رەسەي ەۋرووداق ەسكەرتۋىن ەلەمەدى: بوررەلدىڭ سىنعا ۇشىراعان ماسكەۋ ساپارى

ەۋروپالىق وداقتىڭ سىرتقى ساياسات ءبولىمىنىڭ باسشىسى جوزەپ بوررەلدىڭ رەسەيدەگى كەزدەسۋى ساراپشىلار تاراپىنان سىنعا ۇشىرادى. سەبەبى بوررەللدىڭ ماسكەۋگە ساپارى وپپوزيتسيونەر الەكسەي ناۆالنىيدىڭ ۋلانۋىنا، قامالۋىنا قاتىسى بار رەسەيلىك شەنەۋنىكتەر مەن ماگناتتارعا قارسى سانكتسيالار ماسەلەسىمەن تۇسپا-تۇس كەلدى.

بوررەل رەسەي سىرتقى ىستەر ءمينيسترى سەرگەي لاۆروۆپەن كەزدەسىپ، ناۋرىزدىڭ سوڭىندا وتەتىن ەو ءسامميتىن، كرەملدىڭ ادام قۇقىقتارىن تاپتاۋ ارەكەتتەرىن، ناۆالنىي ءىسىن جانە باسقا دا نەگىزگى ماسەلەلەردى تالقىلاعان. سونىمەن قاتار، ماسكەۋدە جۇرگەن ەۋرووداقتىڭ سىرتقى ىستەر ۆەدومستۆوسىنىڭ باسشىسى جوزەپ بوررەل رەسەي سىرتقى ىستەر ءمينيسترى سەرگەي لاۆروۆپەن كەلىسسوزدە ناۆالنىيدى جانە ونى قولداۋ شارالارى كەزىندە ۇستالعانداردى بوساتۋ ماسەلەسىن تاعى دا كوتەردى. دەگەنمەن، ەۋروپاداعى ساراپشىلار «رەسەيگە بويكوت رەتىندە بوررەل ساپار جاساماۋى ءتيىس ەدى» دەپ سانايدى.

Politico حالىقارالىق باسىلىمىندا وسى تاقىرىپ جونىندە: «بوررەلدىڭ لاۆروۆپەن كەزدەسۋ «قويىلىمى» اپاتقا ۇشىرادى. ول ەو ناۆالنىيدىڭ ىسىنە بايلانىستى رەسەيگە قارسى جاڭا سانكتسيالار قابىلداۋعا ەشقانداي قادام جاساماعانىن مويىندادى. سودان كەيىن يسپانيانىڭ بۇرىنعى سىرتقى ىستەر ءمينيسترى بولعان بوررەل لاۆروۆتىڭ ەۋرووداقتى سىناعانىنا ەشقانداي جاۋاپ بەرە المادى»، – دەيدى.

ەۋروپالىق پارلامەنتتەگى ەڭ ۇلكەن فراكتسيانىڭ، ەۋروپالىق حالىق پارتياسى فراكتسياسىنىڭ اتىنان بوررەلدىڭ ماسكەۋ ساپارىن ونىڭ ۆيتسە-توراعاسى، لاتۆيانىڭ بۇرىنعى سىرتقى ىستەر ءمينيسترى ساندرا كالنيەتە قاتتى سىنعا الدى. شەنەۋنىك سوزىندە: «بوررەلدىڭ بۇل كەزدەسۋى ەۋرووداقتى رەسەيگە جىعىپ بەرگەندەي. سەبەبى ول لاۆروۆقا قارسى مالىمدەمە ايتا المادى. ەگەر بوررەل تۇرمەدەگى الەكسەي ناۆالنىيعا بارىپ، دەموكراتيانى جاقتاۋشىلارمەن ەگجەي-تەگجەيلى سويلەسكەن بولسا عانا بۇل ساپار ماعىنالى بولار ەدى. شىندىعىندا، بوررەل ءتىپتى ناۆالنىيمەن كەزدەسۋگە دە تىرىسپادى. ءتىپتى قىرىمدى دا ءسوز ەتكەن جوق. ءبىز بوررەلدى كرەملدى ناسيحاتتاۋدىڭ قۇرالى ەمەس، ەۋروپالىق قۇندىلىقتاردى قورعايتىن ساياساتكەر ساناعان ەدىك»، – دەدى.

رەسەي مەن شىعىس ەۋروپانىڭ مامانى، ساياساتتانۋشى مارك گالەوتتي بريتاندىق «Spectator» جۋرنالىنداعى ماقالاسىندا: «بۇل – ەۋرووداق ديپلوماتياسىنداعى ەڭ ناشار كەزدەسۋ بولدى. بوررەلدىڭ ماسكەۋگە ساپارى، وكىنىشكە وراي، ورىستار ءۇشىن جەڭىس. كرەمل ەۋرووداقتىڭ اتىنان بارعان بوررەلدى مويىندامايتىن دا كورسەتتى. ورىستار كوبىنە بايدەن اكىمشىلىگىنەن قورقاتىن سياقتى»، – دەپ جازدى.

