Körneki suret. Foto: Patlah.ru

Qazaqstanda jıl basınan beri äleumettik mañızı bar azıq-tülik tauarları 6,3 payızğa qımbattağan. Bağası qattı ösken azıq-tülik önimderiniñ tiziminde aldıñğı orındarda säbiz (145%), kartop (138%), şemişke mayı (116%), piyaz (110%), qant (109%), qaraqwmıq (107%) twr.

Qımbatşılıq äsirese Türkistan oblısı, Nwr-Swltan, Almatı qalalarında qattı bayqalğan. Bwl turalı beysenbi küni ükimet otırısında sauda jäne integraciya ministri Baqıt Swltanov habarladı.

Elde kartop jäne säbizdiñ tapşılığı sezilip jatqanın aytqan ministr auıl şaruaşılığı ministrligi men jergilikti atqaru organdarı jıl sayın qaytalanatın qwbılıspen dwrıs kürespey otırğanın jetkizdi.

Mısalı, elde kartoptıñ tauarlı öndirisi 1,9 mln tonnanı (jalpı önim köleminiñ 47 payızı) qwraydı. Onıñ 19 payızı eksportqa ketedi. Bwl kartop tapşılığına aparadı deydi ministr.

"Bıltır 360 mıñ tonna kartop eksportqa şığarılıp, rekordtıq körsetkişke jetti. Osılayşa kartop eksportınıñ ülesi tauarlı öndiristiñ 19 payızın qwradı. Sonıñ saldarınan dükenderde kartop tapşılığı payda boldı. Tapşılıq säykesinşe mausımaralıq kezeñde kartoptı importtau qajettiligin tudıradı. Bwl närse jıl sayın qaytalanadı. Biraq auıl şaruaşılığı ministrligi, atqaru organdarı atalğan problemanı joyu üşin qajetti şaralar qoldanıp otırğan joq. Bıltır kartop eksportına tıyım salğannan keyin bağanı twraqtandıra aldıq" dedi ministr.

Onıñ sözine qarağanda, otandıq önimderdi tömen bağamen eksportqa şığaru jıl basınan beri önim qorın üş ret azaytıp jibergen. Onı toltıru üşin osı uaqıt aralığında Iran jäne Päkistannan 28 mıñ tonna – otandıq önimnen üş ese qımbat kartop importtalğan. Ministr äkimdikterdi işki narıqtağı kartop swranısın qamtamasız ete almay otır dep kinäladı. Twraqtandıru qorlarına da kartoptıñ jetkilikti qorı satıp alınbağan.

"Säbiz boyınşa jağday onan da kürdeli. Qazir otandıq önimniñ qorı bıltırmen salıstırğanda 5,3 payızğa azayğan" dedi Swltanov.

Osığan oray sauda ministri auıl şaruaşılığı ministrligine tez arada import, eksport, öndiris, qor kölemi men azıq-tülik önimderiniñ balansı boyınşa boljam äzirleu qajettigin tapsırudı wsındı. Ol äkimdikter "forvardıq kelisimge" (satıp aluşı men satuşı arasında belgili bir önimdi alu jöninde jasalatın aldın ala kelisim) jwmsalatın qarjı kölemin 10 mlrd teñgege deyin jetkizui tiis, al "aynalım shemasına" (sauda jelileri bağanı wstap twruğa tırısıp, esesine nesie aluda jeñildikke ie boladı) 50 mlrd teñge bölui tiis dedi.

Bwğan deyin elde säbiz ben kartop bağasınıñ kilogramı 400-500 teñgege jetkeni habarlanğan edi.

"The Qazaq Times"