كارتوپ پەن ءسابىز باعاسىنىڭ قىمباتتاۋىن باقىت سۇلتانوۆ ءتۇسىندىردى

قازاقستاندا جىل باسىنان بەرى الەۋمەتتىك ماڭىزى بار ازىق-تۇلىك تاۋارلارى 6,3 پايىزعا قىمباتتاعان. باعاسى قاتتى وسكەن ازىق-تۇلىك ونىمدەرىنىڭ تىزىمىندە الدىڭعى ورىنداردا ءسابىز (145%), كارتوپ (138%), شەمىشكە مايى (116%), پياز (110%), قانت (109%), قاراقۇمىق (107%) تۇر.

قىمباتشىلىق اسىرەسە تۇركىستان وبلىسى، نۇر-سۇلتان، الماتى قالالارىندا قاتتى بايقالعان. بۇل تۋرالى بەيسەنبى كۇنى ۇكىمەت وتىرىسىندا ساۋدا جانە ينتەگراتسيا ءمينيسترى باقىت سۇلتانوۆ حابارلادى.

ەلدە كارتوپ جانە ءسابىزدىڭ تاپشىلىعى سەزىلىپ جاتقانىن ايتقان مينيستر اۋىل شارۋاشىلىعى مينيسترلىگى مەن جەرگىلىكتى اتقارۋ ورگاندارى جىل سايىن قايتالاناتىن قۇبىلىسپەن دۇرىس كۇرەسپەي وتىرعانىن جەتكىزدى.

مىسالى، ەلدە كارتوپتىڭ تاۋارلى ءوندىرىسى 1,9 ملن توننانى (جالپى ءونىم كولەمىنىڭ 47 پايىزى) قۇرايدى. ونىڭ 19 پايىزى ەكسپورتقا كەتەدى. بۇل كارتوپ تاپشىلىعىنا اپارادى دەيدى مينيستر.

"بىلتىر 360 مىڭ توننا كارتوپ ەكسپورتقا شىعارىلىپ، رەكوردتىق كورسەتكىشكە جەتتى. وسىلايشا كارتوپ ەكسپورتىنىڭ ۇلەسى تاۋارلى ءوندىرىستىڭ 19 پايىزىن قۇرادى. سونىڭ سالدارىنان دۇكەندەردە كارتوپ تاپشىلىعى پايدا بولدى. تاپشىلىق سايكەسىنشە ماۋسىمارالىق كەزەڭدە كارتوپتى يمپورتتاۋ قاجەتتىلىگىن تۋدىرادى. بۇل نارسە جىل سايىن قايتالانادى. بىراق اۋىل شارۋاشىلىعى مينيسترلىگى، اتقارۋ ورگاندارى اتالعان پروبلەمانى جويۋ ءۇشىن قاجەتتى شارالار قولدانىپ وتىرعان جوق. بىلتىر كارتوپ ەكسپورتىنا تىيىم سالعاننان كەيىن باعانى تۇراقتاندىرا الدىق" دەدى مينيستر.

ونىڭ سوزىنە قاراعاندا، وتاندىق ونىمدەردى تومەن باعامەن ەكسپورتقا شىعارۋ جىل باسىنان بەرى ءونىم قورىن ءۇش رەت ازايتىپ جىبەرگەن. ونى تولتىرۋ ءۇشىن وسى ۋاقىت ارالىعىندا يران جانە پاكىستاننان 28 مىڭ توننا – وتاندىق ونىمنەن ءۇش ەسە قىمبات كارتوپ يمپورتتالعان. مينيستر اكىمدىكتەردى ىشكى نارىقتاعى كارتوپ سۇرانىسىن قامتاماسىز ەتە الماي وتىر دەپ كىنالادى. تۇراقتاندىرۋ قورلارىنا دا كارتوپتىڭ جەتكىلىكتى قورى ساتىپ الىنباعان.

ء"سابىز بويىنشا جاعداي ونان دا كۇردەلى. قازىر وتاندىق ءونىمنىڭ قورى بىلتىرمەن سالىستىرعاندا 5,3 پايىزعا ازايعان" دەدى سۇلتانوۆ.

وسىعان وراي ساۋدا ءمينيسترى اۋىل شارۋاشىلىعى مينيسترلىگىنە تەز ارادا يمپورت، ەكسپورت، ءوندىرىس، قور كولەمى مەن ازىق-تۇلىك ونىمدەرىنىڭ بالانسى بويىنشا بولجام ازىرلەۋ قاجەتتىگىن تاپسىرۋدى ۇسىندى. ول اكىمدىكتەر "فورۆاردىق كەلىسىمگە" (ساتىپ الۋشى مەن ساتۋشى اراسىندا بەلگىلى ءبىر ءونىمدى الۋ جونىندە جاسالاتىن الدىن الا كەلىسىم) جۇمسالاتىن قارجى كولەمىن 10 ملرد تەڭگەگە دەيىن جەتكىزۋى ءتيىس، ال "اينالىم سحەماسىنا" (ساۋدا جەلىلەرى باعانى ۇستاپ تۇرۋعا تىرىسىپ، ەسەسىنە نەسيە الۋدا جەڭىلدىككە يە بولادى) 50 ملرد تەڭگە ءبولۋى ءتيىس دەدى.

بۇعان دەيىن ەلدە ءسابىز بەن كارتوپ باعاسىنىڭ كيلوگرامى 400-500 تەڭگەگە جەتكەنى حابارلانعان ەدى.

"The Qazaq Times"