15 جىل اباقتىدا وتىرعان ارون اتابەك جەدەل جاردەممەن اۋرۋحاناعا ءتۇستى

5 قازاندا ديسسيدەنت ءارى اقىن ارون اتابەكءتىڭ «تىنىسى تارىلىپ، جوتەل قىسىپ» جەدەل جاردەممەن الماتىداعى اۋرۋحاناعا جەتكىزىلگەن. بۇل جايلى ونىڭ جاقىندارى مەن بەلسەندىلەرگە بايلانىسقان ازاتتىق راديوسى حابارلادى.  

قازاننىڭ 1-ىنە دەيىن تاۋەلسىز قۇقىق قورعاۋشىلار «ساياسي تۇتقىن» رەتىندە ەسەپتەپ كەلگەن ديسسيدەنت ارون اتابەكتە پاۆلودارداعى تۇرمەدەن «كەلمەس بۇرىن جوتەل پايدا بولعان». ونى قارسى العان قولداۋشىلاردىڭ ءبىرى ايسۇلۋ ابۋباكىروۆانىڭ (الەۋمەتتىك جەلىدە «اسيا اسەتكينا» دەگەن اتپەن بەلگىلى) ايتۋىنشا، تۇرمەدەن جوتەلىپ كەلگەن اتابەكتىڭ جوتەلى بۇگىن ۇدەي تۇسكەن.

تىنىستاۋى قيىنداپ، جوتەلى جيىلەگەن سوڭ الماتىداعى قارىنداسىنىڭ ۇيىندە جاتقان اتابەككە تۋىستارى جەدەل جاردەم شاقىرتقان. بريگادا دارىگەرلەرى قانداعى ساتۋراتسياسىن ولشەپ، تومەن ەكەنىن كورىپ، بىردەن اۋرۋحاناعا الىپ كەتكەن.

ارون اتابەكتىڭ قارىنداسى ءرازيا نۋتۋشەۆانىڭ ازاتتىق راديوسىنا بەرگەن پىكىرىنە قاراعاندا، اقىننىڭ وكپەسى تارىلعان، «جوتەلۋگە ءالى جوق». ونىڭ ايتۋىنشا، اعاسىنىڭ دەرتى كوروناۆيرۋسقا ۇقسامايدى، بىراق «وكپەسىنە سۋ جينالعان سياقتى». جەدەل جاردەم دارىگەرلەرى اتابەكتىڭ جاعدايى اۋىر دەپ، ونى وتتەگى اپپاراتىنا قوسقان.

16 جىلعا جۋىق قاپاستا بولعان ارون اتابەك ءوزىنىڭ جازىقسىز ايىپتالعانىن ايتادى. قۇقىق قورعاۋشىلار دا ونى «ار-وجدان تۇتقىنى» رەتىندە «سوتتالۋىنىڭ ساياسي استارى بار» دەپ ەسەپتەيدى. ۇزاق جىلدار بويى جالعىزكىسىلىك اباقتىدا «ءتۇرلى ازاپتاۋعا ۇشىرادىم» دەگەن اتابەكتىڭ دەنساۋلىعى قاتتى ناشارلاۋىنا بايلانىستى ءارى ازاماتتىق قوعامنىڭ تاباندى تالابىنان كەيىن قازاقستان بيلىگى 1 قازان كۇنى شارتتى تۇردە مەرزىمىنەن بۇرىن بوساتقان. ول «ناقاق سوتتالعان» ءوزىن تولىق اقتاپ، وتەماقى تولەۋدى تالاپ ەتەدى. الماتىعا كەلگەن كۇنى 68 جاستاعى ديسسيدەنت اۋرۋحانادان اۋەجايعا «الداپ جەتكىزگەن» بيلىكتى سىناعان.

ارون اتابەك 2006 جىلى الماتىداعى «شاڭىراق» وقيعاسىنان كەيىن 18 جىلعا سوتتالىپ، پوليتسەيدىڭ ولىمىنە اكەپ سوققان تارتىپسىزدىكتەر ۇيىمداستىردى دەپ ايىپتالعان. كەيىنگى  جىلدارى قۇقىق قورعاۋشىلار 68 جاستاعى ديسسيدەنتتىڭ دەنساۋلىعىنىڭ ناشارلاۋىنا الاڭداپ، دەرەۋ بوساتۋ تۋرالى باستاما كوتەرگەن. بيىل تامىز ايىندا اتابەكپەن تۇرمەدە كەزدەسكەننەن كەيىن ۇلتتىق الدىن الۋ تەتىگىنىڭ قاتىسۋشىلارى اقىننىڭ جاعدايى مۇشكىل ەكەنىن حابارلاعان ەدى.

The Qazaq Times