كاتالونيانىڭ ەكونوميكاسى قۇلدىراۋى مۇمكىن

حالىقارالىق ۆاليۋتا قورى مەن يسپانيا بيلىگى كاتالونيادا بولعان رەفەرەندۋمنىڭ سالدارى اۆتونوميالىق ءوڭىردىڭ ەكونوميكاسىنا كەرى اسەر ەتكەنىن حابارلادى. ەۋروايماقتاعى ەڭ ۇلكەن ءتورتىنشى ەكونوميكاعا كىرەتىن وڭىردە كەلەسى جىلى 2,6 پايىز ءوسىم بولادى دەپ كۇتىلگەن ەدى. پوليتسيا مەن جەرگىلىكتى حالىق اراسىنداعى قاقتىعىس پەن ساياسي تۇراقسىزدىقتىڭ كەسىرىنەن، قازان ايىنىڭ 2-11 ارالىعىندا 540 فيرما ءوز كەڭسەلەرىن كاتالونيادان وزگە جەرگە اۋىستىرعان. 

Standard and Poor's رەيتينگ اگەنتتىگى ساياسي داعدارىس ارى قاراي دا  جالعاسىن تاپسا، كاتالونيانىڭ ەكونوميكاسى رەتسەسسياعا كەتەتىنىن حابارلادى. يسپانيا بيلىگى بەيبىتشىلىكتى بۇزىپ، سەپاراتيستىك قوزعالىستارعا دەم بەرگەنى ءۇشىن كاتالونيانىڭ پرەزيدەنتى كارلەس پۋدجدەمونتتى كىنالاپ وتىر. وسى جىلدىڭ 1 قازانىندا وتكەن رەفەرەندۋم جەڭىسكە جەتكەنىمەن، مادريدپەن ورتاق كەلىسىمگە كەلە الماعان اۆتونوميانىڭ ارى قارايعى قادامدارى ناقتىلانباي وتىر. ورتالىق بيلىك كاتالونيا باسشىلىعىنا كەلەسى بەيسەنبىگە دەيىن ويلانۋعا ۋاقىت بەردى.

ەۋروكوميسسيانىڭ پرەزيدەنتى جان-كلود يۋنكەر: "مەن ەۋرووداقتا 98 مەملەكەت بولعانىن قالامايمىن (كاتالونيا مىسالىندا باسقالار دا تاۋەلسىزدىك سۇراپ، بارلىعىنىڭ ءوتىنىشى قاناعاتتاندىرىلعان جاعدايدا دەگەن بولجامى). ۇلىبريتانيا وداقتان شىققاننان كەيىن 27 مەملەكەت بولامىز. سونىڭ ءوزىن باسقارۋ، ولاردىڭ ماسەلەسىن شەشۋ قيىن. ال 98 مۇشە تۋرالى ءتىپتى ەلەستەتۋ قيىن",  - دەدى.

“The Qazaq Times”