«ارون اتابەك جانساقتاۋ بولىمىنە ءتۇستى»

وسى ايدىڭ باسىندا 15 جىل بويعى اباقتى جازاسىنان كەيىن شارتتى تۇردە بوساتىلعان ديسسيدەنت اقىن، بەلسەندى ارون اتابەك رەانيماتسياعا تۇسكەنى حابارلاندى. بۇل تۋرالى ازاتتىق راديوسىنا ارون اتابەكتىڭ قارىنداسى ءرازيا نۋتىشەۆا مالىمدەگەن.

بەلسەندىنىڭ تۋىسى ونىڭ دەنساۋلىعى وتكەن اپتانىڭ سوڭىنا قاراي ناشارلاپ، جەدەل جاردەممەن جەكە كلينيكاعا جاتقىزىلعانىن حابارلاعان.

«قازىر جاعدايى ونشا ەمەس. تاماق ىشە المايدى. اۋرۋى اسقىنىپ جاتىر. الگىندە اۋرۋحانادان شىققاننان كەيىن ون كۇندەي ۇيدە ەمدەدىك قوي. ول كىسى اۋرۋحاناعا جاتۋدان باس تارتقان. ۇيدە ەمدەلگەننەن كەيىن جاعدايى ءتىپتى ناشارلاپ كەتتى. ول ادەتتە ەشتەڭەگە شاعىمدانبايتىن. وتكەن جۇمادا تىنىسى تارىلىپ جاتقانىن ايتتى. قورقىپ كەتتىم. ءتۇرى دە ونشا ەمەس بولىپ تۇردى. «جەكە كلينيكامەن كەلىسىم جاساستىم، اۋرۋحاناعا جاتاسىڭ با» دەپ ەدىم. اۋرۋى جانىنا باتسا كەرەك، «ءيا» دەدى. ءسۇيتىپ، جەدەل جاردەم كولىگىن شاقىردىم. اۋرۋحاناعا جاتقىزدى»، – دەگەن ءرازيا نۋتىشەۆا ازاتتىق تىلشىسىنە ايتقان سوزىندە.

اقپاراتقا قاراعاندا، ارون اتابەك قازىر جاساندى اپپاراتتىڭ كومەگىمەن تىنىستاپ جاتىر. اۋرۋحاناعا كەلگەننەن كەيىن «جاعدايى ءسال دە بولسا وڭالعان». سوندا «ەسىن جيىپ، ءوز-وزىنە كەلگەننەن كەيىن قايتا ۇيگە بارعىسى كەلىپ وتىر» دەيدى. ءتارتىپ بويىنشا رەانيماتسيا بولىمىنە دارىگەرلەر ەشكىمدى كىرگىزبەيدى. سول سەبەپتى قارىنداسى باۋىرىنىڭ جاعدايىن دارىگەرلەر ارقىلى ءبىلىپ وتىرعانىن ايتتى.

2006 جىلعى شاڭىراق وقيعاسىنان كەيىن 18 جىلعا سوتتالعان، ءوزىن «جازىقسىز» ەكەنىن ايتىپ، قۇقىق قورعاۋشىلار «ساياسي تۇتقىن» دەپ تانىعان ديسسيدەنت-اقىن ارون اتابەكتى پاۆلودار سوتى 16 جىلعا جۋىق ۋاقىتتان كەيىن بيىل دەنساۋلىق جاعدايى ناشارلاۋىنا بايلانىستى تۇرمەدەن بوساتقان. بيىل ازاماتتىق قوعامنىڭ بەلسەندىنى دەرەۋ بوساتۋ تۋرالى تالابى ۇدەگەن سوڭ بيلىك ونىڭ سۇراۋىنسىز جازاسىن شارتتى تۇرگە اۋىستىرىپ، الماتى قالاسىنا بەيحابار حالدە ۇشاقپەن جەتكىزگەن. وسىعان دەيىن بەلسەندىنىڭ تۇرمەدەن پنەۆمونياعا شالدىعىپ كەلگەنى ايتىلعان. ءتىپتى ەكى اپتا بۇرىن ءحالى قيىنداپ اۋرۋحاناعا تۇسكەن.

The Qazaq Times