گالەوتتي، كوپتەگەن باسقا كوممەنتاتورلار سياقتى، بوررەل ناۆالنىيمەن دە، ونىڭ سەرىكتەستەرىمەن دە كەزدەسۋگە تىرىسپاعانىن سىنعا الدى.

«نەمىس تولقىنى» ورىس رەداكتسياسىنىڭ باسشىسى كريستيان تريپپە تەز ارادا رەسەيگە سانكتسيا ەنگىزۋ كەرەك دەيدى. ال ەستونيا پارلامەنتىنىڭ سىرتقى ساياسات كوميتەتىنىڭ باسشىسى ماركو ميحكەلسون ناۆالنىيعا قاتىستى سوت جانە باسقا دا وقيعالاردى ەسكەرە وتىرىپ، «ەو مەن رەسەي اراسىنداعى قارىم-قاتىناستاعى اتموسفەرا تومەنگى دەڭگەيدە»، دەپ سانايدى.

بريتاندىق Telegraph گازەتى بوررەلدىڭ ساپارىن «ەۋرووداقتى قورلاۋ» دەپ اتاعان. باسىلىمدا: «بوررەل مۇنداي جاعدايعا دايىن ەمەس بولىپ شىقتى. لاۆروۆ ءوز ەرەجەسى بويىنشا وينادى جانە سانكتسيادان قورىقپايتىنىن اشىق ءبىلدىردى»، – دەلىنگەن.

ناۆالنىي ءىسى                                    

2 اقپاندا ماسكەۋ قالالىق سوتىندا ناۆالنىيدىڭ «يۆ روشە» ىسىندەگى شارتتى مەرزىمىن اۋىستىردى. ناۆالنىي جازاسىن جالپى رەجيمدەگى كولونيادا وتەيدى. شەشىم كۇشىنە ەنگەنگە دەيىن ول تەرگەۋ يزولياتورىندا قالادى. ۇكىم شىققاننان كەيىن باتىس ەلدەرى رەسەي بيلىگىنىڭ بۇل ارەكەتىن «ەركىندىك قۇقىعى مەن زاڭ ۇستەمدىگىنە جاسالعان اۋىر سوققى» دەپ سىنعا الىپ، ناۆالنىيدى بوستاۋدى تالاپ ەتتى. باتىس ەلدەرىنىڭ ناۆالنىيدى بوساتۋ تۋرالى دابىلىنا كرمەلدىڭ اتىنان جاۋاپ بەرگەن رەسەي ءسىم-ءنىڭ رەسمي وكىلى ماريا زاحاروۆا «نەگىزسىز شەشىم» دەپ قىسقا قايىردى.

بۇعان دەيىن ءبىر توپ دەموكرات جانە رەسپۋبليكاشىل سەناتور اقش كونگرەسىنە «رەسەيدى قاستىق ارەكەتى ءۇشىن جاۋاپقا تارتۋ تۋرالى» زاڭ جوباسىن ۇسىنعان. وندا ناۆالنىيدى ۋلاۋعا جانە «نوۆيچوك» ۋىن جاساعاندارعا قاتىسى بار رەسمي تۇلعالارعا سانكتسيا سالۋ جاعى قاراستىرىلعان.

6 اقپاندا رەسەي ەۋروپا وداعىنىڭ ءۇش ديپلوماتىن «زاڭسىز شارالارعا قاتىستى» دەپ ايىپتاپ، ەل اۋماعىنان شىعارۋدى تالاپ ەتتى.

كەيىننەن ەۋرووداق رەسەيدى ديپلوماتتاردى شىعارىپ جىبەرۋ تۋرالى شەشىمىن قايتا قاراۋعا شاقىردى. فرانتسيا پرەزيدەنتى ەممانۋەل ماكرونمەن بىرگە وتكەن ءباسپاسوز ءماسليحاتىندا گەرمانيا كانتسلەرى انگەلا مەركەل بەرلين مەن پاريج ماسكەۋدىڭ بۇل شەشىمىن ورىنسىز دەپ تانيتىنىن ايتتى.

شۆەتسيا سىرتقى ىستەر مينيسترلىگى ءوز ديپلوماتيالىق وكىلدىگى قىزمەتكەرى رۇقسات ەتىلمەگەن شاراعا قاتىستى دەگەن اقپاراتتى جوققا شىعاردى. پولشا شەشىمنىڭ كۇشى جويىلاتىنىنا ءۇمىت ەتەتىنىن ايتتى جانە بۇعان قارىمتا شارالار قولداناتىنىن ەسكەرتتى.

"The Qazaq Times"