasına «Zakon.kz» jelilik basılımı arnayı reportajdar böliminiñ redaktorı Torğın Nwrseitova, «Internet jelisindegi qazaq tilindegi eñ üzdik maqala» nominaciyasına «Bolaşaq» bağdarlamasınıñ stipendiantı, äleumettanu ğılımdarınıñ magistri Ayswlu Moldabekova layıq dep tanıldı.

“The Qazaq times”