ۋكراينا شەكاراسىنداعى رەسەيدىڭ اسكەرى: اقش شەشىم قابىلداۋدا قيىندىققا ۇشىرادى

جاقىندا رەسەي ۋكراينا شەكاراسىنا تاعى دا اسكەر توپتادى. ۋكراينا ەسەبى بويىنشا شەكاراسىنا جاقىنداعان ورىس اسكەرىنىڭ سانى 90 مىڭ شاماسىندا. اقش سول ۋاقىتتا بۇنى «ەرەكشە جاعداي» دەپ باعالاعان ەدى. انىعىندا، ماسكەۋدىڭ كەزەكتى اسكەري ارەكەتىن، ونىڭ ناقتى ماقساتىن بولجاۋ قيىنعا ءتۇستى. بۇل ءتىپتى اقش شەنەۋنىكتەرىندە شاتاستىرىپ جىبەرگەندەي، سەبەبى، بايدەن ۇكىمەتىنىڭ وعان قارسى شارالارى دا تۇسىنىكسىز بولىپ كورىندى.

شەشىم قابىلداۋداعى قيىندىق

سونىمەن، رەسەيدىڭ بۇل ارەكەتىنە اقش تارابىنان قانداي جاۋاپ قايتارىلۋى مۇمكىن دەگەن سۇراقتى كوپتەگەن اقپارات قۇرالدارى، اسىرەسە ساراپتاما ورتالىقتارى قاراستىرىپ جاتقانى انىق. وسى تۇستا Associated Press اگەنتتىگى كونگرەستەگى بىرقاتار رەسپۋبليكاشىلدار ۇكىمەتتەن ۋكرايناعا اسكەري قولداۋدى كۇشەيتۋدى تالاپ ەتىپ جاتقانى تۋرالى حابارلادى. بىراق، اتالعان اگەنتتىك حابارىنا قاراعاندا بۇل شەشىمگە قارسى كونگرەسمەندەر  «پۋتين جاي عانا ءوزىنىڭ اسكەري قۋاتىن كورسەتىپ وتىرعان بولسا، اقش-تىڭ ۋكرايناعا اسكەري قولداۋىن كۇشەيتۋى اۋقىمدى قاقتىعىسقا اينالدىرىپ جىبەرۋى مۇمكىن» دەگەن ءۋاجدى العا تارتقان. ولاردىڭ پىكىرىنشە بۇل ۋكرايناعا ءتىپتى دە قاۋىپتى شەشىم بولماق.

ۋكراينا ماسەلەسىندە ۋاشينگتوننىڭ ەكىۇداي تاڭداۋلار ورتاسىندا قالاتىنى بەلگىلى. ەگەر قۇراما شتاتتاردىڭ جاۋابى پارمەندى بولماعان جاعدايدا بۇل ءپۋتيننىڭ ۋكرايناعا قاراتا اگرەسسيۆتى ارەكەتكە دەگەن تاۋەكەلىن كۇشەيتىپ جىبەرەدى. كوپ جىلدان بەرى پۋتين «ۋكراينا ماسەلەسىن ءبىر جولاتا شەشۋدىڭ» شاراسىن تاپپاي شارق ۇرىپ كەلگەنى بەلگىلى. ال، ۋكراينا ماسەلەسى بويىنشا پۋتين دەگەنىنە جەتەر بولسا، بۇل بايدەننىڭ بيلىكتەگى رەيتينگىن مۇلدە تومەندەتىپ جەبەرمەك.

ءتۇيىن قايدا جاتىر؟

ماسەلە – ماسكەۋدىڭ نەنى كوزدەپ وتىرعانىندا. ەگەر، بايدەن اكىمشىلىگى ءپۋتيننىڭ ون مىڭداعان اسكەرىن ۋكراينا شەكاراسىنا جيناعاندا نەگە قول جەتكىزگىسى كەلگەنىن تۇسىنە السا، وندا وعان قارسى تەڭەستىرۋ شارالارى دا وزدىگىنەن تۇسىنىكتى بولماق. اڭگىمەدە تاپ سوندا، اقش شەنەۋنىكتەرى ءپۋتيننىڭ ارەكەتىندەگى نەگىزگى ءتۇيىندى ءالى تابا الماعانداي.

