Aron Atabektiñ sot procesi (2006 j.) jäne biıl bosatılğan (2021 j.) kezdegi sureti. Fotokollaj: Orda.kz

5 qazanda dissident äri aqın Aron Atabektiñ «tınısı tarılıp, jötel qısıp» jedel järdemmen Almatıdağı auruhanağa jetkizilgen. Bwl jaylı onıñ jaqındarı men belsendilerge baylanısqan Azattıq radiosı habarladı.  

Qazannıñ 1-ine deyin täuelsiz qwqıq qorğauşılar «sayasi twtqın» retinde eseptep kelgen dissident Aron Atabekte Pavlodardağı türmeden «kelmes bwrın jötel payda bolğan». Onı qarsı alğan qoldauşılardıñ biri Ayswlu Äbubäkirovanıñ (äleumettik jelide «Asya Asetkina» degen atpen belgili) aytuınşa, türmeden jötelip kelgen Atabektiñ jöteli bügin üdey tüsken.

Tınıstauı qiındap, jöteli jiilegen soñ Almatıdağı qarındasınıñ üyinde jatqan Atabekke tuıstarı jedel järdem şaqırtqan. Brigada därigerleri qandağı saturaciyasın ölşep, tömen ekenin körip, birden auruhanağa alıp ketken.

Aron Atabektiñ qarındası Räziya Nutuşevanıñ Azattıq radiosına bergen pikirine qarağanda, aqınnıñ ökpesi tarılğan, «jöteluge äli joq». Onıñ aytuınşa, ağasınıñ derti koronavirusqa wqsamaydı, biraq «ökpesine su jinalğan siyaqtı». Jedel järdem därigerleri Atabektiñ jağdayı auır dep, onı ottegi apparatına qosqan.

16 jılğa juıq qapasta bolğan Aron Atabek öziniñ jazıqsız ayıptalğanın aytadı. Qwqıq qorğauşılar da onı «ar-ojdan twtqını» retinde «sottaluınıñ sayasi astarı bar» dep esepteydi. Wzaq jıldar boyı jalğızkisilik abaqtıda «türli azaptauğa wşıradım» degen Atabektiñ densaulığı qattı naşarlauına baylanıstı äri azamattıq qoğamnıñ tabandı talabınan keyin Qazaqstan biligi 1 qazan küni şarttı türde merziminen bwrın bosatqan. Ol «naqaq sottalğan» özin tolıq aqtap, ötemaqı töleudi talap etedi. Almatığa kelgen küni 68 jastağı dissident auruhanadan äuejayğa «aldap jetkizgen» bilikti sınağan.

Aron Atabek 2006 jılı Almatıdağı «Şañıraq» oqiğasınan keyin 18 jılğa sottalıp, policeydiñ ölimine äkep soqqan tärtipsizdikter wyımdastırdı dep ayıptalğan. Keyingi  jıldarı qwqıq qorğauşılar 68 jastağı dissidenttiñ densaulığınıñ naşarlauına alañdap, dereu bosatu turalı bastama kötergen. Biıl tamız ayında Atabekpen türmede kezdeskennen keyin Wlttıq aldın alu tetiginiñ qatısuşıları aqınnıñ jağdayı müşkil ekenin habarlağan edi.

The Qazaq Times