قىتاي ءسىم: رەسمي بەيجىڭ مەن ماسكەۋ ورتالىق ازيادا باسەكەلەس ەمەس

قىتاي مەن رەسەي ورتالىق ازيادا باسەكەلەس ەمەس – دەپ حابارلايدى تاسس اقپارات اگەنتتىگى.

رەسەيدىڭ تاسس اقپارات اگەنتتىگىنىڭ مادىمەتىنشە، قىتاي سىرتقى ىستەر ءمينيسترى ۆان ي اگەنتتىككە بەرگەن سۇحباتىندا رەسمي بەيجىڭ مەن ماسكەۋدىڭ ورتالىق ازياداعى ساياساتىنا قاتىستى پىكىر بىلدىرگەن. وندا ول: «ءبىز ورتالىق ازيادا ۇستەمدىك قۇرۋدى كوزدەمەيمىز. اتالمىش ماسەلەدە جەكەلەگەن كۇشتەر قىتاي مەن رەسەي اراسىنا سىنا قاققىسى كەلەدى. بىراق رەسمي بەيجىڭ مەن ماسكەۋ ورتالىق ازيادا باسەكەلەس ەمەس. رەسەي مەن ورتالىق ازيا ەلدەرىنىڭ قارىم-قاتىناسىنىڭ تاريحى تەرەڭدە. ايماق ەلدەرىنىڭ سىرتقى ساياساتىندا رەسەيدىڭ الاتىن ورنى ەكەكشە. قىتاي ەلى بۇنى جوعارى باعالايدى جانە ۇلكەن قۇرمەتپەن قارايدى» - دەپ مالىمدەگەن.

وسى تۇستا ايتا كەتەتىن ءبىر جايت، سوڭعى ۋاقىتتارى رەسەيلىك جانە الەمدىك باق بەتتەرىندە ورتالىق ازياداعى ۇستەمدىك ءۇشىن قىتاي مەن رەسەي اراسىندا جاسىرىن باسەكەلەستىك ءجۇرىپ جاتقاندىعى جونىندە ءجيى ايتىلۋدا. ونىڭ ۇستىنە حالىقارالىق ۇيىمدار سوڭعى جىلدارى قىتاي بيلىگىنىڭ ورتالىق ازيا ەلدەرىنە ناسيە مەن ينۆەستيتسيانى رەسەيمەن سالىستىرعاندا ەكى-ءۇش ەسەگە كوپ ءبولىپ جاتقاندىعىن الاعا تارتۋدا.

جالپى، قىتاي وسى ۋاقىتقا دەيىن ء"بىر بەلدەۋ - ءبىر جول" جوباسى اياسىندا الەمنىڭ 65 ەلىنە 8 تريلليون دوللاردان استام قارجى قۇيعان. ولاردىڭ ىشىندە ورتالىق ازياداعى قازاقستان، وزبەكستان، قىرعىزستان، تۇركىمەنستان، تاجىكستان دا بار. اقش ساراپشىلارىنىڭ پىكىرىنشە، ورتالىق ازيا ەلدەرى اراسىندا بولاشاقتا قىتاي نەسيەسىن قايتارۋدا قىرعىزستان مەن تاجىكستان ەكونوميكالىق قيىندىقتارعا تاپ بولۋى مۇمكىن. سەبەبى رەسمي بىشكەك پەن دۋشانبە قازىردىڭ وزىندە قىتاي بانكەرىنەن شامادان تىس كوپ نەسيە الىپ ۇلگەرگەن.

"The Qazaq Times"