وڭتۇستىك كورەيا پرەزيدەنتى ءمۇن جا-ين

اقش، قىتاي، وڭتۇستىك جانە سولتۇستىك كورەيا ءتورت ەل وتكەن عاسىردىڭ ورتاسىندا باستالعان كورەي سوعىسىنىڭ رەسمي اياقتالعانىن جاريالاۋعا كەلىستى.  بۇل تۋرالى وڭتۇستىك كورەيا پرەزيدەنتى ءمۇن جا-ين اۋستراليا استاناسى كانبەرراداعى رەسمي مالىمدەمەسىندە ورتاعا سالدى.

اۋستراليا-وڭتۇستىك كورەيا ەكىجاقتى ءسامميتى كەزىندە پرەزيدەنت ءمۇن جا-ين سەۋل بيلىگى وڭتۇستىك پەن سولتۇستىك كورەيا اراسىنداعى جانە سولتۇستىك كورەيا مەن اقش اراسىنداعى تىعىرىققا تىرەلگەن كەلىسسوزدەردى قايتا باستاۋعا كۇش سالاتىنىن جەتكىزدى.

دەگەنمەن، پرەزيدەنت ءمۇننىڭ ايتۋىنشا، سولتۇستىك كورەيانىڭ كەيبىر تالاپتارىنا بايلانىستى قازىرگى تاڭدا كەلىسسوزدەر باستالعان جوق.

قىركۇيەك ايىندا سولتۇستىك كورەيانىڭ ەڭ جوعارى باسشىسى كيم جوڭ ۋننىڭ (كيم چەن ىن) قارىنداسى كيم يو جوڭ سولتۇستىك كورەيا كەلىسسوزدەردى قايتا باستاۋ تۋرالى باستامانى قابىل الاتىنىن، بىراق امەريكا قۇراما شتاتتارى  كحدر تۋرالى ساياساتىن وزگەرتۋى كەرەك دەگەندى ايتقان.

قازىرگە دەيىن سولتۇستىك كورەيا امەريكا قۇراما شتاتتارىنىڭ وڭتۇستىك كورەيادا اسكەر ۇستاۋىنا، اقش پەن وڭتۇستىك كورەيانىڭ جىل سايىنعى بىرلەسكەن اسكەري جاتتىعۋلارىنا جانە سولتۇستىك كورەيانىڭ اقش باستاعان قارۋ-جاراق باعدارلاماسىنا سالىنعان سانكتسيالارىنا نارازى بولىپ كەلەدى.

ال، ۋاشينگتون بولسا اقش ءوز سانكتسيالارىن الىپ تاستاۋدان بۇرىن سولتۇستىك كورەيا ءوزىنىڭ يادرولىق قارۋىنان باس تارتۋى كەرەك ەكەنىن قايتالاپ كەلەدى.

وڭتۇستىك كورەيا پرەزيدەنتىنىڭ مالىمدەۋىنشە سولتۇستىك كورەيا اقش-تىڭ وزىنە باعىتتاعان ساياساتىنان باس تارتسا عانا سوعىس توقتاتۋ تۋرالى سوڭعى كەلىسسوزدەرگە كەلۋگە دايىن ەكەنىن ايتقان.

كورەي سوعىسى 1950 جىلى باستالىپ، 1953 جىلى بەيبىتشىلىك كەلىسىمىمەن ەمەس، تەك سوعىس توقتاتۋ بىتىمىمەن عانا توقتاعان بولاتىن. سودان بەرى ەكى كورەيا اراسى سوعىس كۇيىندە بولىپ كەلدى.

ءمۇن جاين وڭتۇستىك كورەيا بيلىگىنە كەلگەننەن بەرى بيلىكتىڭ باسىمدىعىن ەكى كورەيا ورتاسىنداعى قارىم-قاتىناستى جاقسارتۋعا شوعىرلاندىردى. ول بۇعان دەيىن سوعىس توقتاتىپ، بەيبىتشىلىك كەلىسىمىنە كەلۋ سولتۇستىك كورەيانى يادرولىق قارۋدان باس تارتۋعا يتەرمەلەيتىنىن ايتىپ كەلگەن ەدى.

The Qazaq Times