قىتاي كوممۋنيستىك پارتياسىنىڭ جوعارى جەتەكشىلەرى باس قوسقان جيىندا پارتيانىڭ ءبىرىنشى حاتشىسى شي جينپيڭ (سي تسزينپين) قىتايدى الەمگە جاعىمدى وبرازدا ايگىلەۋ تۋراسىندا مالىمدەمە جاسادى. ونىڭ بۇل مالىمدەمەسى قىتاي مەن اقش قاتىناسى شيەلەنىسىپ تۇرعان تۇستا جاسالىپ وتىر. ساراپشىلار بۇنى بارعان سايىن قارسىلاستىق مىنەزىنە بەيىم بولا تۇسكەن قىتايدىڭ بۇگىنگى ديپلوماتياسىن وزگەرتۋگە دەگەن قۇلشىنىس بولۋى مۇمكىن دەپ ساناۋدا.

قىتاي باسشىسىنىڭ بۇنداي مالىمدەمەسىنەن ءبىر كۇن بۇرىن سىرتقى ىستەر مينيسترلىگى كوروناۆيرۋستىڭ پايدا بولۋ سەبەبىنە قاتىستى امەريكالىق زەرتتەۋگە قارسى مالىمدەمە جاساپ، «اقش ساياسي مانيپۋلياتسيا جاساپ، كىنانى باسقاعا اۋدارۋدا» دەپ مالىمدەگەن ەدى. قۇراما شتات تارابىنان زەرتتەۋلەردە ۆيرۋس قىتايداعى لابوراتوريادان تارالعان بولۋى مۇمكىن دەگەن بولجام كوبىرەك ايتىلادى.

قىتاي شىڭجاڭداعى مۇسىلمان جانە ەتنيكالىق ازشىلىق وكىلدەرىنە قاتاڭ مامىلە جاساپ، ادامدىق قۇقىقتى اياققا تاپتادى دەپ ايىپتالىپ كەلەدى. بۇعان قوسا گونكونگتاعى دەموكراتيانى تالاپ ەتكەندەرگە قارسى قۋدالاۋلار الەمدەگى قىتايدىڭ يميدجىنە تەرەڭ ءارى كەرى اسەرىن كورسەتتى.

شي جينپين بيلىك پارتياسىنىڭ جوعارى جەتەكشىلەرىنە قىتايدىڭ كوزقاراسىن ءپوزيتيۆتى كورسەتۋدىڭ اسا ماڭىزدى ەكەنىن باسا ايتتى. «حالىقارالىق قوعامدىق پىكىر جونىندە ءسوز بولعاندا، ءار دايىم دوستاردى تاۋىپ، ءورىستى كەڭەيتىپ وتىرۋ ماڭىزدى»، – دەگەن شي سوزىندە.

شي ءجينپيننىڭ بۇل مالىمدەمەسى قىتايدىڭ وقشاۋلانىپ قالعانىن العاش رەت مويىنداۋى بولىپ سانالادى. ول قحر جەتەكشىسى بولىپ كەلگەننەن بەرى قىتايدىڭ سىرتقى ساياساتى قاتاڭ بولا ءتۇستى، ىشكى ساياساتىندا اۆتوريتاريزم كۇشەيدى. الايدا، بۇنداي جاعداي قىتايدىڭ باتىس ەلدەرىمەن مامىلەسىن بۇزىپ، سوڭىندا تىعىرىققا اكەلىپ قويدى.

“The Qazaq Times”