قازاقستاننىڭ حالىق پارتياسى باعا وسىمىنە قارسى جۇرگىزىلگەن  كۇرەستىڭ تيىمسىزدىگىنەن جانە ينفلياتسيالىق جاسىرىن سالىقتىڭ سالدارىنان قاراپايىم جۇرت شىعىنعا باتتى دەپ ەسەپتەيدى.

قحپ دەپۋتاتى ايقىن قوڭىروۆ بۇگىنگى ءماجىلىس وتىرىسىندا ۇكىمەتتىڭ ينفلياتسياعا قارسى كۇرەس ساياساتى دۇرىس سيپاتتا جۇرگىزىلمەۋىن سىناپ، بۇدان حالىقتىڭ زارداپ شەگىپ وتىرعانىن مالىمدەدى. فراكتسيا دەپۋتاتتارى ۆيتسە-پرەمەر ءاليحان سمايىلوۆقا ينفلياتسيامەن كۇرەستە جىبەرىلگەن قاتەلىكتەر ءۇشىن كىمدەردىڭ جاۋاپقا تارتىلعانى جونىندە سۇراۋ جولدادى.

«شىنايى جاعدايدى كورىپ وتىرعانىمىز. پارتيا سايلاۋشىلارى رەسمي ستاتيستيكا مالىمەتتەرى مەن نارىقتاعى باعانىڭ ايىرماشىلىعى ايتىپ ءجيى شاعىمدانادى. رەسمي ەسەپتە كورسەتىلگەندەي، ازىق-تۇلىك باعاسىنىڭ 11,04% -عا قىمباتتاۋى ماسقارا جاعداي! شىنداپ كەلگەندە بۇل كەمىتىلگەن كورسەتكىش، سونىڭ وزىندە سوراقى. حالىق تۇتىناتىن اسا ماڭىزدى تاۋارلار 50%-عا دەيىن قىمباتتاعان. سوندا دەكلاراتسيالىق قۇجاتتار ورىندالماسا، ونىڭ قاجەتى بار؟ ينفلياتسيا بولجامىنىڭ ءساتسىز شىعۋىنا جاۋاپتىلار ءلام-ميم دەگەن ءسوز جوق، نەگە ەشكىم جاۋاپ بەرمەيدى؟» – دەپ سۇرادى دەپۋتات.

قازىر قىمباتشىلىقتىڭ بار سەبەبىن الەمدىك قۇبىلىسقا ىسىرىپ، اقتايتىن اتقامىنەرلەر كوپ. دەگەنمەن پاندەميا جاعدايىنىڭ ىقپالى مەن سىرتقى فاكتورلاردان تىس سالالاردا دا نەگىزسىز ءوسىم بايقالادى.

«سۇرانىستىڭ توسىننان جىلدام ءوسۋى قۇبىلىسىنا بايلانىستى قازاقستاندا جاعداي مۇلدە باسقا. سەبەبى ازاماتتاردىڭ تابىسى ايتارلىقتاي ارتقا قويعان جوق. ءداندى-داقىلدار: كارتوپ، كۇنباعىس مايى مەن جۇمىرتقاعا سۇرانىس باياعىشا وزگەرىسسىز. كوپتەگەن تاۋارلار بويىنشا الەمدىك نارىققا تاۋەلدى ەمەسپىز. ەلىمىزدە ءداندى-داقىلدار ءوندىرىسى ىشكى نارىقتىڭ 96,4%-ىن، ال وسىمدىك مايى 80,5%-دى قامتاماسىز ەتەدى. سوعان قاراماستان، ءداندى-داقىلدار 22%-عا، وسىمدىك مايى 52%-عا  ءوستى» – دەدى ايقىن قوڭىروۆ.

فراكتسيا جەتەكشىسى وسىلايشا كاسىپكەرلەر يمپورتقا تاۋەلسىز تاۋارلارىن نەگىزسىز قىمباتتاتىپ، حالىقتىڭ قالتاسىنا سالماق سالۋ ارقىلى ەسەلەپ تابىسقا كەنەلىپ جاتقانىن ايتادى. ول مۇنى «ينفلياتسيالىق بەيرەسمي-جاسىرىن سالىق» دەپ اتادى. حالىقتىڭ تابىسى ورتايىپ، ينفلياتسيا ارتقاندىقتان، وتباسىلىق بيۋدجەتتىڭ باسىم بولىگىن كۇندەلىكتى ازىق-تۇلىك ونىمىنە جۇمساۋعا ءماجبۇر.

پارتيا كەلتىرگەن دەرەككە سايكەس، بيىل قاڭتار-شىلدە ايلارىنىڭ ارالىعىندا حالىقتىق تۇتىنۋ ونىمدەرىنىڭ ينفلياتسيا ءوسىمى 245 ملرد تەڭگەگە جەتكەن. ۇكىمەتتىڭ ناتيجەسىز ينفلياتسياعا قارسى كۇرەسى تۋرالى دەپۋتاتتار بىرنەشە ماسەلەنى كۇن تارتىبىندە دەرەۋ قولعا الۋدى تاپسىردى.

قازاقستاننىڭ وسى زامانعى جاڭا تاريحىندا 2021 جىل ەكونميكالىق جانە حالىقتىڭ الەۋمەتتىك تۇرمىس-احۋالى جاعىنان ەڭ اۋىر ۋاقىت رەتىندە ءوتىپ جاتىر. ەلدە جۇمىسشىلار تابى تابىستى ارتتىرۋ، ەڭبەك جاعدايىن جاقسارتۋ تالابىمەن ونداعان ەرەۋىل وتكىزدى، ءالى دە جالعاسىپ جاتقانى بار. ساراپشىلار جۇرتتىڭ تۇرمىسى ابدەن ناشارلاپ، كەدەيلىك شەگىنىڭ ارتقانىن، جۇمىسى تۇرالاعانىن ايتىپ دابىل قاعىپ كەلەدى.

The Qazaq Times