Jaqında Resey Ukraina şekarasına tağı da äsker toptadı. Ukraina esebi boyınşa şekarasına jaqındağan orıs äskeriniñ sanı 90 mıñ şamasında. AQŞ sol uaqıtta bwnı «erekşe jağday» dep bağalağan edi. Anığında, Mäskeudiñ kezekti äskeri äreketin, onıñ naqtı maqsatın boljau qiınğa tüsti. Bwl tipti AQŞ şeneunikterinde şatastırıp jibergendey, sebebi, Bayden ükimetiniñ oğan qarsı şaraları da tüsiniksiz bolıp körindi.

Şeşim qabıldaudağı qiındıq

Sonımen, Reseydiñ bwl äreketine AQŞ tarabınan qanday jauap qaytarıluı mümkin degen swraqtı köptegen aqparat qwraldarı, äsirese saraptama ortalıqtarı qarastırıp jatqanı anıq. Osı twsta Associated Press agenttigi Kongrestegi birqatar respublikaşıldar ükimetten Ukrainağa äskeri qoldaudı küşeytudi talap etip jatqanı turalı habarladı. Biraq, atalğan agenttik habarına qarağanda bwl şeşimge qarsı kongresmender  «Putin jay ğana öziniñ äskeri quatın körsetip otırğan bolsa, AQŞ-tıñ Ukrainağa äskeri qoldauın küşeytuı auqımdı qaqtığısqa aynaldırıp jiberui mümkin» degen uäjdi alğa tartqan. Olardıñ pikirinşe bwl Ukrainağa tipti de qauipti şeşim bolmaq.

Ukraina mäselesinde Uaşingtonnıñ ekiwday tañdaular ortasında qalatını belgili. Eger Qwrama Ştattardıñ jauabı pärmendi bolmağan jağdayda bwl Putinniñ Ukrainağa qarata agressivti äreketke degen täuekelin küşeytip jiberedi. Köp jıldan beri Putin «Ukraina mäselesin bir jolata şeşudiñ» şarasın tappay şarq wrıp kelgeni belgili. Al, Ukraina mäselesi boyınşa Putin degenine jeter bolsa, bwl Baydenniñ biliktegi reytingin mülde tömendetip jebermek.

Tüyin qayda jatır?

Mäsele – Mäskeudiñ neni közdep otırğanında. Eger, Bayden äkimşiligi Putinniñ on mıñdağan äskerin Ukraina şekarasına jinağanda nege qol jetkizgisi kelgenin tüsine alsa, onda oğan qarsı teñestiru şaraları da özdiginen tüsinikti bolmaq. Äñgimede tap sonda, AQŞ şeneunikteri Putinniñ äreketindegi negizgi tüyindi äli taba almağanday.

Ötken särsenbide: «Putinniñ ne istep jatqanın bilmeymiz», – dep moyındadı AQŞ qorğanıs ministri Lloyd Ostin. Onıñ aytuınşa Qwrama Ştattar tarabı qazir tek Mäskeudi jauapkerşilikpen äreket etuge jäne aşıqtıqqa keluge şaqırıp qana otır.

Pentagon basşısınan köri mem.hatşı Antoni Blinkenniñ jauabı tolığıraq boldı, ol bwl turalı pikirinde: «Biz Mäskeudiñ kezekti maqsatın bilmeymiz, biraq biz Reseydiñ minez-qwlqın bilemiz», – degen. Qalay bolmasın AQŞ şeneunikteri arasında Mäskeudiñ bwl äreketin, maqsatı men tüpkilikti nietin anıqtau üşin pikir-talas bolıp jatır. Olar aldımen Putinniñ neni közdep otırğanın tabuğa tırısuda, üytkeni bwl qauipti qaqtığıstardıñ aldın aluı mümkin.

AQŞ-tıñ şeşim qabıldau qabileti sınaqta

Resmi mälimdemeler men aqparat qwraldarındağı saraptamalarğa säykes, Qwrama Ştattardıñ barlau qızmeti naqtı mälimetke qol jetkize almağan. Kem jauap qarsılasın küşeytip, özin ırıqsız orınğa qaldıradı; artıq jauap qauipti jäne tolıq dayın bolmağan wrısqa alıp kirui de ğajap emes. Sondıqtan da, Uaşington şeşim qabıldaudıñ uaqıttıñ dağdarısında twr. Asıra aytqanda, Qwrama Ştattar üşin bwl öte sirek kezdesetin jağday jäne osınday jağdayda tura şeşim qabıldaudağı qabiletin sınauğa da mümkindik tuıp otır.

Aq üyge qorğanıs qauipsizdigi boyınşa mañızdı keñes beruşi Ştab bastıqtarınıñ birikken komitetiniñ törağası Mark Milli Ukraina Qarulı küşteriniñ bas qolbasşısı Valeriy Zalujnıymen telefon arqılı söyleskennen keyin, Aq üyge aymaqtağı odaqtastarmen jäne seriktermen tığız konsultaciya jürgizu kerek degen keñesin berdi. Sonımen bir uaqıtta AQŞ-tıñ birneşe äskeri kemeler Qara-teñizge bet aldı.

Putinniñ baspasöz ökili Peskov öz mälimdemesinde «Resey öz şeşimen baylanıstı tek öz territoriyasında ğana äsker toptap jatır jäne ol eşbir elge qauip töndirmeytinin» aytqan-dı. Biraq, Kreml'diñ sözine sene bermeu kerektigin ötken ğasır köbirek däleldegen ğoy. Onıñ üstine Reseydiñ Ukrainağa jaqın aumaqta äsker toptauı biıldıñ özinde ekinşi ret bolıp otır. Säuirde 150 mıñ orıs jaungeri Ukraina şekarasına jaqın jinalıp, NATO müşelerin alañdatıp tastap edi.

The Qazaq Times