لاۆروۆ پەن بلينكەن يران يادرولىق كەلىسىمىن تالقىلاعان

اقش پەن رەسەي سىرتقى ىستەر مينيسترلەرى تەلەفون ارقىلى ديالوگ وتكىزدى. سويلەسۋ بارىسىندا اقش-رەسەي قاتىناسىنان تىس يراننىڭ يادرولىق كەلىسىمگە قايتا ورالۋى تاقىرىبى دا تالقىلانعان.

اقش مەملەكەتتىك دەپارتامەنتىگىنىڭ 6 قازانداعى سويلەسۋ تۋرالى مالىمدەمەسىندە مەملەكەت حاتشىسى بلينكەن مەن رف ءسىم باسشىسى سەرگەي لاۆروۆ اراسىنداعى تالقىنىڭ باستى تاقىرىبى يران يادرولىق كەلىسىمى بولعانى ايتىلعان.

بلينكەن سوزىندە: «سويلەسۋ بارىسىندا ءبىز ءوزىمىزدىڭ قايدا تۇرعانىمىز جانە قايدا باراتىمىز تۋرالى ۇستانىمدارىمىزدى جەتكىزۋگە مۇمكىندىك الدىق»، – دەگەن.

لاۆروۆ تا سويلەسۋ بارىسىندا يادرولىق كەلىسىمگە كەلۋ تۋرالى كەلىسسوزدەردى مۇمكىندىگىنشە تەز ارادا قالپىنا كەلتىرۋ كەرەك دەگەن پىكىرىن بىلدىرگەن. ول سونداي-اق، «حالىقارالىق قاۋىمداستىق قۇراما شتاتتاردى يادرولىق كەلىسىم بويىنشا ءوز مىندەتتەرىن ورىندايدى دەپ ۇمىتتەنەتىنىن»، «يران مەن ونىڭ ءتۇرلى ساۋدا سەرىكتەرىنە زاڭسىز شەكتەۋلەردى توقتاتادى دەپ سەنەتىنىن» جەتكىزگەن.

جاقىندا يران سىرتقى ىستەر ءمينيسترى ابدۋللاحيان ماسكەۋدە وسى ماسەلە بويىنشا لاۆروۆپەن كەزدەسىپ تالقىلعان بولاتىن. ول كەزدەسۋدەن كەيىن كەلىسسوز بويىنشا ءتۇرلى كونسۋلتاتسيالار جۇرگىزىپ جاتقاندارىن، كوپ ۇزاماي ۆەنادا كەلىسىمگە قايتا ورالۋ بويىنشا كەلىسسوزدەر باستالاتىنىن ايتقان.

بايدەن يرانمەن بۇرىنعى يادرولىق كەلىسىمگە قايتا ورالۋعا نيەتتى ەكەنىن بىرنەشە رەت بىلدىرگەن، الايدا تاقىرىپ بويىنشا كەلىسسوزدەر ءتۇرلى سەبەپتەرمەن كەشىگىپ كەلەدى. بلينكەن وسىدان بۇرىن يرانمەن كەلىسىمدى ەگجەي-تەگجەيلى سويلەسۋگە ۋاقىتتىڭ از ەكەنىن دە ايتقان.

يران 2015 جىلى گەرمانيا، قىتاي، فرانتسيا، رەسەي، بريتانيا جانە اقش قاتىسقان «بىرلەسكەن كەشەندى ءىس-قيمىل جوسپارىنا» (JCPOA) قول قويدى. بۇل «يران يادرولىق كەلىسىمى» دەيتىن بەيرەسمي اتپەن بەلگىلى كەلىسىم. الايدا، 2018 جىلى اقش پرەزيدەنتى دونالد ترامپ بۇل كەلىسىم يراننىڭ يادرولىق قارۋعا قول جەتكىزۋىنە تۇبەگەيلى شەكتەۋ قويا المايدى دەپ ايىپتاپ، كەلىسىمنەن بىرجاقتى شىعىپ كەتتى ءارى وسى كەلىسىم بويىنشا توقتاپ تۇرعان يرانعا قارسى ەكونوميكالىق سانكتسيالاردى قايتا ىسكە قوستى. وسىدان كەيىن دە يران ۋران بايىتۋ بويىنشا كەلىسىمدەگى شەكتەۋلەردەن شىقتى.

قازىر اتالعان ەلدەردىڭ اراسىندا كەلىسىمدى قايتا قالپىنا كەلتىرۋ بويىنشا سويلەسۋلەر ءجۇرىپ جاتىر. كەلىسىمنىڭ مازمۇنىندا قانداي دا ءبىر وزگەرىستەر بولا ما، جوق، بۇل جاعى قازىرگە انىق ەمەس. بىراق، يراننىڭ جاڭا ۇكىمەتى كەلىسىم بويىنشا سويلەسۋگە اشىقتىعىن اڭعارتتى.

The Qazaq Times