وتكەن سارسەنبىدە: «ءپۋتيننىڭ نە ىستەپ جاتقانىن بىلمەيمىز»، – دەپ مويىندادى اقش قورعانىس ءمينيسترى للويد وستين. ونىڭ ايتۋىنشا قۇراما شتاتتار تارابى قازىر تەك ماسكەۋدى جاۋاپكەرشىلىكپەن ارەكەت ەتۋگە جانە اشىقتىققا كەلۋگە شاقىرىپ قانا وتىر.

پەنتاگون باسشىسىنان كورى مەم.حاتشى انتوني بلينكەننىڭ جاۋابى تولىعىراق بولدى، ول بۇل تۋرالى پىكىرىندە: «ءبىز ماسكەۋدىڭ كەزەكتى ماقساتىن بىلمەيمىز، بىراق ءبىز رەسەيدىڭ مىنەز-قۇلقىن بىلەمىز»، – دەگەن. قالاي بولماسىن اقش شەنەۋنىكتەرى اراسىندا ماسكەۋدىڭ بۇل ارەكەتىن، ماقساتى مەن تۇپكىلىكتى نيەتىن انىقتاۋ ءۇشىن پىكىر-تالاس بولىپ جاتىر. ولار الدىمەن ءپۋتيننىڭ نەنى كوزدەپ وتىرعانىن تابۋعا تىرىسۋدا، ۇيتكەنى بۇل قاۋىپتى قاقتىعىستاردىڭ الدىن الۋى مۇمكىن.

اقش-تىڭ شەشىم قابىلداۋ قابىلەتى سىناقتا

رەسمي مالىمدەمەلەر مەن اقپارات قۇرالدارىنداعى ساراپتامالارعا سايكەس، قۇراما شتاتتاردىڭ بارلاۋ قىزمەتى ناقتى مالىمەتكە قول جەتكىزە الماعان. كەم جاۋاپ قارسىلاسىن كۇشەيتىپ، ءوزىن ىرىقسىز ورىنعا قالدىرادى; ارتىق جاۋاپ قاۋىپتى جانە تولىق دايىن بولماعان ۇرىسقا الىپ كىرۋى دە عاجاپ ەمەس. سوندىقتان دا، ۋاشينگتون شەشىم قابىلداۋدىڭ ۋاقىتتىڭ داعدارىسىندا تۇر. اسىرا ايتقاندا، قۇراما شتاتتار ءۇشىن بۇل وتە سيرەك كەزدەسەتىن جاعداي جانە وسىنداي جاعدايدا تۋرا شەشىم قابىلداۋداعى قابىلەتىن سىناۋعا دا مۇمكىندىك تۋىپ وتىر.

اق ۇيگە قورعانىس قاۋىپسىزدىگى بويىنشا ماڭىزدى كەڭەس بەرۋشى شتاب باستىقتارىنىڭ بىرىككەن كوميتەتىنىڭ توراعاسى مارك ميللي ۋكراينا قارۋلى كۇشتەرىنىڭ باس قولباسشىسى ۆالەري زالۋجنىيمەن تەلەفون ارقىلى سويلەسكەننەن كەيىن، اق ۇيگە ايماقتاعى وداقتاستارمەن جانە سەرىكتەرمەن تىعىز كونسۋلتاتسيا جۇرگىزۋ كەرەك دەگەن كەڭەسىن بەردى. سونىمەن ءبىر ۋاقىتتا اقش-تىڭ بىرنەشە اسكەري كەمەلەر قارا-تەڭىزگە بەت الدى.

ءپۋتيننىڭ ءباسپاسوز وكىلى پەسكوۆ ءوز مالىمدەمەسىندە «رەسەي ءوز شەشىمەن بايلانىستى تەك ءوز تەرريتورياسىندا عانا اسكەر توپتاپ جاتىر جانە ول ەشبىر ەلگە قاۋىپ توندىرمەيتىنىن» ايتقان-دى. بىراق، كرەملدىڭ سوزىنە سەنە بەرمەۋ كەرەكتىگىن وتكەن عاسىر كوبىرەك دالەلدەگەن عوي. ونىڭ ۇستىنە رەسەيدىڭ ۋكرايناعا جاقىن اۋماقتا اسكەر توپتاۋى بيىلدىڭ وزىندە ەكىنشى رەت بولىپ وتىر. ساۋىردە 150 مىڭ ورىس جاۋنگەرى ۋكراينا شەكاراسىنا جاقىن جينالىپ، ناتو مۇشەلەرىن الاڭداتىپ تاستاپ ەدى.

The Qazaq Times